Na Baefeze 5:1-33
5 Na yawu, beno tatamana na kulanda kifwani ya Nzambi mutindu bana yina yandi ke zolaka mingi.
2 Beno tatamana mpe na kuzinga na kati ya luzolo, kaka mutindu Kristo mpe zolaka beto* mpe pesaka luzingu ya yandi mutindu dikabu mpe munkayulu samu na beto,* mananasi ya nsunga ya kitoko na Nzambi.
3 Bika ti ba zonzila ata fioti ve na kati ya beno mambu ya kinsuza,* mambu ya mvindu ya mutindu nyonso to ya lukoso, mutindu ya me lunga samu na bantu ya santu.
4 Beno zola vanda mpe ve na ndyatulu ya nsoni, nzonzolo ya buzoba, kusakana ya nsoni, bamambu nyonso yina ke ve ya kulunga, kasi beno vutula matondo na Nzambi.
5 Samu beno zaba mambu yayi mpe beno zaba ti ata muntu mosi ve yina ke salaka kinsuza,* yina ke salaka mambu ya mvindu to muntu ya lukoso, yina zola zonza muntu yina ke sambilaka biteki, ke ve na dikabu na kati ya Kimfumu ya Kristo mpe ya Nzambi.
6 Bika ti ata muntu kuvuna beno na nzonzolo ya kukondwa mfunu, samu ya ke ni na bamambu ya mutindu yayi, nkele ya Nzambi ke kwizilaka na zulu ya bana ya kukondwa kutumama.
7 Na yawu, beno kuvukana ve na bawu.
8 Beno vandaka ntete na mpimpa, kasi ntangu yayi beno ke na nsemo, samu beno ke bantu ya Mfumu. Beno tatamana na kuzinga mutindu bana ya nsemo,
9 samu mbuma ya nsemo ke mutindu nyonso ya bumbote, mpe ya lunungu* mpe ya matsyeleka.
10 Beno tatamana na kusosa kuzaba mbote-mbote mambu yina mfumu ke ndimaka.
11 Beno bika mpe kuvukana na bisalu ya mpimpa yina ke butaka ve mbuma, kasi beno tula yawu na nsemo ya matsyeleka.
12 Bamambu yina ba ke salaka na kinsweki ke nsoni mingi ata na kuzonzila yawu.
13 Ntangu yayi, nsemo ke na ngengaka na zulu ya bamambu yina ke ve ya kulunga mpe na mutindu yina, bamambu yina ke ya kulunga me talana pwelele.
14 Ni na yawu masonoko ya santu ke zonzaka: “Nge muntu ke ya kufwa mutindu muntu me lala pongi ya ngolo, vumbuka, telama, mpe Kristo ke pesa nge nsemo.”
15 Na yawu, beno sala keba na kuzinga ve mutindu bantu yina ke ve na ndwenga, kasi beno zinga mutindu bantu yina ke na ndwenga.
16 Beno sadila mbote-mbote ntangu ya beno, samu bilumbu kele yimbi.
17 Ni na yawu, beno bika kuvanda bazoba, kasi beno tatamana na kusosa kubakula wapi yina ke luzolo ya Yehova.*
18 Dyaka, beno kola ve vinu, samu ti kukola vinu ke nata beno na kusala bamambu ya kulutila yimbi. Kasi beno tatamana na kufuluka na mpeve ya santu ya Nzambi.
19 Beno kindisa bampangi* na bankunga, na kukembilaka Nzambi mpe na kuyimbaka banzimbu ya kimpeve. Beno yimbila Yehova mutindu beno ke na kubulaka miziki na kati ya bantima ya beno.
20 Ntangu nyonso beno vutula matondo na Nzambi mpe Tata ya beto samu na mambu nyonso na nkumbu ya Mfumu ya beto Yesu Kristo.
21 Konso muntu kutumama na muntu ya nkaka na kati ya boma ya Kristo.
22 Bika ti bakento kutumama na babakala ya bawu, mutindu ba ke tumamaka na Mfumu,
23 samu bakala ke mfumu ya kento ya yandi, kaka mutindu Kristo ke Mfumu ya dibuundu, ni yandi ke muvuukisi ya nzutu yayi.
24 Na yawu, mutindu dibuundu ke tumamaka na Kristo, bakento fwana kutumama na babakala ya bawu na mambu nyonso.
25 Babakala, beno tatamana na kuzola bakento ya beno kaka mutindu Kristo zolaka dibuundu mpe pesaka luzingu ya yandi samu na yawu,
26 samu yandi katula mvindu na zulu ya yawu, yandi kumisa yawu bunkete, na kusukulaka yawu na maza ya dyambu ya Nzambi.
27 Yandi salaka yawu samu na kukumisa dibuundu kitoko na meso ya yandi. Yandi zola ti dibuundu vanda santu mpe ya vanda ve na mvindu.
28 Ni na yawu, babakala fwana kuzola bakento ya bawu mutindu ba ke zolaka banzutu ya bawu mosi. Bakala yina ke zolaka kento ya yandi ke zolaka nzutu ya yandi mosi,
29 samu ata muntu mosi ve ke yiinaka nzutu* ya yandi mosi. Kasi yandi ke dikisaka yawu mpe ke kipeke yawu, kaka mutindu Kristo ke salaka samu na dibuundu,
30 samu beto ke binama ya nzutu ya yandi.
31 “Ni na yawu bakala ke bika tata na mama ya yandi, mpe yandi ke kangama na kento ya yandi, mpe bawu zole ke kuma musuni* mosi.”
32 Kinsweki ya santu yayi ke nene. Mu ke na zonzilaka mambu yina me tadila Kristo mpe dibuundu.
33 Kasi konso muntu na kati ya beno fwana kuzola kento ya yandi mutindu yandi ke zolaka nzutu ya yandi mosi. Kento mpe fwana kuvanda na buzitu ya mingi samu na bakala ya yandi.
Banote
^ To ya lenda vanda: “Beno.”
^ To ya lenda vanda: “Beno.”
^ Na Greke, por·nei′a. Tala Yina ya zola zonza
^ Na Greke, por·nei′a. Tala Yina ya zola zonza
^ To: “Ludedomo.”
^ Tala Yina ba me bwela. A5
^ To ya lenda vanda: “Beno mosi.”
^ Na Greke: “Musuni.”
^ To: “Nzutu.”
