Na Baefeze 1:1-23
1 Ni munu Polo, ntumwa ya Kristo Yesu na luzolo ya Nzambi. Mu ke na sonikaka na basantu yina ke na Efeze mpe yina ke ya kukwikama na bumosi na Kristo Yesu:
2 Bika ti ntima ya kulutila mbote mpe kizunu ya Nzambi Tata ya beto mpe ya Mfumu Yesu Kristo vanda na beno.
3 Nkembo na Nzambi mpe Tata ya Mfumu ya beto Yesu Kristo, samu yandi me sakumuna beto na balusakumunu nyonso ya kimpeve na bisika ya zulu na bumosi na Kristo Yesu.
4 Nzambi soolaka beto samu beto vanda na bumosi na Yesu tekila yandi yidika yinza, samu beto vanda bantu ya santu mpe ya kukondwa mvindu na mantwala ya yandi na kati ya luzolo.
5 Nzambi bakaka mukanu ya kundima beto mutindu bana ya yandi na nzila ya Yesu Kristo, na mutindu yina ke ya kukwelana na kilengi mpe luzolo ya yandi.
6 Na yina, beto kembila yandi samu na bunene ya ntima ya yandi ya kulutila mbote, yina yandi lakisaka beto na nzila ya Mwana ya yandi yina yandi ke zolaka mingi.
7 Na nzila ya yandi, Nzambi sumbaka beto, pesaka beto kimpwanza mpe beto kuzwaka mulemvo ya masumu ya beto na nzila ya menga ya mwana ya yandi, na kutadilaka bunene ya ntima ya kulutila mbote ya Nzambi.
8 Yandi lakisaka beto ntima ya yandi ya kulutila mbote, na mutindu yina yandi pesaka beto ndwenga nyonso mpe mayela.
9 Na kusalaka mutindu yina, yandi lakisaka beto kinsweki ya santu ya dikanisi ya yandi. Ya ke ya kukwelana na mambu yina ke pesaka yandi kilengi, mambu yina yandi mosi bakaka mukanu.
10 Samu na kutwadisa bamambu tii na nsuka ya ntangu yina yandi soolaka na kuvukisa bima nyonso na Kristo, bima nyonso yina ke na mazulu mpe bima nyonso yina ke na ntoto. Ee, na yandi
11 muntu yina beto ke na bumosi mpe yina ba soolaka beto na kuzwa dikabu na yandi. Ba soolaka beto banda ntama samu na kulungisa dikanisi ya muntu yina ke lungisaka mambu nyonso yina yandi kanisaka kusala na mutindu yina ke ya kukwelana na luzolo ya yandi.
12 Ni na yina, beto ba yina ke bantu ya ntete na kuvanda na kivuvu na Kristo, beto fwana kupesa Nzambi lukumu mpe nkembo.
13 Kasi beno mpe beno kumaka na kivuvu ntangu beno kuwaka mambu ya matsyeleka, nsangu ya mbote na yina me tadila kuvuuka ya beno. Na manima ya kukwikila, Nzambi sadilaka mpeve ya santu yina yandi pesaka nsilulu samu na kusoola beno na nzila ya Yesu.
14 Mpeve ya santu ke mutindu nsilulu yina ke lakisaka ti beto ke kuzwa mambu yina Nzambi kanaka samu na beto. Nzambi salaka yawu samu na kufuta ntalu ya kupesa dikanda ya yandi kimpwanza. Ya ke sala ti yandi kuzwa nkembo ya kulutila.
15 Ni na yawu, kubanda ntangu yina mu kuwaka nsangu ya kiminu ya beno na Mfumu Yesu mpe na luzolo yina beno ke lakisaka samu na basantu nyonso,
16 mu ke vutulaka Nzambi ntangu nyonso matondo samu na beno. Mu ke bika ve na kutula beno na balusambu ya munu
17 samu Nzambi ya Mfumu ya beto Yesu Kristo, Tata ya nkembo, pesa beno mpeve ya ndwenga mpe ya luzabusu samu beno zaba yandi mbote-mbote.
18 Nzambi me fungula bantima ya beno samu beno lenda kutala mpe kuzaba kivuvu yina yandi me pesa beno, mpe bima ya mbote yina ba lenda fwanisa na ata kima mosi ve yina yandi me pesa nsilulu na basantu.
19 Beno zaba mpe bunene ya ngolo ya yandi yina yandi lakisaka na beto bantu yina ke kwikilaka. Ya talanaka pwelele na bisalu yina lunganaka na nzila ya ngolo ya yandi yina ke ve na ndilu,
20 ngolo yina yandi sadilaka na Kristo ntangu yandi vumbulaka yandi na lufwa mpe vandisaka yandi na diboko ya yandi ya bakala na mazulu.
21 Yandi zangulaka yandi na faso mosi ya kulutila na zulu ya baluyalu nyonso, na zulu ya bantu nyonso yina ke na lutumu, na zulu ya bantu nyonso yina ke yalaka, na zulu ya bamfumu nyonso mpe na zulu ya konso nkumbu yina bantu lenda zonzila na yinza* yayi, mpe na yinza yina ke kwiza.
22 Yandi tulaka mpe bima nyonso na yisi ya makulu ya yandi, mpe tulaka yandi mfumu na zulu ya bima nyonso ya dibuundu.
23 Dibuundu ke mutindu nzutu ya yandi, mpe yandi pesaka na dibuundu nyonso yina ya vandaka na yawu nsatu.
Banote
^ Tala Yina ya zola zonza.
