Ya zole na Bakorinto 6:1-18
6 Samu beto ke na salaka kintwadi na Nzambi, beto ke na lombaka na beno na kundima ve ntima ya kulutila mbote ya Nzambi mpe na manima kuzimbana mfunu ya yawu.
2 Samu yandi me zonza: “Na ntangu yina vandaka ya kufwanana, mu kuwaka nge, mpe na kilumbu ya kuvuukisa, mu sadisaka nge.” Tala! Yayi ke ntangu ya kulunga yina me fwanana mingi. Tala! Yayi ni kilumbu ya kuvuukisa.
3 Beto ke na salaka ata kima yina ke sala ti bantu bula dibaku samu na beto, samu ba zonzila ve yimbi ya kisalu ya beto.
4 Kasi na bamambu nyonso beto ke lakisaka ti beto ke bisadi ya Nzambi, na kukangaka ntima na bamambu mingi, na kati ya bankwamusu, na ntangu ya kukondwa bima, na bantangu ya mpasi,
5 na ntangu ba ke bulaka beto, na ntangu ba ke tulaka beto na boloko, na ntangu ya muvusu, ya bisalu ya ngolo, na bampimpa yina pongi kele ve, na bantangu yina madya kele ve,
6 na bunkete, na nzayilu, na ntima ya yinda, na bumbote, na mpeve ya santu, na luzolo yina ke ve na luvunu,
7 na nzonzolo ya tsyeleka, na ngolo ya Nzambi, na nzila ya binwanunu ya lunungu* ya diboko ya bakala* mpe ya diboko ya kento,*
8 na nzila ya nkembo mpe ya nsoni, na nzila ya nkumbu ya yimbi mpe ya mbote,* ba ke talaka beto mutindu bantu ya luvunu, kasi beto ke zonzaka matsyeleka.
9 Mutindu bantu yina me zabana ve, kasi beto ke ya kuzabana. Mutindu bantu yina ke na kufwaka,* kasi tala! beto ke moyo. Mutindu bantu yina ba me pesa masembo, kasi ba me kufwa ve beto.
10 Mutindu bantu yina ke na mawa, kasi beto ke ntangu nyonso na kilengi. Mutindu bamputu,* kasi beto ke na kumisaka bantu mingi bamvwama. Mutindu bantu yina ke na ata kima, kasi beto ke na bima nyonso.
11 Bampangi ya Korinto, beto me fungula bayinwa ya beto samu na kuzonza na beno pwelele, mpe beto me fungula nene bantima ya beto.
12 Beto ke na lakisaka ve beno luzolo ya ndambu, kasi beno, beno ke na lakisaka ve beto luzolo nyonso yina beno me fwana kulakisa beto.
13 Ni na yawu, mu ke na zonzaka na beno mutindu mu ke na zonzaka na bana ya munu, beno mpe beno fungula nene bantima ya beno.
14 Beno kuvukana ve na bantu yina ke kwikilaka ve. Wapi kiwisa ke na kati ya mambu ya lunungu* na mambu ya kufwa Musiku? To wapi kiwisa ke na kati ya nsemo na mpimpa?
15 Wapi bumosi ke na kati ya Kristo na Beliale?* To yinki muntu yina ke mundimi* ke na yawu ya faso mosi na muntu yina ke ve mundimi?
16 Mpe wapi bumosi ke na kati ya tempelo ya Nzambi na biteki? Beto ke tempelo ya Nzambi ya moyo. Kaka mutindu Nzambi zonzaka yawu: “Mu ke zinga na kati ya bawu, mu ke tambula na kati ya bawu, mu ke vanda Nzambi ya bawu, mpe ba ke vanda dikanda ya munu.”
17 Yehova me zonza: “‘Ni na yawu beno basika na kati ya bawu mpe beno vanda ntama na bawu, beno kusimba dyaka ve kima ya mvindu mpe mu ke yamba beno.’”
18 Yehova Muntu ya Ngolo-Nyonso me zonza dyaka: “‘Mu ke kuma tata samu na beno, mpe beno ke kuma bana ya munu ya babakala mpe ya bakento.’”
Banote
^ To: “Ludedomo.”
^ Ya lenda vanda samu na kubumba nzutu.
^ Ya lenda vanda samu na kubumba nzutu.
^ To: “Ntangu ba ke zonzilaka yimbi to mbote ya nkumbu ya beto.”
^ To: “Mutindu bantu yina me lunga kufwa.”
^ To: “Ba Pauvres.”
^ To: “Kudedama.”
^ Na ndinga ya Ki-Ebre ya zola zonza “Muntu ya mpamba.” Ba ke sadilaka yawu samu na kuzonzila Satana.
^ To: “Muntu yina ke kwikilaka.”
