Na Baefeze 4:1-32
4 Ni na yina, munu Polo yina ke na boloko samu na Mfumu, mu ke na bondilaka beno na kutambula na mutindu yina me fwanana na kubokila yina ba bokilaka beno.
2 Na kukuluka nyonso, na lembami mpe na ntima ya yinda, konso muntu me fwana kukanga ntima na bifu ya bampangi mpe kulakisa bawu luzolo.
3 Beno sala bangolo mingi na kubumba bumosi ya mpeve na kati ya kizunu.
4 Ya ke kaka na nzutu mosi mpe mpeve mosi, mutindu ya ke kaka na kivuvu mosi yina ba bokilaka beno.
5 Mfumu mosi, kiminu mosi, mbotokolo mosi.
6 Nzambi mosi mpe Tata ya bantu nyonso, yina ke na zulu ya bantu nyonso, yina ke salaka na nzila ya bantu nyonso mpe na bantu nyonso.
7 Mosi na mosi na kati ya beto kuzwaka ntima ya kulutila mbote yina katukaka na Nzambi mpe ni Kristo pesaka dikabu yayi na mosi na mosi ya beto.
8 Masonoko ke zonzaka: “Ntangu yandi kwendaka na zulu, yandi basisaka bantu na boloko, mpe yandi pesaka bawu mutindu lusakumunu.”
9 Yinki zola zonza nzonzolo “yandi kwendaka na zulu,” kasi ntete-ntete yandi kulumukaka na bisika ya yisi, yina ke ntoto?
10 Muntu yina kulumukaka, ni yandi mpe kwendaka ntama kuluta zulu nyonso samu yandi lungisa mambu nyonso.
11 Yandi tulaka ba ya nkaka mutindu bantumwa, ba ya nkaka mutindu bambikudi, ba ya nkaka mutindu basamuni ya nsangu ya mbote, ba ya nkaka mutindu mivungi mpe balongi,
12 samu na kusungika basantu na kisalu ya kusadisa bantu ya nkaka, na kutunga nzutu ya Kristo,
13 tii ntangu beto ke kuma na bumosi na kiminu mpe ke zaba mbote-mbote Mwana ya Nzambi, samu na mutindu yina, beto kuma bantu ya kuyela mutindu Kristo kele.
14 Na yina, beto me fwana kuvanda dyaka ve bana ya fioti, samu muntu yina ke landaka malongi ya bantu yina ke vunaka bampangi, ke mutindu bwatu yina ke na nzadi ya mungwa, yina mupepe na maza ke nataka kisika ni kisika.
15 Kasi beto zonza matsyeleka, beto kula na luzolo na mambu nyonso, tii na kukuma pene-pene na muntu yina ke yintu ya nzutu, Kristo.
16 Beto ke mutindu nzutu ya muntu, mpe samu na yandi, binama nyonso ya nzutu yayi ke ya kuvukana mpe ke sadisaka nzutu na kusala. Kana konso kinama ya nzutu yayi ke lungisaka kisalu ya yawu, nzutu yango ke kula na faso mosi ya mbote mpe beto ke zolasana.
17 Yayi ni mambu yina mu ke na zonzaka mpe mu me ndima na mfumu: “Beno me fwana kutambula dyaka ve mutindu bantu ya makanda ke tambulaka, na kulandaka makanisi ya bawu yina ke ve malonga.
18 Makanisi ya bawu ke na kati ya mpimpa ya ngolo mpe ba ke ntama na luzingu yina ke katukaka na Nzambi, samu ba me kondwa luzabu, mpe samu ba ke na ntima-ngolo.
19 Ba ke talaka dyaka ve nsoni, ba ke sadilaka banzutu ya bawu na faso ya kulutila yimbi, samu na kusala mambu nyonso ya busafu na lukoso.
20 Kasi beno, ni mutindu yina ve beno zabaka Kristo.
21 Ya tsyeleka, beno kuwaka yandi, mpe ba longaka beno na nzila ya yandi ti matsyeleka ke ni na Yesu.
22 Ba longaka beno na kulosa kimuntu ya ntama, yina ke ya kukwelana na bifu ya beno ya ntama, mpe yina ke ya kubola na kulandaka ve bansatu ya yawu ya luvunu.
23 Beno fwana kubika ve kukuma bantu ya malu-malu na ngolo yina ke twadisaka makanisi ya beno.*
24 Mpe beno fwana kulwata kimuntu ya malu-malu yina ba yidikaka na kulandaka luzolo ya Nzambi, lunungu, mpe kiminu ya tsyeleka.
25 Ni na yawu, ntangu yayi yina beno me losa luvunu, konso muntu me fwana kuzonza matsyeleka na mpangi ya yandi, samu beto nyonso ke binama ya nzutu mosi.
26 Beno vanda na nkele, kasi beno kusala ve disumu. Beno kubumba ve nkele tii ntangu ke kota.
27 Beno kupesa ve nzila na Satana.
28 Bika ti muntu yina ke labaka, kulaba dyaka ve. Kasi bika yandi sala kisalu ya ngolo, yandi sala kisalu ya mbote na maboko ya yandi samu yandi kuzwa kima ya kupesa na muntu yina me kondwa kima.
29 Ata mambu mosi ve ya kubola basika na bayinwa ya beno. Kasi beno basisa kaka mambu ya mbote samu na kukindisa bantu yina ke na yawu nsatu, samu ya natina lusakumunu na bantu yina ke kuwa yawu.
30 Dyaka, beno kunyongisa ve mpeve ya santu ya Nzambi. Ni na nzila ya yawu Nzambi tulaka beno kidimbu samu na kupesa beno kimpwanza na nzila ya munkayulu.
31 Beno katula na kati ya beno mitindu nyonso ya mambu ya yimbi, nkele, kudasuka, kuganga, kufinga mpe mambu nyonso ya yimbi.
32 Kasi beno lakisa ntima ya mbote beno na beno, beno vanda na mawa samu na bantu ya nkaka, beno lemvokila beno na beno na ntima mosi, mutindu Nzambi mpe na nzila ya Kristo lemvokilaka beno.
Banote
^ Na Greke: “Na mpeve ya makanisi ya beno.”
