Na Baefeze 2:1-22
2 Dyaka, Nzambi vutulaka beno na luzingu na ntangu yina beno vandaka ya kufwa samu na bamambu ya beno ya yimbi mpe samu na masumu ya beno,
2 yina beno vanda salaka na ntama na kulandaka mutindu ya kuzinga ya yinza yayi, na kulandaka mfumu ya ngolo ya mupepe, ya mpeve yina ntangu yayi ke na salaka na kati ya bana ya kukondwa kutumama.
3 Ya tsyeleka, beto nyonso vanda dyatilaka na kulandaka bansatu ya nzutu ya beto, na kusalaka bamambu yina nzutu vandaka na nsatu ya yawu mpe na kudyatilaka na kulandaka makanisi ya beto. Banda ntangu yina beto butukaka, beto vandaka bantu yina bongaka kuzwa nkele ya Nzambi mutindu ba ya nkaka.
4 Kasi Nzambi, samu yandi ke ya kufuluka na ntima ya kyadi, mpe samu na luzolo ya yandi ya kulutila yina yandi zolaka beto,
5 yandi me vutula beto na luzingu kintwadi na Kristo, ata na ntangu yina beto vandaka ya kufwa samu na bamambu ya beto ya yimbi. Ya ke ni samu na ntima ya yandi ya kulutila mbote beno vuukaka.
6 Dyaka, yandi vumbulaka beto kintwadi mpe vandisaka beto kintwadi na mazulu na bumosi na Kristo Yesu.
7 Nzambi me sala yawu samu na yinza* ya malu-malu yina ke kwiza. Yandi ke lakisa bumbote na faso ya kulutila ntangu yandi ke sala bamambu ya mbote samu na beto ba yina ke na bumosi na Kristo Yesu.
8 Ni samu na ntima ya kulutila mbote yina, beno vuukaka na nzila ya kiminu mpe kuvuuka yango me katuka ve na beno, ya ke dikabu ya Nzambi.
9 Ve, ya me katuka ve na bisalu ya beno, samu ata muntu vanda na mambu ya kubula ntulu.
10 Beto kele mbuma ya kisalu ya Nzambi mpe ba yidikaka beto na bumosi na Kristo Yesu samu na bisalu ya mbote yina Nzambi yidikaka na mantwala samu beto sadila yawu.
11 Na yawu beno bantu ya makanda, beno kuzimbana ve ti na ntama ba vanda bokilaka beno “bantu yina ke ve ya kuzenga kibakala” na bantu yina ba vanda bokilaka “bantu yina ke ya kuzenga kibakala,” yina kuzenga kibakala ya bawu salamaka na kinsuni na maboko ya bantu.
12 Na ntangu yina beno vandaka ve na Kristo, beno vandaka ntama na dikanda ya Izraele mpe beno vandaka banzenza na luwawanu ya nsilulu. Beno vandaka ve na kivuvu mpe beno vandaka ve na Nzambi na yinza.
13 Kasi ntangu yayi, na bumosi na Kristo Yesu, beno ba yina vandaka ntama na Nzambi, beno me kuma pene-pene na yandi na nzila ya menga ya Kristo.
14 Samu yandi ke kizunu ya beto, yandi salaka ti bimvuka zole yina kuma kimvuka mosi mpe mwangisaka kibaka yina vandaka na kati-kati ya bimvuka yango.
15 Na nzila ya nzutu ya yandi, yandi katulaka mambu yina ke butaka nkele. Ya zola zonza, Musiku yina ke na misiku mpe banzengolo,* samu na kukumisa bimvuka zole yina muntu mosi ya malu-malu, yina ke na bumosi na yandi mpe samu na kutula kizunu,
16 samu na kuvutula kindiku na faso ya kulunga na kati ya Nzambi na makanda zole yayi, yina me kuma nzutu mosi na nzila ya yinti ya mpasi,* samu yandi kufwaka kimbeni na nzila ya yandi mosi.
17 Yandi kwizaka mpe yandi zonzilaka nsangu ya mbote ya kizunu na beno ba yina vandaka ntama na Nzambi, mpe kizunu na ba yina vandaka pene-pene na yandi.
18 Na nzila ya yandi, beto bantu ya makanda nyonso zole, beto lenda kwenda na mantwala ya Tata na mpeve mosi kaka.
19 Ni na yawu, beno ke dyaka ve banzenza, kasi beno ke bantu ya bwala mosi, mutindu basantu nyonso.
20 Ba tungaka beno na zulu ya fondasio ya bantumwa mpe ya bambikudi. Kristo Yesu yandi mosi ke ditadi ya kulutila mfunu ya fondasio.
21 Na bumosi na yandi, matadi nyonso ya yinzo ke kangamaka mbote kintwadi. Ya ke kulaka samu na kukuma tempelo ya santu samu na Yehova.
22 Na bumosi na yandi, beno mpe ba ke na tungaka beno kintwadi samu beno kuma kisika Nzambi ke vandaka na mpeve.
