Ya zole na Timote 3:1-17
3 Kasi zaba mambu yayi, na bilumbu ya nsuka bamambu ke vanda mpasi mingi mpe luzingu ke vanda mpasi,
2 samu bantu ke kuma bantu yina ke zolaka kaka banzutu ya bawu mosi, bantu yina ke zolaka mbongo, bantu ya lunangu, bantu ya lulendo, bantu yina ke vwezaka Nzambi mpe bantu, bantu yina ke tumamaka ve na bibuti, bantu yina ke vutulaka ve matondo, bantu ya kukondwa kukwikama,
3 bantu yina ke zolaka ve bantu ya nkaka, bantu ya kukondwa kiwisa, bantu yina ke tongaka, bantu yina ke kutikaka ve banzutu ya bawu, bantu yina ke salaka mambu ya yimbi, bantu yina ke zolaka ve mambu ya mbote,
4 bantu yina ke tekaka bampangi, bantu ya yintu ngolo, bantu ya kufuluka na lulendo, bantu yina ke zolaka mikembo na kisika ya kuzola Nzambi,
5 ba ke zonzaka ti ba ke sadilaka Nzambi kasi ba ke lakisaka ve yawu na mutindu ya bawu ya kuzinga. Vanda ntama na bantu ya mutindu yayi.
6 Samu na kati ya bawu ke na babakala yina ke kotaka na bayinzo na mayela ya yimbi mpe ba ke nataka mutindu bangaamba bakento yina ke ve ngolo, yina me fuluka na masumu, mpe yina ke landaka bansatu ya mutindu na mutindu,
7 yina ke longokaka ntangu nyonso kasi ke lendaka ata fioti ve na kuzaba mbote-mbote matsyeleka.
8 Mutindu Zanese na Zambrese teleminaka Moyize, mutindu mosi mpe, ba ke na tatamanaka na kutelemina matsyeleka. Bantu ya mutindu yayi ke ya tsyeleka ya kubeba na mabanza ya bawu, Nzambi ke ndimaka ve bawu samu ba ke dyatilaka ve na mutindu yina ke ya kukwelana na kiminu.
9 Na yawu, ba ke kwenda ve na mantwala, samu buzoba ya bawu me talana pwelele na meso ya bantu nyonso, kaka mutindu ya vandaka samu na babakala zole yayi.
10 Kasi nge me landa mbote-mbote malongi ya munu, mutindu ya munu ya kuzinga, mukanu ya munu, kiminu ya munu, ntima ya munu ya yinda, luzolo ya munu, kukanga ntima ya munu,
11 bankwamusu mpe bampasi ya mutindu yina mu kutanaka na yawu na Antyose, na Ikoniumi, na Listre. Mu kangaka ntima na bankwamusu yayi, mpe Mfumu vuukisaka munu na bankwamusu yango nyonso.
12 Bantu nyonso yina ke zola kuzinga na kukangama na Nzambi na bumosi na Kristo Yesu, ba ke talisa bawu mpe mpasi.
13 Bantu ya yimbi mpe bantu ya luvunu ke sala dyaka yimbi na mutindu ya kulutila, ba ke vuna bantu mpe bantu ke vuna mpe bawu.
14 Kasi nge, kubika ve kukwikila na bamambu yina ba longaka nge mpe yina ba ndimisaka nge, samu nge zaba na banani nge longokaka yawu,
15 mpe ti banda bumwana ya nge, nge me zaba masonoko ya santu yina lenda kumisa nge mayela samu nge vuuka na nzila ya kiminu na Kristo Yesu.
16 Masonoko nyonso ke ya kusonama na lubakusu ya mpeve ya Nzambi, ya ke mfunu samu na kulonga, samu na kungala, samu na kusemba, mpe samu na kusungika muntu na kuzinga na mutindu ya lunungu,*
17 samu muntu ya Nzambi vanda ya tsyeleka ya kubongama mpe ya kukubama samu na konso kisalu ya mbote.
Banote
^ To: “Kudedama.”
