Ya zole na Timote 1:1-18
1 Munu Polo, ntumwa ya Kristo Yesu na luzolo ya Nzambi, na yina me tadila nsilulu ya luzingu yina ke lungana na nzila ya Kristo Yesu,
2 na Timote mwana ya munu yina mu ke zolaka mingi:
Bika ti ntima ya kulutila mbote, mawa mpe kizunu ya Nzambi Tata mpe ya Kristo Yesu mfumu ya beto vanda na nge.
3 Mu ke na vutulaka matondo na Nzambi yina mu ke sadilaka kisalu ya santu, mutindu bankooko ya munu vanda salaka yawu. Na kimuntu ya kati ya bunkete, mu ke bambukilaka nge moyo ntangu nyonso ntangu mu ke bondilaka Nzambi mpimpa na ntangu.
4 Mu ke na bambukaka moyo na mansangasa ya nge mpe mu ke na nsatu ya kulutila ya kutala dyaka nge samu mu vanda ya kufuluka na kilengi.
5 Mu ke na bambukilaka moyo na kiminu ya nge ya tsyeleka, yina vandaka ntete na nkooko ya nge Loyise mpe na mama ya nge Enice mpe yina mu ke na kiminu ti ya kele mpe na nge.
6 Ni na yawu, mu ke na kubambulaka nge na kuvumbula mutindu tiya, dikabu ya Nzambi yina kele na nge mpe yina nge kuzwaka ntangu mu tulaka maboko na zulu ya nge.
7 Nzambi pesaka ve beto mpeve ya boma, kasi mpeve ya ngolo mpe ya luzolo mpe ya makanisi ya mbote.
8 Kuvanda ve na nsoni ya kuzonzila kimbangi ya Mfumu ya beto to ya munu, muntu yina ke na boloko samu na yandi. Kasi ndima kutala mpasi samu na nsangu ya mbote na kutulaka ntima na ngolo ya Nzambi.
9 Yandi vuukisaka beto mpe yandi bokilaka beto na kubokila mosi ya santu, ya vandaka ve samu na bisalu ya beto, kasi samu na mukanu ya yandi mpe ya ntima ya kulutila mbote ya yandi. Yandi pesaka beto yawu na bumosi na Kristo Yesu tekila bantangu ya kulutila ntama.
10 Kasi, ntangu yayi yandi me lakisa yawu pwelele na nzila ya kutalana ya mvuukisi ya beto Kristo Yesu, yina me katula lufwa mpe yina me lakisa beto na nzila ya nsangu ya mbote mutindu ya kuvanda na luzingu mpe na nzutu yina ke bolaka ve.
11 Nzambi me soola munu na kuvanda musamuni, ntumwa mpe mulongi.
12 Ni na yawu, munu mpe ke na talaka mpasi na bamambu yayi, kasi mu ke ve na nsoni samu mu zaba Muntu yina mu ke kwikilaka na yandi mpe mu ke na kundima ti yandi ke na makoki ya kubumba bima yina mu bumbaka na sika ya yandi tii na kilumbu yina.
13 Tatamana na kusimba kifwani ya mambu ya mbote yina nge kuwaka na sika ya munu na kiminu mpe luzolo yina ke katukaka na bumosi na Kristo Yesu.
14 Bumba mbote bima ya ntalu yina nge me kuzwa na nzila ya mpeve ya santu yina ke zingaka na kati ya beto.
15 Nge zaba ti, babakala nyonso ya kizunga ya Aziya me pesa munu mukongo, na kati ya bawu ke mpe na Figele na Ermozene.
16 Bika ti Mfumu lakisa ntima ya mawa na yinzo ya Onezifore samu bambala mingi yandi kindisaka munu mpe yandi vandaka ve na nsoni ya munu samu mu vandaka na boloko.
17 Kasi, ntangu yandi vandaka na Roma, yandi sosaka munu mbote-mbote mpe yandi talaka munu.
18 Bika ti Mfumu kupesa yandi nzila samu Yehova lakisa yandi ntima ya mawa na kilumbu yina. Nge zaba mbote bisalu nyonso yina yandi salaka na Efeze.
