Ya zole na Timote 2:1-26
2 Na yawu, nge mwana ya munu, tatamana na kuzwa ngolo na nzila ya ntima ya kulutila mbote yina kele na Kristo Yesu,
2 mpe bamambu yina nge kuwaka na sika ya munu, yina bambangi mingi mpe ke zonzilaka. Bamambu yayi zonza yawu na bantu ya kukwikama yina bawu mpe na ntangu ya bawu, ke vanda ya kubongama samu na kulonga bantu ya nkaka.
3 Samu nge ke soda ya mbote ya Kristo Yesu, vanda ya kuyidama samu na kutala mpasi.
4 Muntu yina me kuma soda ke salaka ve kisalu ya nkaka* samu na kusosa luzingu, samu yandi ke na nsatu ya kusepelisa muntu yina salaka ti yandi kuma soda.
5 Ata na bansaka, muntu yina ke salaka yawu, ke kuzwaka difuta kaka kana yandi me sala yawu na kulandaka misiku.
6 Muntu yina ke salaka kisalu ya ngolo na bilanga, fwana kuvanda muntu ya ntete na kuzwa bambuma.
7 Kanisa ntangu nyonso na mambu yayi mu ke na zonzaka, Mfumu ke pesa nge mayela ya kubakula bamambu nyonso.
8 Kuzimbana ve ti ba vumbulaka Yesu Kristo na lufwa mpe yandi vandaka mutekolo ya Davidi* na bumosi na nsangu ya mbote yina mu ke na samunaka.
9 Samu na yawu, mu ke na talaka mpasi mpe ke na boloko mutindu muntu yina ke salaka yimbi. Kasi dyambu ya Nzambi ke ve ya kukangama.
10 Ni na yawu, mu ke na tatamanaka na kukanga ntima na mambu nyonso samu na ba yina ba soolaka, samu bawu mpe ba kuzwa mvuukulu yina ke na nzila ya Kristo Yesu na nkembo ya ntangu nyonso.
11 Ba me fwana kutula ntima na mambu yayi: Ya tsyeleka kana beto kufwaka kintwadi, beto ke zinga mpe kintwadi.
12 Kana beto tatamana na kukanga ntima, beto ke yala mpe kintwadi mutindu bamfumu. Kana beto manga yandi, yandi ke manga mpe beto.
13 Kana beto kele ve ya kukwikama, yandi ke bikana ya kukwikama, samu yandi lenda vanda ve mambu nyonso ya nkaka katula yina yandi kele.
14 Tatamana na kubambula bawu bamambu yayi, longa bawu* na mantwala ya Nzambi na kunwana ve samu na bampova.* Ya ke ata fioti ve mfunu samu ya ke salaka mpasi na ba yina ke na kuwaka.
15 Sala nyonso yina ke na ngolo ya nge na kutalana na mantwala ya Nzambi mutindu muntu yina yandi ke ndimaka, bakala ya kisalu yina ke na ata mambu ya kuvanda na nsoni, muntu yina ke longaka mpe ke zonzilaka mbote-mbote dyambu ya tsyeleka.
16 Kasi losa banzonzolo ya mpamba yina ke vwezaka mambu ya santu, samu ya ke nataka na kuvweza Nzambi na mutindu ya kulutila,
17 mpe mambu yina ba ke zonzaka ke mwanganaka mutindu mputa yina ke na kudyaka nzutu. Imene na Filete ke na kati ya bawu.
18 Babakala yayi me bika matsyeleka, ba ke na zonzaka ti vumbukulu ya bantu ya kufwa salamaka yimeni, mpe ba ke na salaka ti bantu ya nkaka vanda dyaka ve ya kukwikama na kiminu.
19 Ata mutindu yina, fondasio ya ngolo ya Nzambi ke kaka ya kutelama, mpe ya ke na kidimbu yayi: “Yehova me zaba bantu ya yandi,” mpe “Bika ti konso muntu yina ke bokilaka nkumbu ya Yehova kubika mambu ya kukondwa lunungu.”
20 Na yinzo ya nene ya ke vandaka ve kaka na bandonga ya wolo mpe ya arza, kasi ya ke vandaka mpe na bandonga ya mabaya mpe ya ntoto. Ba ya nkaka ke samu na nsalulu ya mfunu, kasi ba ya nkaka ke samu na nsalulu ya kukondwa mfunu.
21 Ni yawu yina, kana muntu vanda ntama na bandonga yina ke samu na nsalulu ya kukondwa mfunu, yandi ke vanda ndonga samu na nsalulu ya mfunu, yina ba me kumisa santu, yina ke mfunu samu na mfumu ya yawu, yina ba me bongisa samu na konso kisalu ya mbote.
22 Kima bansatu ya buntwenya, kasi landa lunungu, kiminu, luzolo, kizunu, kintwadi na bantu yina ke bokilaka Mfumu na ntima ya bunkete.
23 Dyaka, losa bantembe ya buzoba mpe ya kukondwa mfunu samu nge zaba ti ya ke nataka na kunwana.
24 Samu, kisadi ya Mfumu ke ve na nsatu ya kunwana, kasi yandi fwana kuvanda ya kulembama na bantu nyonso, na makoki ya kulonga mpe yina zaba kukutika nzutu kana ba me sala yandi mambu ya yimbi.
25 Yandi fwana kulonga na lembami bantu yina ke mangaka kuwa yandi. Ntangu ya nkaka, Nzambi lenda pesa bawu nzila ya kubalula ntima mpe ya ke sadisa bawu na kuzaba mbote-mbote matsyeleka,
26 mpe ba lenda kuvutukila mabanza ya bawu mpe kukima mutambu ya Dyabulu yina me kanga bawu ya moyo samu ba sala luzolo ya yandi.
Banote
^ To ya lenda vanda: “Bisalu ya bilumbu nyonso.”
^ Na Greke: “Mbuma ya Davidi.”
^ Na Greke: “Pesa bawu kimbangi mbote-mbote.”
^ To: “Mots.”
