Ya zole na Batesalonika 3:1-18
3 Bampangi, samu na kumanisa, beno tatamana na kusambila samu na beto, samu mambu ya Yehova tatamana na kumwangana na mbangu mpe kuzwa nkembo kaka mutindu ya salamaka na sika ya beno,
2 mpe beto vuuka na maboko ya bantu yina ke talisaka mpasi mpe ya bantu ya yimbi, samu bantu nyonso ve ke vandaka na kiminu.
3 Kasi Mfumu ke ya kukwikama. Yandi ke pesa beno ngolo mpe ke bumba beno na muntu ya yimbi.
4 Dyaka, beto ke tulaka ntima na Mfumu samu na beno ti beno ke zitisa mpe ke tatamana na kusala bamambu yina beto longaka beno.
5 Bika Mfumu tatamana kutwadisa bantima ya beno samu beno zola Nzambi mpe beno kanga ntima samu na Kristo.
6 Ntangu yayi bampangi, na nzila ya Mfumu Yesu Kristo, beto ke na zonzaka na beno ti beno vanda ntama na konso mpangi yina ke tambulaka na mutindu ya kidi-kidi mpe na mutindu yina ke ve ya kukwelana na malongi yina beno* kuzwaka na sika ya beto.
7 Beno mosi me zaba yinki beno me fwana kusala samu na kulanda kifwani ya beto, samu beto me dyatila ve na mutindu ya kidi-kidi na kati ya beno.
8 Beto me kudya mpe ve madya ya muntu ya ofele.* Kasi mpimpa na ntangu beto salaka kisalu ya ngolo yina ke lembisaka, samu beto vanda ve kilo ya nene samu na ata muntu mosi na kati ya beno.
9 Ya ke ve ti beto ke ve na muswa ya kuzwa lubakusu ya beno, kasi beto salaka mutindu yina samu beto vanda kifwani yina beno fwana kulanda.
10 Ya tsyeleka, ntangu beto vandaka na beno, beto vanda zonzilaka beno ti kana muntu zola ve kusala, yandi kudya mpe ve.
11 Kasi beto ke na kuwaka ti bantu ya nkaka na kati ya beno ke tambulaka na mutindu ya kidi-kidi, ti ba ke na salaka ata fioti ve kisalu, kasi ba ke na kotaka na bamambu ya ngana.
12 Na bantu yina, beto ke na pesaka musiku mpe beto ke na lombaka na nkumbu ya Yesu Kristo ti ba fwana kusala kisalu na kizunu, mpe ba kudya madya yina bawu mosi me sala.
13 Kasi beno bampangi, beno bika ve kusala mambu ya mbote.
14 Kana muntu ke na tumamaka ve na bamambu yina beto me sonika na mukanda yayi, beno tala mbote-mbote ya kele nani, mpe beno kuvukana ve kintwadi na yandi samu yandi kufwa nsoni.
15 Beno kubakila ve yandi mutindu mbeni, kasi beno tatamana na kukebisa yandi mutindu mpangi.
16 Bika ti Mfumu ya kizunu yandi mosi pesa beno kizunu ntangu nyonso, na mutindu nyonso. Bika ti Mfumu vanda na beno nyonso.
17 Yayi mbote ya munu Polo yina mu me sonika na diboko ya munu mosi. Ya ke kidimbu ya munu na konso mukanda. Yayi ni mutindu mu ke sonikaka.
18 Bika ti ntima ya kulutila mbote ya Mfumu ya beto Yesu Kristo vanda na beno nyonso.
