Ya zole na Bakorinto 7:1-16
7 Ni na yawu, bampangi ya munu yina mu ke zolaka mingi, samu beto ke na nsilulu yayi, bika beto sukula banzutu ya beto na mvindu nyonso ya musuni mpe ya mpeve. Beto lakisa ti beto ke na boma ya Nzambi samu busantu ya beto kuma ya kulunga.
2 Beno yidikila beto kisika na bantima ya beno. Beto me sala ata muntu mambu ya yimbi, beto me bebisa ata muntu, beto me vuna ata muntu samu na mbote ya beto.
3 Mu ke na zonzaka ve yawu samu na kuzonzila yimbi ya beno. Mutindu mu zonzaka ntete yawu, beno ke na kati ya bantima ya beto samu na kufwa kintwadi na beto mpe kuzinga kintwadi na beto.
4 Mu ke na zonzilaka beno pwelele, mu ke na kilengi mingi samu na beno. Mu ke ya kufuluka na bukindi, mpe nsayi ya munu ke ya kulutila na kati ya bampasi nyonso yina beto ke na kutanaka.
5 Ya tsyeleka, ntangu beto kumaka na Masedwane, banzutu* ya beto pemaka ve, samu ba bikaka ve kunyokola beto na mitindu nyonso. Ya vandaka na bamvita na ngaanda, mpe boma na kati.
6 Kasi Nzambi yina ke pesaka bantu yina ke ya kulemba ngolo, pesaka beto ngolo ntangu Tite kwizaka.
7 Kaka ve ntangu Tite kwizaka, kasi mpe na nzila ya bukindi yina yandi kuzwaka na beno. Yandi natinaka beto bansangu ya beno, ti beno ke na nsatu ya ngolo ya kutala dyaka munu, nsangu ya mawa ya beno mpe dikebi ya tsyeleka* yina beno ke na yawu samu na munu. Nyonso yayi me pesa dyaka munu kilengi ya kulutila.
8 Ata ti mambu yina mu sonikaka pesaka beno mawa, ya me nyongisa ve munu. Ata ti ya nyongisaka ntete munu (samu mukanda yayi pesaka beno mawa, kasi ya vandaka kaka samu na ntangu fioti),
9 ntangu yayi mu ke na kilengi, ya ke ve samu mukanda yayi me pesa beno mawa, kasi samu mawa yina me nata beno na kubalula bantima. Samu mawa yina vandaka na beno vandaka mawa yina katukaka na Nzambi, ni na yawu mambu ya mpasi kuminaka ve beno samu na beto.
10 Samu, mawa yina ke katukaka na Nzambi ke nataka na kubalula ntima, ke vuukisaka mpe ke vandaka ve na manyongi. Kasi mawa ya yinza ke nataka na lufwa.
11 Beno tala yina bangolo ya beno me nata samu beno me vanda na mawa yina ke katukaka na Nzambi. Ee, beno me kumisa beno mosi bunkete, beno me yiina mambu ya yimbi, beno me vanda na boma ya Nzambi, beno me vanda na nsatu ya ngolo ya kubalula bantima, beno me lakisa tiya, beno me sungika mambu ya yimbi. Na mambu nyonso, beno lakisaka ti beno ke bantu ya kuvedila na mambu yayi.
12 Kana mu me sonikila beno, mu me sala ve yawu samu na muntu yina me sala mambu ya yimbi, to samu na muntu yina ba me sala mambu ya yimbi. Kasi ya ke samu ti bangolo ya beno samu na beto talana pwelele na kati-kati ya beno na meso ya Nzambi.
13 Ni na yawu beto kuzwaka bukindi.
Beto kuzwaka ve kaka bukindi kasi beto vandaka mpe ya kufuluka na kilengi ntangu beto talaka kilengi ya Tite, samu beno nyonso, beno kindisaka yandi.
14 Kana mu bulaka ntulu na mantwala ya yandi samu na beno, ya pesaka ve munu nsoni. Kasi, kaka mutindu bamambu nyonso yina beto zonzilaka beno vandaka ya tsyeleka, kubula ntulu yina beto bulaka samu na Tite, talanaka ya tsyeleka.
15 Dyaka, luzolo ya ngolo yina Tite ke na yawu samu na beno, ke kulaka dyaka ntangu yandi ke bambukaka kutumama ya beno nyonso, mutindu beno yambaka yandi na boma mpe na buzitu mingi.
16 Mu ke na kilengi samu ti na mambu nyonso, mu lenda tula beno ntima.*
Banote
^ Na Greke: “musuni.”
^ Na Greke: “tiya.”
^ To ya lenda vanda: “Mu lenda kuvanda na bukindi samu na beno.”
