Na Bafilipi 1:1-30
1 Yayi ni mukanda yina me katuka na Polo na Timote, bisadi ya Kristo Yesu, na basantu nyonso ya bwala ya Filipi yina ke bilandi* ya Kristo Yesu, na bakuluntu ya kimvuka mpe na basadisi:
2 Bika ntima ya kulutila mbote mpe kizunu ya Nzambi Tata ya beto mpe ya Mfumu Yesu Kristo vanda na beno.
3 Mu ke vutulaka ntangu nyonso matondo na Nzambi ya munu ntangu mu ke kanisaka na beno.
4 Bantangu nyonso yina mu ke bondilaka Nzambi samu na beno nyonso, mu ke salaka yawu na kilengi,
5 samu beno tulaka diboko na kumwangisa nsangu ya mbote kubanda kilumbu ya ntete yina beno kuwaka yawu tii ntangu yayi.
6 Mu ke na kundima ti Nzambi yina bandaka kisalu ya mbote na kati ya beno ke bika ve kusala yawu tii na kilumbu yina Kristo Yesu ke vutuka.
7 Ya ke ya kulunga ti mu vanda na makanisi ya mutindu yayi samu na beno, samu ti mu ke zolaka beno na ntima mosi, mpe beno mpe ke kuzwaka kintwadi na munu ntima ya kulutila mbote ya Nzambi. Beno me sadisa munu ntangu yayi yina mu ke na boloko mpe samu na kumwangisa nsangu ya mbote mpe kusala nyonso samu bamfumu ya luyalu pesa munu nzila ya kuzonzila yawu.
8 Nzambi me zaba ti mu ke na nsatu mingi ya kutala beno nyonso, samu ti luzolo ya munu samu na beno ke faso mosi na luzolo yina Kristo Yesu ke na yawu samu na beno.
9 Mu ke tatamanaka na kusambila Nzambi samu luzolo ya beno kula dyaka ya kulutila, samu beno zaba dyaka mbote-mbote matsyeleka mpe samu mayela ya beno ya kusala luswaswanu na mambu nyonso kula dyaka.
10 Lusambu ya munu ke ti beno bakula bamambu ya kulutila mfunu, ti beno vanda ya kuvedila mpe beno bwisa ve kiminu ya bampangi tii na kilumbu ya Kristo.
11 Na lubakusu ya Yesu Kristo, beno sala bisalu mingi ya kulunga, yina ke pesaka nkembo mpe lukumu na Nzambi.
12 Bampangi, mu zola beno zaba ti mambu yina me kumina munu me sala ti nsangu ya mbote mwangana dyaka ya kulutila.
13 Ni yawu yina basoda nyonso yina ke kengidilaka mfumu ya Roma mpe bantu nyonso ya nkaka zaba ti mu ke na boloko samu mu ke kilandi ya Kristo.
14 Samu mu ke na boloko, bampangi mingi yina ke sadilaka Mfumu me kuma na bukindi ya kulutila, mpe ba ke na zonzilaka dyaka mingi mambu ya Nzambi na bukindi nyonso.
15 Ya tsyeleka, ya ke na ba yina ke samunaka nsangu ya Kristo na musoki mpe na makanisi ya kuswana. Kasi ba ya nkaka ke salaka yawu na makanisi ya mbote.
16 Ba ke samunaka nsangu yina me tadila Kristo na luzolo, samu ba zaba ti ba soolaka munu samu na kunwanina nsangu ya mbote.
17 Kasi ba yina ke samunaka samu na kutalana, ke na makanisi ya yimbi mpe ba ke na nsatu ya kubwela munu bampasi ntangu yayi yina mu ke na boloko.
18 Wapi mbuma ya me buta? Nsangu ya Kristo ke na mwanganaka kaka, mpe mu ke na kilengi samu na yawu. Ata ti makanisi ya bawu vanda ya mbote to ya yimbi, mu ke bika ve kusepela samu na yawu,
19 samu mu me zaba ti ya ke vuukisa munu* kana beno bondila, mpe mpeve ya Yesu Kristo ke sadisa munu.
20 Ya ke ya kukwelana na mambu yina mu ke na vingilaka na ntima mosi, mpe na kivuvu ti mu ke vanda ve na nsoni ata na mambu mosi. Mu ke na kundima ti mu ke vanda na makoki ya kutatamana na kuzonza na kimpwanza, samu mu lenda kupesa lukumu na Kristo bubu yayi, kaka faso ya vandaka ntangu nyonso na ntama, ya vanda mu ke na luzingu to mu me kufwa.
21 Samu na munu, kuzinga ni kusadila Kristo mpe kufwa ke difuta.
22 Kana mu ke ntete na luzingu na nzutu yayi, ya zola zonza ti mu ke lenda kutatamana na kusala kisalu ya munu ya mbote, kasi mu zaba ve yinki mu ke soola.
23 Mu zaba ve yinki mu ke soola na bamambu zole yayi, samu ti mu zola kubika nzutu yayi samu na kuvanda na Kristo. Ya tsyeleka, ni yina me lutila mbote.
24 Kasi ya ke samu na mbote ya beno mu vanda kaka moyo na nzutu yayi.
25 Mu ke na kiminu na mambu yayi, mu zaba ti mu ke vanda kaka na beno nyonso samu na kusadisa beno na kukwenda na mantwala mpe na kusepela na kiminu ya beno.
26 Ntangu mu ke vanda dyaka kintwadi na beno, kiminu ya beno na Kristo Yesu ke kula dyaka samu na munu.
27 Kasi beno dyatila na mutindu yina me fwanana na nsangu ya mbote ya Kristo. Na yawu, ya vanda ti mu kwiza tala beno to mu vanda ve, mu kuwa bansangu ya mbote na yina me tadila beno, ti beno ke ya kukangama mpe na bumosi, na dikanisi mosi,* mpe beno ke na salaka kintwadi samu na kiminu na nsangu ya mbote.
28 Beno vanda ata fioti ve na boma ya bambeni ya beno. Samu na bawu, mambu yayi ke na lakisaka ti ba ke kufwa, mpe samu na beno ya ke na lakisaka ti beno ke vuuka. Ya me katuka na Nzambi.
29 Beno me kuzwa ve kaka bweso ya kutula kiminu na Kristo, kasi ya kutala mpe mpasi samu na yandi.
30 Beno ke na nwanaka na bampasi yina beno talaka mu vanda nwana na yawu mpe yina beno ke na kuwaka ntangu yayi ti mu ke ntete na nwanaka na yawu.
Banote
^ To: “Ba yina ke na bumosi.”
^ To ya lenda vanda: “Basisa munu na boloko.”
^ To: “Kintwadi.”
