Ya zole na Timote 4:1-22
4 Na mantwala ya Nzambi mpe ya Kristo Yesu yina ke sambisa bantu yina ke moyo mpe bantu ya kufwa, na nzila ya kuvanda* ya yandi mpe ya Kimfumu ya yandi mu ke na zonzaka na nge ti,
2 samuna Dyambu ya Nzambi ntangu nyonso, sala yawu na ntangu ya mbote mpe na ntangu ya mpasi, kebisa mpe kindisa na ntima ya yinda nyonso mpe na mutindu ya mbote ya kulonga.
3 Samu ya ke vanda na ntangu yina bantu ke manga kuwa malongi ya mbote, kasi na mutindu yina ke ya kukwelana na bansatu ya bawu mosi, ba ke sosa milongi yina ke zonzila bawu bamambu yina makutu ya bawu ke na nsatu ya kuwa.
4 Ba ke bika kuwa matsyeleka mpe ke tula dikebi na masolo ya luvunu.
5 Kasi nge, bumba mabanza ya nge na mambu nyonso, kanga ntima na bampasi, sala kisalu ya musamuni,* lungisa mbote-mbote kisalu ya nge.
6 Samu munu, mu me kukipesa mutindu makabu ya malafu yina ba ke tyamunaka mpe ntangu yina mu ke kuzwa kimpwanza me kuma pene-pene.
7 Mu me nwana mvita ya mbote, mu me kima mbangu tii na nsuka, mu me bumba kiminu.
8 Kubanda ntangu yayi, ba me bumbila munu yimpu ya kimfumu ya lunungu,* yina Mfumu, zuzi ya lunungu ke pesa munu mutindu matabisi na kilumbu yina, kaka na munu ve, kasi mpe na bantu nyonso yina ke na vingilaka na nsatu ya ngolo kuvanda* ya yandi.
9 Sala nyonso yina ke na ngolo ya nge na kukwiza kisika yina mu kele na mbangu.
10 Demase bikaka munu samu yandi zolaka bamambu ya yinza* yayi mpe yandi kwendaka na Tesalonika. Kresense kwendaka na Galate mpe Tite kwendaka na Damatiya.
11 Kaka Luke ke na munu. Kwiza kintwadi na Marke samu yandi ke sadisa munu na kisalu.
12 Kasi mu me filisa Tishike na Efeze.
13 Ntangu nge ke kwiza, natina munu kinkuti* ya munu ya madidi yina mu bikaka na Trowase na yinzo ya Karpuse mpe barulo, mingi-mingi yina ba salaka na mpusu ya kibulu.
14 Alezandre yina ke salaka bima ya bisengo salaka munu mambu mingi ya yimbi. Yehova ke futa yandi na kutadilaka bisalu ya yandi.
15 Nge mpe nge fwana kusala keba na yandi, samu yandi teleminaka nsangu ya beto na mutindu mosi ya kulutila.
16 Ntangu mu vanda nwanina nzutu ya munu na mbala ya ntete na mantwala ya luyalu, ata muntu vandaka na lweka ya munu, kasi bawu nyonso bikaka munu. Bika Nzambi lemvokila bawu.
17 Kasi Mfumu vandaka ya kutelama pene-pene na munu mpe yandi pesaka munu ngolo samu na nzila ya munu, kisalu ya kusamuna lungana na faso mosi ya kulutila mpe makanda nyonso kuwa yawu. Mpe Mfumu vuukisaka munu na yinwa ya nkosi.
18 Mfumu ke katula munu na konso kisalu ya yimbi mpe yandi ke vuukisa munu samu na Kimfumu ya yandi ya mazulu. Nkembo kuvanda na yandi mvula na mvula. Ameni.
19 Pesa mbote na Priska na Akila mpe na bantu ya yinzo ya Onezifore.
20 Eraste bikanaka na Korinto, kasi mu bikaka Trofime na Mileti samu yandi vanda beela.
21 Sala nyonso yina ke na ngolo ya nge na kukwiza, tekila ntangu ya madidi ya ngolo banda.
Ebuluse me filisa nge bambote ya yandi, Pudence, Linuse, mpe Klodia na bampangi nyonso ya nkaka me filisa mpe nge bambote.
22 Bika ti Mfumu vanda na mpeve yina beno ke na lakisaka. Bika ti ntima ya kulutila mbote ya yandi vanda na beno.
Banote
^ Tala yina ya zola zonza
^ To: “Tatamana na kusamuna nsangu ya mbote.”
^ To: “Ludedomo.”
^ Tala yina ya zola zonza
^ Tala Yina ya zola zonza
^ Ya lenda vanda: “Kinkuti yina ba vandaka lwataka na banzyetolo samu na kubumba nzutu na madidi to na mipepe ya ngolo.”
