Ya zole na Batesalonika 1:1-12
1 Yayi mukanda me katuka na Polo, na Silvanuse,* mpe na Timote, samu na kimvuka ya Batesalonika yina ke na bumosi na Nzambi Tata ya beto mpe na Mfumu Yesu Kristo:
2 Bika ti ntima ya kulutila mbote mpe kizunu ya Nzambi Tata mpe ya Mfumu Yesu Kristo vanda na beno.
3 Bampangi, beto me fwana kuvutula Nzambi matondo ntangu nyonso samu na beno. Ya me lunga beto sala yawu, samu kiminu ya beno ke na kulaka, mpe samu luzolo yina beno ke na yawu samu na bampangi ke na kulaka.
4 Na yawu, beto ke bulaka ntulu samu na beno na kati ya bimvuka ya Nzambi, samu beno ke kangaka ntima mpe ke na kiminu na kati ya bankwamusu mpe bampasi nyonso yina beno ke kutanaka na yawu.
5 Ya ke kidimbu yina ke na lakisaka ti Nzambi ke sambisaka na lunungu, mpe ya ke salaka ti Nzambi tala ti beno me fwana kukota na Kimfumu ya yandi yina beno ke talaka mpasi mingi.
6 Samu Nzambi ke Nzambi ya lunungu,* yandi ke talisa mpasi ba yina ke na talisaka beno mpasi.
7 Kasi beno bantu yina ke talaka mpasi, Nzambi ke bomba beno na beto ntangu Mfumu Yesu ke talana na zulu na bambazi ya yandi ya ngolo,
8 na kati ya tiya ya nene samu na kuvutula yimbi na ba yina zaba ve Nzambi, mpe na ba yina ke tumamaka ve na nsangu ya mbote ya Mfumu ya beto Yesu.
9 Kitumbu yina ba ke kuzwa ke vanda lufwa ya ntangu nyonso. Na yawu, ba ke vanda dyaka ve na mantwala ya yandi mpe ya nkembo ya yandi ya ngolo.
10 Ntangu Mfumu ke kwiza samu na kubaka nkembo kintwadi na bampangi ya yandi basantu, bantu nyonso yina ke na kiminu na yandi ke vanda na kilengi, mpe samu beno ndimaka bamambu yina beto zonzaka na beno, beno ke vanda mpe na yandi.
11 Ni na yawu, beto ke sambilaka ntangu nyonso samu na beno, samu Nzambi ya beto bakila beno mutindu bantu yina yandi me lunga kubokila. Mpe na ngolo ya yandi, yandi lungisa mambu nyonso ya mbote yina yandi zola mpe bisalu nyonso ya kiminu.
12 Ya ke mutindu yina samu nkumbu ya Mfumu ya beto Yesu kuzwa nkembo, mpe beno kuzwa nkembo kintwadi na yandi, na yina me tadila ntima ya kulutila mbote ya Nzambi ya beto mpe ya Mfumu Yesu Kristo.
