Ya zole na Bakorinto 10:1-18
10 Ntangu yayi munu Polo, mu ke na bondilaka beno na lembami mpe na ntima ya mbote ya Kristo. Ba ya nkaka na kati ya beno ke zonzaka ti ntangu mu ke vandaka na mantwala ya beno mu ke vandaka ya kukuluka,* kasi ntangu mu ke sonikilaka beno mu ke vandaka na bukindi na tiya nyonso.
2 Mu ke na bondilaka beno samu ntangu mu ke vanda na beno, ya lomba ve ti mu zonzila beno bamambu mutindu ya kele, mpe mu baka mikanu ya ngolo samu na bantu yina ke na talaka ti beto ke na salaka bamambu na mutindu ya kinsuni.
3 Ata ti luzingu ya beto ke mutindu luzingu ya bantu ya nkaka, beto ke nwanaka ve mutindu bantu ke nwanaka.
4 Ya tsyeleka, binwanunu ya mvita ya beto ke ve ya kinsuni, kasi Nzambi ke kumisaka yawu ngolo samu na kubwisa bima yina me kangamaka ngolo.
5 Beto ke bwisaka banzonzolo mpe bima nyonso yina ke kangaka nzila na nzayilu ya Nzambi, beto ke bwilaka mpe beto ke nataka makanisi nyonso na kutumama na Kristo.
6 Beto ke ya kuyidama na kusemba mambu nyonso ya kukondwa kutumama, ntangu kutumama ya beno ke kuma ya kulunga.
7 Beno ke tadilaka bamambu mutindu ya ke talanaka na meso. Kana muntu ke na kundima ti yandi ke muntu ya Kristo, bika yandi kanisa dyaka na mambu yayi: Kaka mutindu yandi ke muntu ya Kristo, beto mpe ke bantu ya Kristo.
8 Ata ti mu bula ntulu mwa mingi samu na lutumu yina Mfumu pesaka beto samu na kukindisa beno, kasi ve samu na kubwisa beno, mu ke kufwa ve nsoni.
9 Mu zola ve ya talana mutindu mu ke na sosaka kupesa beno boma na nzila ya mikanda ya munu.
10 Ya tsyeleka, bantu ya nkaka ke zonzaka: “Mikanda ya yandi ke zonzilaka mambu ya mfunu mpe ya ke na ngolo. Kasi ntangu yandi ke vandaka na mantwala ya beto, yandi ke vandaka ya kukondwa bukindi mpe bamambu yina yandi ke zonzaka ke vandaka ve mfunu.”
11 Bika ti bantu yina ke na zonzaka mutindu yina zaba ti bamambu yina beto ke zonzaka* na mikanda ya beto ntangu beto ke vandaka ve, ni yawu mpe beto ke sala ntangu beto ke kwiza kuna.
12 Samu beto mekaka ve na kutula beto mosi na mulonga ya bantu ya nkaka, to na kufwanisa beto mosi na bantu yina ke pesaka masiika na bawu mosi. Kasi ntangu ba ke sambisaka bawu mosi na kutalaka misiku ya bawu mosi, mpe ntangu ba ke fwanisaka bawu mosi na bawu mosi, ba ke talanaka bantu ya kukondwa mayela.
13 Beto ke bula ve ntulu na yina me tadila kisalu yina beto me sala ve. Kasi beto ke bula ntulu na yina me tadila kisalu yina Nzambi pesaka beto. Mpe na kati ya kisalu yango, ke na kisalu ya kusamuna kisika beno ke vandaka.
14 Ya tsyeleka beto salaka ve mambu yina Nzambi zonzaka ve na beto na kusala ntangu beto kwizaka na beno. Kasi beto vandaka bantu ya ntete na kuzonzila beno nsangu ya mbote na yina me tadila Kristo.
15 Beto ke na bulaka ve ntulu na yina me tadila kisalu yina muntu ya nkaka me sala, kasi beto ke na kivuvu ti mutindu kiminu ya beno ke na tatamanaka na kukula, beto ke lenda kusala ti kisalu ya beto kula na kati ya beno ata kuluta bandilu yina Nzambi lakisaka beto. Na yawu, beto ke vanda na makoki ya kusala dyaka yawu na faso ya kulutila,
16 samu beto lenda mpe kuzonzila nsangu ya mbote na bisika yina ke ntama na kisika ya beno. Na mutindu yina, beto ke bula ve ntulu samu na kisalu yina bantu ya nkaka me sala na kisika yina ba me zonzila nsangu ya mbote.
17 Kasi muntu yina ke bula ntulu, bika yandi bula ntulu samu na Yehova.
18 Samu Yehova ke ndimaka muntu yina yandi ke pesaka masiika. Kasi yandi ke ndimaka ve muntu yina ke pesaka masiika na yandi mosi.
