Ya zole na Bakorinto 3:1-18
3 Ya ke kwandi mfunu ti beto zonza dyaka na beno banani beto kele? To beto ke kwandi na nsatu ya kupesa beno mikanda yina ke na pesaka beto nkembo kaka mutindu bantu ya nkaka ke lombaka yawu? To ni beno kwandi me bonga kupesa beto mikanda yango?
2 Mukanda ya beto ni beno, ya ke ya kusonama na bantima ya beto, bantu nyonso me zaba yawu mpe ke tangaka yawu.
3 Ya ke na talanaka pwelele ti beno ke mukanda ya Kristo yina beto sonikaka mutindu bisadi. Ba sonikaka ve yawu na ntita ya kusonika,* kasi na mpeve ya Nzambi ya moyo. Ba sonikaka ve yawu na zulu ya matadi, kasi na zulu ya bantima.
4 Beto ke na kundima ya mutindu yayi na mantwala ya Nzambi na nzila ya Kristo.
5 Beto ke na zonzaka ve ti beto lenda sala yawu na ngolo ya beto, kasi muntu yina ke sadisaka beto na kusala yawu ni Nzambi.
6 Yandi me sadisa beto samu beto vanda bisadi ya luwawanu ya malu-malu, ya Musiku ve kasi ya mpeve. Samu Musiku ya kusonama ke pesaka kitumbu* ya lufwa, kasi mpeve ke pesaka luzingu.
7 Musiku yina ke nataka na lufwa mpe yina ba sonikaka na zulu ya matadi kwizaka na nkembo mingi. Ni na yawu bana ya Izraele lendaka ve kutala kizizi ya Moyize, samu na nkembo ya kizizi ya yandi, nkembo yina zola zimbana.
8 Samu na yinki kisalu ya kupesa mpeve ke vanda na nkembo ya kulutila?
9 Kana Musiku yina ke nataka lufwa vandaka na nkembo, kisalu yina ke nataka na lunungu* ke na nkembo ya kulutila mingi.
10 Ya tsyeleka, ata kima yina ba kumisaka ntete nkembo na ntama, ba katulaka yawu nkembo samu na nkembo yina me lutila yawu.
11 Kana ba kotisaka na nkembo kima yina zola zimbana, nkembo ya kima yina ke vandaka ntangu nyonso zola vanda ya kulutila.
12 Ni na yawu, samu beto ke na kivuvu ya mutindu yayi, beto ke na zonzaka pwelele mpe na kukwikama nyonso.
13 Beto ke na salaka ve mutindu Moyize vanda salaka ntangu yandi vanda tulaka lele na kizizi ya yandi, samu bana ya Izraele lenda ve kutala mambu yina zola kumina kima yina zola zimbana.
14 Kasi makanisi ya bawu lembaka. Tii na kilumbu ya bubu yayi, ntangu beto ke tangaka luwawanu ya ntama, lele yina ke kaka kuna, samu kaka ni na nzila ya Kristo ba me katula yawu.
15 Ya tsyeleka tii bubu yayi, konso ntangu yina ba ke tangaka masonoko ya Moyize, lele ke vandaka na zulu ya bantima ya bawu.
16 Kasi ntangu muntu ke sobaka ndyatulu samu na kusadila Yehova, lele ke katukaka.
17 Yehova kele Mpeve mpe kisika mpeve ya Yehova kele, kimpwanza mpe kele.
18 Beto nyonso ke ve na lele na kizizi mpe beto kele mutindu bitalatala yina ke lakisaka nkembo ya Yehova. Ntangu beto ke kumaka mutindu yina, beto ke sobaka mpe ke kumaka mutindu mosi na yandi, katuka na kitezo mosi ya nkembo tii na kitezo ya nkaka,* kaka mutindu Yehova yina ke Mpeve ke na salaka yawu.*
Banote
^ To: “Encre.”
^ To: “Masembo.”
^ To: “Ludedomo.”
^ Na Greke: “katuka na nkembo tii na nkembo.”
^ To ya lenda vanda: “Na nzila ya mpeve ya Yehova.”
