Ya zole na Bakorinto 9:1-15
9 Ntangu yayi na yina me tadila kisalu ya basantu, ya ke kwandi ve mfunu mu sonikila beno,
2 samu mu zaba nsatu ya beno ya ngolo ya kusala bamambu mpe mu ke na zonzilaka yawu na kilengi nyonso na bantu ya Masedwane, ti ntangu yayi, Akayi ke ya kubongama katuka mvula mosi, mpe tiya ya beno me vumbula mingi na kati ya bawu.
3 Mu ke na filisaka bampangi, samu kubula ntulu ya beto na faso beno me yidika bamambu samu na kusadisa vanda ve ya mpamba, mpe samu beno vanda ya kubongama kaka mutindu mu zonzaka yawu.
4 Kasi kana bantu ya Masedwane kwiza na munu mpe beto kwiza kutana beno kele ve ya kuyidama, beto (samu na kuzonza ve beno) ke kufwa nsoni samu beto me tula beno ntima.
5 Ni na yawu mu me kwiza tala ti ya ke vanda mfunu na kulomba na bampangi na kutekila kukwiza na beno mpe kuyidika dikabu yina beno zonzaka ti beno ke pesa tekila beto kwiza. Samu ya vanda ya kuyidama mpe ya vanda dikabu yina ba me pesa na ntima ya mbote, kasi ve mutindu bima yina ba me baka na ngolo.
6 Na mambu yayi, muntu yina ke kundaka bambuma ndambu ke kuzwaka mpe bambuma ndambu. Kasi muntu yina ke kundaka bambuma mingi ke kuzwaka mpe bambuma mingi.
7 Bika ti konso muntu sala mutindu yandi me kanisa na ntima ya yandi, na bantima zole ve* to samu ba me tumisa yandi na kusala yawu, samu Nzambi ke zolaka muntu yina ke pesaka na kilengi.
8 Nzambi lenda sala ti ntima ya yandi ya kulutila mbote vanda na beno samu na mambu nyonso. Beno vanda ntangu nyonso na yina beno ke na yawu nsatu, mpe beno vanda na bima mingi samu na bisalu nyonso ya mbote.
9 (Kaka mutindu ya ke ya kusonama: “Yandi me kabula bima mingi. Yandi me pesa na bamputu. Lunungu* ya yandi ke vanda ntangu nyonso.”
10 Muntu yina ke pesaka bima ya kukunda ya kulutila na muntu yina ke kundaka, mpe yina ke pesaka mampa ya kudya, ke pesa beno bima ya kukunda samu beno kunda, yandi ke kumisa yawu mingi, mpe yandi ke kumisa mingi bambuma ya lunungu* ya beno.)
11 Na mambu nyonso beno ke na kuzwaka balusakumunu samu beno ke lakisaka kifu ya kukabula na mitindu nyonso. Kifu yayi ke na salaka ti na nzila ya beto Nzambi kuzwa matondo.
12 Samu, kisalu yayi yina beno ke na salaka ke ve kaka samu na kulungisa bansatu ya basantu na faso ya mbote, kasi mpe samu ya nata bantu mingi na kuvutula Nzambi matondo.
13 Na kupesaka dikabu yayi, beno ke lakisa mutindu ya bantu beno kele, mpe ba ke pesa Nzambi nkembo samu ti mambu yina beno ke na salaka, ke na bumosi na nsangu ya mbote yina beno ke zonzaka na yina me tadila Kristo, mpe beno ke pesaka bawu mpe bantu nyonso makabu na luzolo nyonso.
14 Ba ke zolaka beno, mpe ba ke bondilaka Nzambi samu na beno, samu na ntima ya kulutila mbote ya Nzambi yina ke na beno.
15 Bika beto vutula Nzambi matondo samu na dikabu ya ofele yina yandi me pesa beto, dikabu yina ke kitoko mingi na kuzonzila.
