Ya zole na Bakorinto 4:1-18
4 Na yawu, samu beto ke na kisalu yayi na nzila ya ntima ya kyadi yina Nzambi lakisaka beto, beto ke bika ve.
2 Kasi beto me losa bamambu ya kubumbana yina ke pesaka nsoni. Beto ke na dyatilaka ve na mayela ya yimbi, to kukatula ngolo ya dyambu ya Nzambi. Kasi ntangu beto ke salaka ti nsangu ya mbote talana pwelele, na meso ya Nzambi, beto ke na kumaka kifwani ya mbote na bantima ya bantu nyonso.
3 Kana nsangu ya mbote yina beto ke samunaka ke ya kubumbana, ya ke ya kubumbana na ba yina ke na kwendaka na lufwa.
4 Ni bantu yayi nzambi ya yinza* yayi me kumisa makanisi ya bawu mpimpa, samu nsemo* ya nsangu ya mbote yina me tadila Kristo yina ke kifwani ya Nzambi kukota ve.
5 Beto ke samunaka ve nsangu yina me tadila beto mosi, kasi beto ke samunaka ti Yesu Kristo ke mfumu. Beto ke mpe bisadi ya beno samu na Yesu.
6 Ni Nzambi zonzaka ti: “Bika ti nsemo ngenga na kati ya mpimpa.” Yandi me ngengisa nsemo na bantima ya beto, nsemo yina ke na pesaka nzayilu ya Nzambi na nzila ya Kristo.*
7 Kasi beto ke na kimvwama yayi na kati ya bima* ya ntoto, samu ngolo yina me lutila ngolo yina beto lenda bakula ve, vanda ya Nzambi kasi ve yina me katuka na beto.
8 Ba ke na kangaka* beto ngolo na mitindu nyonso. Kasi ba ke na kangaka ve beto na mutindu yina beto lenda ningana ve. Beto ke na zabaka ve kima ya kusala, kasi beto me kondwa ve nzila ya kubasikila.
9 Ba ke na kwamisaka beto, kasi Nzambi me bika ve beto. Ba ke na losaka beto na ntoto, kasi ba me kufwa ve beto.
10 Ntangu nyonso beto ke na nataka na nzutu ya beto bampasi ya lufwa yina Yesu kutanaka na yawu, samu luzingu ya Yesu talana mpe na nzutu ya beto.
11 Beto bantu yina ke na luzingu, beto ke na talaka ntangu nyonso lufwa na meso samu na Yesu, samu luzingu ya Yesu talana mpe na nzutu ya beto, yina ke kufwaka.
12 Na yawu, lufwa ke salaka na kati ya beto, kasi luzingu ke salaka na kati ya beno.
13 Kiminu ya beto ke mutindu mosi na yina ba sonikaka: “Mu me lakisa kiminu, ni na yawu mu ke na zonzaka.” Beto mpe ke na lakisaka kiminu, ni na yawu beto ke na zonzaka.
14 Beto zaba ti muntu yina vumbulaka Yesu na lufwa, ke vumbula mpe beto na lufwa na kuvanda kintwandi na Yesu. Yandi ke nata beto na beno na mantwala ya Yesu.
15 Mambu nyonso ke samu na mbote ya beno, samu ntima ya kulutila mbote kuma dyaka mingi, mpe bantu mingi vutula matondo na nkembo ya Nzambi.
16 Ni na yawu beto ke na bikaka ve, ata ti kimuntu ya beto ya ngaanda ke na bebaka, kasi konso kilumbu, kimuntu ya beto ya kati ke na kumaka ya malu-malu.
17 Ata ti bankwamusu* ke kaka samu na ntangu fioti, mpe ti ya ke ve kilo, ya butaka na kati ya beto nkembo mosi yina bunene* ya yawu ke na lutilaka kaka, mpe ya ke samu na ntangu nyonso.
18 Ni na yawu, beno kangama kaka na kutala bima yina ke talanaka ve, kasi ve, bima yina ke talanaka. Samu bima yina ke talanaka ke samu na ntangu fioti. Kasi bima yina ke talanaka ve, ke samu na ntangu nyonso.
Banote
^ Tala Yina ya zola zonza.
^ To: “Lumière.”
^ To: “Kizizi ya Kristo.”
^ To: “Pots.”
^ To: “Kamunaka.”
^ To: “Bampasi.”
^ Na greke: “dema.”
