Na Baefeze 3:1-21
3 Ni na yina, munu Polo yina ke na boloko samu na Kristo Yesu, samu na mbote ya beno bantu ya makanda...
2 ba soolaka munu samu na kusadisa beno na kuzwa ntima ya kulutila mbote ya Nzambi.
3 Ni na nzila ya kimona-meso, ba zonzilaka munu kinsweki ya santu, mutindu mu zonzaka ntete yawu na bunkufi.
4 Na yawu, kana beno tanga mambu yayi, beno ke lenda kubakula ti mu me zaba kinsweki ya santu ya Kristo.
5 Na bantu ya bantangu ya nkaka, Nzambi zabisaka ve kinsweki yayi na bana ya bantu mutindu yandi me lakisa yawu ntangu yayi na bantumwa mpe bambikudi ya yandi ya santu na nzila ya mpeve.
6 Kinsweki ni yayi: Ba yina ke ve Bazwife mpe kele na bumosi na Kristo Yesu, ke kuzwa bima yina Yesu me kuzwa mpe ba ke kuma kitini ya nzutu. Ba ke kuzwa mpe bima yina Nzambi pesaka beto nsilulu samu na nsangu ya mbote.
7 Mu kumaka kisadi ya kinsweki yayi, na kutadilaka dikabu ya ofele ya ntima ya kulutila mbote ya Nzambi, yina yandi lakisaka munu na nzila ya ngolo ya yandi.
8 Ni na munu, muntu ya fioti kuluta muntu ya kulutila fioti na basantu nyonso, ba lakisaka ntima ya kulutila mbote yayi. Na yawu, mu me fwana kuzabisa nsangu ya mbote na makanda na yina me tadila bimvwama ya Kristo yina ke ve na nsuka,
9 mpe mu me fwana kusadisa bantu na kuzaba mutindu ba ke twadisa mambu ya kinsweki ya santu yina Nzambi bumbaka banda ntama, Nzambi yina yidikaka bima nyonso.
10 Ya salamaka mutindu yayi samu ti na nzila ya kimvuka, ndwenga ya kulutila nene ya Nzambi zabana na baluyalu mpe na bantu yina ke na lutumu na bisika ya mazulu.
11 Ya ke ya kukwelana na mukanu yina ke ve na nsuka yina yandi yidikaka na yina me tadila Kristo, Yesu Mfumu ya beto.
12 Na nzila ya yandi, beto ke zonzaka na bukindi mpe ke kwendaka na mantwala ya Nzambi na kundima na nzila ya kiminu ya beto na yandi.
13 Na yawu, mu ke na lombaka na beno na kubika ve ti mpasi yina mu ke na talaka samu na beno kulembisa beno. Samu ya zola zonza nkembo samu na beno.
14 Ni na yawu, mu ke fukamaka na mantwala ya Tata,
15 muntu yina ke salaka ti makanda nyonso na zulu mpe na ntoto vanda.
16 Mu ke na sambilaka ti na lusalusu ya nkembo ya yandi ya nene, yandi pesa beno nzila ya kukuma ngolo na kimuntu ya beno ya kati, na nzila ya ngolo yina mpeve ya yandi ke pesaka,
17 mpe ti na nzila ya kiminu ya beno, Kristo zinga na kati ya bantima ya beno na luzolo. Beno vanda ya kusikama mpe ya kukangama ngolo na fondasio,
18 samu kintwadi na basantu nyonso, beno lenda kubakula mbote-mbote bunene, yinda, ntela, mpe sunda,*
19 samu beno zaba luzolo ya Kristo yina me lutila nzayilu, mpe samu beno vanda ya kufuluka na bima nyonso ya mbote yina Nzambi ke pesaka.
20 Ntangu yayi Nzambi lenda sala mingi kulutila mambu nyonso yina beto ke lombaka to yina beto ke kanisaka.
21 Bika ti nkembo kuvanda na yandi na nzila ya kimvuka mpe na nzila ya Kristo Yesu na kati ya bantangu nyonso ya bantu tii mvula na mvula. Ameni.
Banote
^ To: “Profondeur.”
