Ya zole na Bakorinto 2:1-17
2 Mu bakaka mukanu ti ntangu mu ke kwiza dyaka na beno, ya vanda ve na kati ya kyadi.
2 Kana mu me sala ti beno vanda na kyadi, nani dyaka ke pesa munu kilengi, kana ya ke ve ni muntu yina mu me nyongisa?
3 Mu me sonika bamambu yayi samu ti ntangu mu ke kwiza, mu bika kuvanda na mawa samu na bantu yina zola pesa munu kilengi. Mu ke na kundima ti mambu yina ke salaka ti mu vanda na kilengi ke sala ti beno nyonso, beno vanda na kilengi ya mutindu mosi.
4 Ntangu mu vanda sonikila beno, mu vanda kutana na bankwamusu mingi, mpe mu vandaka na mawa mingi na ntima. Mu vanda sala yawu na mansangasa mingi. Ya vandaka ve samu na kupesa beno mawa, kasi ya vandaka samu beno zaba bunene ya luzolo ya munu samu na beno.
5 Kana muntu mosi me sala ti bantu vanda na mawa, ni munu ve yandi me pesa mawa, kasi na beno nyonso. Na yawu mu ke na nsatu ya kuzonza mingi na yina me tadila mambu yayi.
6 Masembo yina bantu mingi na kati ya beno pesaka muntu yina, me lunga.
7 Ni na yawu ntangu yayi, beno fwana kulemvokila yandi na ntima mosi mpe kukindisa yandi, samu yandi vanda ve na kati ya kyadi ya kulutila.
8 Na yawu, mu ke na zonzaka na beno na kulakisa yandi ti beno ke zolaka yandi mingi.
9 Ni na yawu mpe mu me sonikila beno, samu na kuzaba kana beno ke lakisa kutumama ya beno na mambu nyonso.
10 Kana beno lemvokila muntu na mambu nyonso, munu mpe ke lemvokila yandi. Ya tsyeleka, mambu nyonso yina mu lemvokilaka (kana mu lemvokilaka mambu nyonso), mu salaka yawu samu na mbote ya beno na meso ya Kristo.
11 Na mutindu yina, Satana ke nunga ve na zulu ya beto,* samu beto zaba mbote-mbote makanisi ya yandi.
12 Ntangu mu kwendaka na Trowase samu na kuzonzila nsangu ya mbote na yina me tadila Kristo, mwelo mosi fungukaka na mantwala ya munu samu na kisalu ya Mfumu.
13 Ntima ya munu vandaka ve na kizunu samu mu talaka ve Tite yina ke mpangi ya munu. Na yawu, mu bikaka bawu mpe mu kwendaka na Masedwane.
14 Kasi beto ke na vutulaka Nzambi matondo samu yandi ke na twadisaka beto mutindu basoda yina me katuka kununga mvita kintwadi na Kristo. Mpe yandi ke na salaka ti nsunga ya kitoko ya nzayilu ya Nzambi wakana* bisika nyonso na nzila ya beto.
15 Na meso ya Nzambi, beto ke mananasi ya nsunga ya kitoko na Kristo, na kati ya bantu yina ke na vuukaka mpe na kati ya bantu yina ke na kufwaka.
16 Samu na ba yina ke na kufwaka, ya ke nsunga ya lufwa yina ke na nataka na lufwa. Samu na ba yina ke na vuukaka ya ke mananasi ya luzingu yina ke na nataka na luzingu. Nani ke ya kulunga samu na bamambu yayi?
17 Beto ke ya kulunga na mambu yayi, samu beto ke tekisaka* ve mambu ya Nzambi mutindu bantu mingi ke salaka yawu, kasi beto ke zonzaka na butsyeleka nyonso mutindu bantu yina Nzambi me filisa. Ee, na meso ya Nzambi mpe kintwadi na Kristo.
