Ya zole na Bakorinto 11:1-33
11 Mu zola ti beno kanga ntima na mwa buzoba ya munu. Ya tsyeleka, beno ke na kangaka ntima na bamambu ya munu.
2 Mu pesaka beno nsilulu ti mu ke pesa beno na dikwela na Kristo, mpe mu ke nata beno na sika ya yandi mutindu mwana ya ndumba* ya kuvedila. Samu kimbanda yina mu ke na yawu samu na beno ke kimbanda yina me katuka na Nzambi.*
3 Kaka mutindu nyoka vunaka Eva na mayela ya yandi ya yimbi, mu ke na boma ti muntu lenda na kubebisa mabanza ya beno mpe kusala ti beno kondwa kiminu mpe beno kuma mvindu. Kasi muntu ya Kristo me fwana kuvanda ya kuvedila mpe ya kukwikama.
4 Ya tsyeleka, kana muntu kwiza mpe samuna Yesu yina ke ve mutindu mosi na Yesu yina beto samunaka, to kana beno kuzwa mpeve yina ke ve mutindu mosi na mpeve yina beno kuzwaka, to nsangu ya mbote yina ke ve mutindu mosi na nsangu ya mbote yina beno ndimaka, ya zola zonza ti beno ke na ndimaka mambu ya muntu ya mutindu yina.
5 Samu mu ke na talaka ti ya ke na ata kima yina ke na lakisaka ti mu ke na yisi ya bantumwa ya beno ya nene yina ke salaka bamambu mutindu ba ke ya kulutila mbote.
6 Ata ti mu zaba ve kuzonza mbote-mbote, mu ke ve ya kukondwa nzayilu. Ya tsyeleka beto lakisaka beno yawu pwelele na mitindu nyonso mpe na mambu nyonso.
7 Mu zonzilaka beno nsangu ya mbote ya Nzambi na kilengi mpe mu lombaka ve beno mbongo. Mu kulukaka samu beno kuzwa lukumu. Mu salaka kwandi disumu na kusalaka mutindu yina?
8 Mu kuzwaka lusalusu ya bimvuka ya nkaka mpe ya vandaka mutindu mu botolaka* bawu bima samu na kusadisa beno.
9 Ntangu mu vandaka na beno, mpe mu vandaka ve na bima yina mu vandaka na yawu nsatu, mu kumaka kizitu* ya ata muntu na kati ya beno. Samu bampangi yina katukaka na Masedwane pesaka munu bima nyonso yina mu vandaka na yawu nsatu. Ee, na mutindu nyonso, mu mangaka kukuma kizitu samu na beno mpe mu ke tatamana na kusala mutindu yayi.
10 Ntangu nyonso yina matsyeleka ya Kristo ke na munu, mu ke bika ve kuzonzila yawu na kilengi nyonso na babwala ya Akayi.
11 Samu na yinki? Samu mu ke zolaka ve beno? Nzambi zaba ti mu ke zolaka beno.
12 Ya ke na ba yina ke na bulaka ntulu mpe ke na zonzaka ti ba ke bantumwa kaka mutindu beto. Na yawu mu ke tatamana na kusala mambu yina mu ke salaka ntangu nyonso, samu mu lenda kukanga bawu nzila samu ba vanda dyaka ve na mambu ya kubudila ntulu.
13 Bantu ya mutindu yayi ke bantumwa ya luvunu, mpe bisadi ya mayuya yina ke sosaka kutalana mutindu bantumwa ya Kristo.
14 Ya ke ve mambu ya kupamuka, samu Satana yandi mosi ke kitukaka ntangu nyonso mutindu mbazi ya nsemo.*
15 Na yawu ya ke ve mambu ya kuyituka kana bisadi ya yandi mpe ke kitukaka ntangu nyonso mutindu bisadi yina ke ya lunungu.* Kasi nsuka ya luzingu ya bawu ke vanda mutindu mosi na bisalu ya bawu.
16 Mu me zonza dyaka: Bika ti ata muntu kanisa ti mu ke zoba. Kasi kana beno ke na kanisaka mutindu yina, bika beno ndima munu mutindu muntu ya zoba, samu munu mpe mu bula mwa fioti ntulu.
17 Mambu yina mu ke na zonzaka ntangu yayi, mu ke na zonzaka ve yawu mutindu Mfumu zola sala yawu, kasi mutindu muntu ya zoba yina ke bulaka ntulu samu na yandi mosi mpe ke tudilaka yandi mosi ntima.
18 Bantu mingi ke na bulaka ntulu samu na bima ya yinza, munu mpe, mu ke bula ntulu.
19 Samu beno ke bantu ya mayela mingi, beno me kanga ntima na kilengi nyonso na mambu ya bazoba.
20 Ya tsyeleka, beno ke kangaka ntima samu na konso muntu yina ke kumisaka beno bisadi,* na konso muntu yina ke kudyaka bima ya beno, na konso muntu yina ke bakaka bima yina beno ke na yawu, na konso muntu yina ke zangulaka yandi mosi na kati ya beno, mpe na konso muntu yina ke bulaka beno na kizizi.
21 Ya ke mambu ya nsoni na beto na kuzonza yawu, samu ti ba ya nkaka vanda kanisa ti beto vandaka ya kulemba mingi samu na kusadila lutumu ya beto na mutindu yina me lunga.
Kasi kana bantu ya nkaka ke na salaka bamambu na bukindi, mu ke na zonzaka mutindu zoba, munu mpe mu ke sala bamambu na bukindi.
22 Ba ke Baebre? Munu mpe mu ke Muebre. Ba ke bantu ya Izraele? Munu mpe ke muntu ya Izraele. Ba ke bana* ya Abrahami? Munu mpe ke mwana ya Abrahami.
23 Ba ke bisadi ya Kristo? Mutindu kilawu, munu mpe ke na pesaka mvutu ti munu mpe ke kisadi ya Kristo na mutindu ya kulutila. Mu me sala mingi kulutila bawu. Ba me tula munu na boloko bambala mingi kulutila bawu. Ba me bula munu bambala mingi mpe bambala mingi, mu talaka lufwa na meso.
24 Bambala tanu Bazwife bulaka munu bafimbu 40 kukatula mosi.
25 Bambala tatu ba bulaka munu bayinti, mbala mosi ba bulaka munu matadi, bambala tatu mu vandaka na kati ya masuwa yina dyamaka, mu lutisaka mpimpa mpe kilumbu mosi na nzadi ya mungwa.*
26 Bambala mingi mu vanda sala banzyetolo, ntangu nyonso mu vanda tala lufwa na mantwala ya munu, na kati ya banzadi, na mantwala ya miyibi, samu na bantu ya dikanda ya munu, samu na bantu ya makanda, na kati ya mbanza, na zulu ya ntoto ya kuyuma, na nzadi ya mungwa,* mpe na kati-kati ya bampangi ya luvunu.
27 Mu talaka mpasi na bisalu ya ngolo mpe yina ke lembisaka. Bambala mingi mu vanda lala ve na mpimpa. Mu vandaka na nsatu ya kima ya kudya mpe ya kunwa. Bambala mingi mu kondwaka madya. Mu talaka mpasi samu na madidi, mpe mu vandaka ve na bilele.
28 Katula bamambu nyonso yayi, ya ke na mambu yina ke kwamisaka munu bilumbu nyonso: manyongi ya munu samu na bimvuka nyonso.
29 Ntangu muntu ke vandaka ya kulemba, mu ke vandaka ve ya kulemba? Ntangu muntu ke bulaka dibaku, mu ke vandaka ve na nkele?
30 Kana mu me fwana kubula ntulu, mu ke bula ntulu samu na bamambu yina ke lakisaka kulemba ya munu.
31 Nzambi mpe Tata ya Mfumu Yesu, muntu yina beto me fwana kupesa nkembo ntangu nyonso zaba ti mu ke ve na vunaka.
32 Na Damase mfumu yina vandaka na yisi ya lutumu ya mfumu Aretase vanda kengidila mbanza ya Damase samu na kukanga munu.
33 Kasi ba tulaka munu na kati ya kitunga* mpe ba kulumusaka munu na nela* ya kibaka ya mbanza. Ni yawu salaka ti mu vuuka na maboko ya yandi.
Banote
^ To: “Mwana ya kento yina me zaba ntete ve babakala.”
^ Na Greke: “tiya ya Nzambi.”
^ To: “Labaka.”
^ To: “Dema.”
^ To: “Lumière.”
^ To: “Kudedama.”
^ To: “Mindongo.”
^ Na Greke: “mbuma.”
^ To: “Mubu.”
^ To: “Mubu.”
^ To: “Panier ya mambamba.”
^ To: “Fenêtre.”
