Ya zole na Bakorinto 12:1-21
12 Mu fwana kubula ntulu. Ya ke ve mfunu, kasi ntangu yayi mu ke zonzila bimona-meso ya ngitukulu mpe mambu yina Mfumu lakisaka munu.
2 Mu zaba muntu mosi yina ke na bumosi na Kristo, mpe yina ba nataka na mazulu ya tatu bamvula 14 me luta. Mu zaba ve kana ya vandaka na nzutu to na ngaanda ya nzutu, kasi Nzambi zaba.
3 Ee, mu zaba muntu ya mutindu yayi, mu zaba ve kana ya vandaka na nzutu to na ngaanda ya nzutu. Kasi Nzambi zaba.
4 Ba nataka yandi na Paradiso mpe yandi waka mambu yina ba lenda zonza ve, mpe yina muntu ke ve na muswa ya kuzonza.
5 Mu ke bula ntulu samu na muntu ya mutindu yayi, kasi mu ke bula ve ntulu samu na munu mosi, kana ya vanda kaka kubula ntulu samu na kulemba ya munu.
6 Samu ata ti mu bula ntulu, mu ke vanda ve zoba samu mu ke zonza matsyeleka. Kasi mu me manga kusala mutindu yayi samu ata muntu kanisa ti mu me sala mambu yina me lutila mambu yina ba ke talaka munu na kusala, to yina ba ke na kuwaka munu na kuzonza,
7 kaka samu ba lakisaka munu bamambu ya ngitukulu.
Samu mu vanda ve ya kufuluka na lunangu, ba tulaka munu dinsende na nzutu, mbazi mosi ya Satana, na kubulaka munu ntangu nyonso samu mu fuluka ve na lunangu.
8 Mu me bondila Mfumu bambala tatu samu yandi katula munu disende yayi.
9 Kasi yandi zonzaka na munu: “Ntima ya kulutila mbote yina mu ke na lakisaka nge, me lunga samu na nge. Samu ngolo ya munu ke na kumaka ya kulunga ntangu nge ke ya kulemba.” Na yawu mu ke bula ntulu na kilengi nyonso samu na kulemba ya munu. Samu ngolo ya Kristo bikana na zulu ya munu mutindu tenta.
10 Na yawu, mu ke vandaka na kilengi ntangu mu ke vandaka ya kulemba, ntangu ba ke fingaka munu, ntangu mu ke vandaka na nsatu ya lubakusu, ntangu ba ke kwamisaka munu, mpe ntangu mu ke vandaka na mpasi, nyonso yayi samu na Kristo. Samu ntangu mu ke vandaka ya kulemba, ni na ntangu yina mu ke vandaka ngolo.
11 Mu me kuma zoba, ni beno me nata munu na kukuma mutindu yayi. Samu ti ni beno zola pesa munu masiika. Ata ti mu ke muntu ya mpamba, mu lakisaka na ata mambu ti mu ke na yisi ya bantumwa ya beno ya nene.
12 Ya tsyeleka, na kukanga ntima nyonso, mu lakisaka na kati-kati ya beno ti mu ke ntumwa na nzila ya bidimbu, bimangu, mpe bamambu ya ngitukulu.
13 Samu wapi mambu salaka ti beno kuma na yisi ya bimvuka ya nkaka? Ya lenda vanda kaka samu mu salaka ti mu kuma ve kilo samu na beno. Beno lemvokila munu samu na mambu ya yimbi yayi.
14 Yayi mbala ya tatu mu zola kukwiza na beno, mpe mu ke kuma ve kilo samu na beno. Samu mu ke na sosaka ve bima ya beno, kasi ni beno mu ke na sosaka. Ya tsyeleka, ni bana ve me bonga kubumba bima samu na bibuti ya bawu. Kasi ni bibuti me fwana kusala yawu samu na bana ya bawu.
15 Mpe munu, mu ke na kyese mingi ya kupesa nyonso yina mu ke na yawu, mpe kukipesa munu nyonso samu na beno.* Kana mu ke zolaka beno mingi, beno fwana kuzola kwandi munu ndambu?
16 Ata faso yina, mu vandaka ve kilo samu na beno. Kasi beno ke na zonzaka ti mu ke na “mayela ya yimbi” mpe mu bwilaka beno “na mayela ya luvunu.”
17 Mu vunaka kwandi beno samu na mbote ya munu mosi na manima ya bantu yina mu filisaka beno?
18 Mu bondilaka Tite samu yandi kwiza tala beno mpe mu filisaka yandi na mpangi mosi. Na kati ya makabu yina beno pesaka, Tite bakaka ve ndambu samu na yandi mosi, ni faso yina ve? Beto vandaka na makanisi ya mutindu mosi, ni faso yina ve? Beto salaka bamambu mutindu mosi, ni faso yina ve?
19 Ya lenda vanda ti beno ke na kanisaka ti beto ke na nwaninaka beto mosi. Kasi ya ke ve mutindu yina, samu mutindu bilandi ya Kristo, beto ke na zonzaka matsyeleka na mantwala ya Nzambi. Bampangi ya munu yina mu ke zolaka mingi, nyonso yina beto ke na salaka ke samu na kupesa beno ngolo.
20 Mu ke na boma samu ti ntangu mu ke kwiza, mu kutana ve beno na mutindu yina mu zola kukutana beno, mpe mu vanda ve faso beno zola mu vanda. Kasi mu ke na boma ya vanda na mambu ya kuswana, kimbanda, nkele ya kulutila, kukabuka, songi-songi, kutonga, kufuluka na lulendo, mpe muvuusu.
21 Ya lenda vanda ti ntangu mu ke kwiza dyaka, Nzambi ya munu fwisa munu nsoni na meso ya beno, mpe ke sala ti mu dila samu na bantu yina salaka masumu na ntama mpe balulaka ve bantima samu na mambu ya bawu ya mvindu, kinsuza,* mpe bamambu ya kidi-kidi yina ba salaka.*
Banote
^ To: “Bamwela ya beno, to bilunzi ya beno.”
^ Na Greke, por·nei′a. Tala Yina ya zola zonza.
^ To: “Ndyatulu ya nsoni.” Na ndinga ya Greke, asélgéïa. Tala Yina ya zola zonza.
