Ya zole na Bakorinto 8:1-24
8 Ntangu yayi bampangi, beto zola beno zaba mambu yina me tadila ntima ya kulutila mbote ya Nzambi, yina yandi lakisaka na kimvuka ya Masedwane.
2 Ntangu bampangi yayi vandaka na mpasi samu na nkwamusu mosi ya ngolo, kilengi ya bawu ya kulutila mpe bumputu* ya ngolo yina vandaka na bawu, salaka ti ba lakisa na faso ya kulutila kifu ya bawu ya kukabula.
3 Ba pesaka yina ba vandaka na ngolo ya kupesa. Ya tsyeleka, mu lenda zonza na beno ti ba pesaka ya kulutila bima yina ba vandaka na yawu.
4 Na luzolo ya bawu mosi, ba tatamanaka na kubondila beto samu na kuvanda na bweso ya kupesa dikabu, mpe ya kutula diboko na kisalu yayi ya kusadisa basantu.
5 Ba pesaka bima mingi kulutila yina beto vanda vingila. Ntete-ntete ba sadilaka Mfumu na ntima ya bawu nyonso, mpe ba sadilaka beto na mutindu yina ke ya kukwelana na luzolo ya Nzambi.
6 Na yawu beto ke na lombaka na Tite na kuvutuka samu na kuyonzika* makabu yina beno ke na pesaka na ntima mosi, samu ni yandi muntu bandaka kusala yawu na kati ya beno.
7 Kasi kaka mutindu beno ke ya kufuluka na mambu nyonso, na kiminu, na kuzonza, na nzayilu, na nsatu ya ngolo ya kusala mingi, mpe na luzolo ya beno samu na beto. Bika ti beno fuluka na kifu ya kupesaka na luzolo nyonso.
8 Mu ke na zonzaka ve mambu yayi samu na kupesa beno musiku, kasi samu na kusadisa beno, na kuzaba mutindu bantu ya nkaka ke na salaka bangolo samu na kusala mingi, mpe samu na kumeka luzolo ya beno kana ya ke ya tsyeleka.
9 Beno me zaba ntima ya kulutila mbote ya Mfumu ya beto Yesu Kristo. Ata ti yandi vandaka mvwama, yandi kumaka mputu* samu na mbote ya beno. Samu beno kuma bamvwama na nzila ya bumputu ya yandi.
10 Mu ke na pesaka dikanisi ya munu na mambu yayi. Ya ke samu na mbote ya beno, samu mvula mosi me luta yina beno bandaka ve kaka kisalu yayi, kasi beno lakisaka mpe nsatu ya ngolo ya kusala yawu.
11 Na yawu ntangu yayi, beno manisa mpe kisalu yina beno bandaka kusala, samu nsatu ya beno ya kusala bamambu vanda ya kulunga, na kutadilaka bima yina beno ke na yawu.
12 Ntangu muntu ke vandaka na nsatu ya kusala kima, Nzambi ke ndimaka dikabu yina yandi ke salaka na kutadilaka bima yina yandi ke na yawu, kasi ve na kutadilaka bima yina yandi ke ve na yawu.
13 Mu ke ve na nsatu ya kusala ti bamambu vanda pete samu na bantu ya nkaka, kasi mpasi samu na beno.
14 Kasi mu zola ti bima yina beno ke na yawu mingi ntangu yayi, lungisa bansatu ya bawu, samu bima yina ba ke na yawu mingi lungisa mpe bansatu ya beno. Na mutindu yina, beno nyonso ke vanda faso mosi.
15 Kaka mutindu ya ke ya kusonama: “Muntu yina vandaka na bima mingi, vandaka ve na yawu ya kulutila, mpe muntu yina vandaka na bima fioti vandaka ve na yawu fioti ya kulutila.”
16 Ni na yawu, beto ke vutulaka Nzambi matondo samu Tite ke tulaka beno dikebi, kaka mutindu beto mpe ke tulaka beno dikebi.
17 Samu yandi ndimaka mambu yina beto zonzaka na yandi, kasi yandi vandaka mpe na nsatu ya ngolo ya kusala mambu yina beto lombaka na yandi. Na yawu yandi bakaka mukanu ya kukwiza na beno yandi mosi.
18 Beto ke na filisaka kintwadi na yandi, mpangi yina bimvuka nyonso ke budilaka maboko na kisalu yina yandi ke na lungisaka samu na nsangu ya mbote.
19 Kaka yina ve, kasi ni bimvuka soolaka yandi na kukwenda na beto samu yandi sadisa beto na kukabula bima yina beto lokotaka. Bima yayi, beto ke kabula yawu samu ya pesa nkembo na Mfumu. Na kusalaka yawu, beto ke lakisa ti beto ke ya kubongama samu na kusadisa bampangi.
20 Na mutindu yina beto ke sala ti ata muntu zonzila mambu ya yimbi na nkumbu ya beto, samu na bima yayi yina beno ke na kabulaka.
21 Samu beto ke salaka bangolo na kusala mambu nyonso na kukwikama, kaka na meso ya Yehova ve, kasi mpe na meso ya bantu.
22 Dyaka, beto ke na filisaka nzila mosi na bawu, mpangi ya beto yina beto mekaka bambala mingi mpe yina lakisaka ti yandi ke salaka nyonso yina yandi ke na ngolo ya kusala na mambu mingi. Kasi ntangu yayi, nsatu ya yandi ya kusadisa me kuma dyaka ngolo mingi samu yandi ke tulaka ntima ya yandi nyonso na beno.
23 Kana kyuvu kele samu na Tite, yandi ke ndiku ya munu mpe mpangi ya munu ya kisalu samu na mbote ya beno. To kana byuvu kele samu na bampangi ya beto, ba ke bantumwa ya bimvuka mpe nkembo ya Kristo.
24 Na yawu, beno lakisa bantu yayi ti beno ke zolaka bawu, mpe beno lakisa na bimvuka samu na yinki beto bulaka ntulu samu na beno.
