Na Baefeze 6:1-24
6 Bana, beno tumama na bibuti ya beno na bumosi na Mfumu, samu ya ke mbote.
2 “Zitisa tata ya nge na mama ya nge,” ya ke musiku ya ntete yina ke na nsilulu yayi:
3 “Samu bamambu kwenda mbote samu na nge, mpe nge zinga ntangu mingi na ntoto.”
4 Batata, beno kupesa ve bana ya beno nkele, kasi beno tatamana na kukulisa bawu na malongi mpe balutwadusu* ya Yehova.
5 Bisadi, beno tumama na bamfumu ya beno awa na zulu ya ntoto,* na boma mpe kutekita. Beno tumama na ntima ya beno nyonso mutindu beno ke tumamaka na Kristo.
6 Beno kusala ve yawu kaka ntangu ba ke talaka beno samu na kusepelisa bantu, kasi mutindu bisadi ya Kristo ke salaka luzolo ya Nzambi na mwela* ya bawu nyonso.
7 Beno sala kisalu ya beno na makanisi ya mbote mutindu samu na Yehova, kasi ve samu na bantu,
8 samu beno zaba ti mambu ni mambu ya mbote yina muntu ni muntu ke sala, Yehova muntu ke futa yandi. Ya vanda yandi kele kisadi to yandi ke na kimpwanza.
9 Dyaka, beno bamfumu, beno bakila bisadi ya beno na kulandaka malongi yina. Beno kupesa ve bawu boma, samu beno zaba ti Mfumu ya bawu mpe ya beno ke na zulu. Yandi ke soolaka ve bizizi.
10 Na kumanisa, bika ti Mfumu pesa beno ngolo na nzila ya ngolo ya yandi ya nene.
11 Beno lwata binwanunu nyonso yina Nzambi ke pesaka samu beno lenda kuvanda ya kukubama na mantwala ya mayela ya yimbi ya Dyabulu,
12 samu beto ke nwanaka ve na menga mpe musuni. Kasi beto ke nwanaka na baluyalu, bantu yina ke na lutumu, bamfumu ya yinza yayi ya mpimpa, mpe bampeve ya yimbi yina ke na bisika ya zulu.
13 Ni na yawu, beno baka binwanunu nyonso yina Nzambi ke pesaka, samu beno lenda kunwana ntangu kilumbu ya yimbi ke kuma. Na manima ya kulungisa mambu nyonso, beno telama ngolo.
14 Na yawu, beno vanda ya kutelama ngolo, beno lwata matsyeleka mutindu singa yina ba ke kangaka na luketo, beno lwata kinwanunu ya lunungu* yina ke bumbaka ntima
15 mpe beno lwata na makulu ya beno mapapa samu na kuvanda ya kubongama na kuzabisa nsangu ya mbote ya kizunu.
16 Dyaka, beno baka kisengo ya nene ya kiminu yina ke bumbaka nzutu, ya ke sadisa beno na kufwa madyonga nyonso ya tiya ya muntu ya yimbi.
17 Beno ndima mpe yimpu ya luvuukusu mpe mbele ya mpeve, yina zola zonza mambu ya Nzambi.
18 Na kumanisa, beno vanda ntangu nyonso ya kuvumbuka mpe beno bondila na lusambu samu na basantu.
19 Beno sambila mpe samu na munu, samu ntangu mu ke fungula yinwa, ba pesa munu mambu yina mu me fwana kuzonza, samu mu zonza na bukindi nyonso ntangu mu ke zabisa kinsweki ya santu ya nsangu ya mbote.
20 Ni Nzambi filisaka munu na kusamuna nsangu ya mbote. Ni na yawu ba me kanga munu na basinga ya bisengo. Beno sambila Nzambi samu na munu samu mu lenda kuzonzila nsangu ya mbote, kukondwa boma, na mutindu yina ya me lunga kusalama.
21 Beno zaba mpe mambu ya munu mpe yinki mu ke na salaka. Tishike yina ke mpangi yina beto ke zolaka mingi mpe kisadi ya kukwikama na Mfumu, ke zabisa beno mambu nyonso.
22 Mu ke na filisaka yandi na sika ya beno samu yandi zonza na beno mutindu beto kele, mpe samu yandi kindisa beno.
23 Bika ti kizunu mpe luzolo na kiminu yina ke katukaka na Nzambi Tata ya beno mpe ya Mfumu Yesu Kristo vanda na beno bampangi.
24 Bika ti ntima ya kulutila mbote vanda na ba yina nyonso ke zolaka Mfumu ya beto Yesu Kristo na luzolo yina ke ve na nsuka.
Banote
^ Na Greke: “Kutula yawu na makanisi ya bawu.”
^ Na Greke: “Na kinsuni.”
^ Tala Yina ya zola zonza
^ To: “Ludedomo.”
