Ya zole na Batesalonika 2:1-17
2 Kasi bampangi, na yina me tadila kwizulu ya Mfumu ya beto Yesu Kristo mpe kuvukana ya beto na yandi, beto ke na lombaka beno
2 na kubika ve mabanza ya beno kuma kidi-kidi na mbangu, mpe beno kuvanda ve na boma na bansangu yina ke talana mutindu ya me katuka na Nzambi, ya vanda na nzonzolo to na mikanda yina ke na talanaka mutindu ya me katuka na beto, yina ke zonza ti kilumbu ya Yehova me kuma pene-pene.
3 Ata muntu mosi ve kuvuna* beno na konso mutindu, samu kilumbu yango ke kwiza ntete ve tekila muntu yina ke pesa mukongo na Nzambi kuma, mpe ti bantu yina ke vwezaka misiku talana, mwana ya lufwa.
4 Yandi ke mbeni mpe yandi ke na zulu ya muntu nyonso yina ba ke bokilaka nzambi, to ya kima nyonso yina ba ke sambilaka. Ni na yawu yandi ke ya kuvanda na tempelo ya Nzambi mpe yandi mosi ke talanaka na meso ya bantu ti yandi ke nzambi.
5 Beno ke na zabaka dyaka ve ti ntangu mu vandaka na beno mu zonzilaka beno bamambu yayi?
6 Kasi ntangu yayi beno me zaba yinki ke na kangaka yandi nzila. Na yawu, yandi ke talana kaka na ntangu ya yandi.
7 Ya tsyeleka mambu ya yimbi ya muntu yayi yina ke ya kubumbana ke na salaka kisalu, kasi mambu ya yimbi yayi ke vanda ya kubumbana tii ntangu muntu yina ke na bumbaka yawu ke vanda dyaka ve.
8 Na ntangu yina, muntu yina ke vwezaka musiku ke talana, Mfumu Yesu ke kufwa yandi na lubakusu ya mpeve ya yinwa ya yandi, mpe ke kumisa yandi kima ya mpamba na ntangu yina kuvanda* ya Mfumu ke talana pwelele.
9 Kuvanda ya muntu yina ke vwezaka misiku ke bisalu ya Satana na mitindu nyonso ya bimangu mpe bidimbu ya luvunu mpe bamambu ya kuyituka,
10 mpe mambu nyonso ya kukondwa lunungu, mpe ya luvunu ya bantu yina ba ke kufwa. Ba ke kuzwa kitumbu ya lufwa samu ba ndimaka ve matsyeleka, mpe ba zolaka ve yawu. Kana ba salaka yawu, ba zola vuuka.
11 Ni yawu yina, Nzambi ke bika ti ngolo mosi ya luvunu vuna bawu, samu ba ndima mambu ya luvunu.
12 Na mutindu yina, ba ke sambisa bawu nyonso samu ba ndimaka ve matsyeleka, kasi ba kuzwaka kilengi na mambu ya kukondwa lunungu.
13 Kasi beto me fwana kuvutula ntangu nyonso matondo na Nzambi samu na beno, bampangi yina Yehova ke zolaka. Samu katuka mbandukulu Nzambi soolaka beno samu na kuvuuka, na kukumisaka beno santu na nzila ya mpeve ya yandi mpe na nzila ya kiminu ya beno na matsyeleka.
14 Yandi bokilaka beno na mambu yayi, na nzila ya nsangu ya mbote yina beto ke na zonzilaka, samu beno kuzwa nkembo ya Mfumu ya beto Yesu Kristo.
15 Na yawu bampangi, beno vanda ya kusikama mpe beno tatamana na kuvanda ya kukangama na bamambu yina ba longaka beno, ya vanda na nzila ya yinwa to ya mukanda yina katukaka na beto.
16 Dyaka, bika ti Mfumu Yesu Kristo yandi mosi mpe Nzambi Tata ya beto yina zolaka beto, mpe ke pesaka beto ngolo na mutindu yina ke ve na nsuka na kivuvu ya mbote na nzila ya ntima ya kulutila mbote,
17 kubomba bantima ya beno mpe kukumisa beno ngolo samu ntangu nyonso beno zonza mpe beno sala mambu ya mbote.
