Na Bafilipi 2:1-30
2 Beno sala nyonso yina beno lenda sala samu na kukindisa bampangi na kati ya Kristo, na kupesaka bawu ngolo na luzolo, na kuvandaka na bumosi na kimpeve, mpe na kulakisaka luzolo mpe ntima ya kyadi.
2 Kana beno sala yawu, beno ke sala ti kilengi ya munu kuma mingi. Beno zinga na bumosi, beno zolasana, mpe beno vanda na bumosi na ndyatulu mpe na makanisi.
3 Beno kusala ve ata mambu mosi na makanisi ya kuswana to na nsatu ya kutalana, kasi na kukuluka nyonso, beno bakila bampangi mutindu bantu yina me lutila beno.
4 Beno kusosa ve kulungisa kaka bansatu ya beno mosi, kasi beno sosa mpe kulungisa bansatu ya bampangi.
5 Beno vanda mpe na dikanisi yayi yina vandaka mpe na Kristo Yesu.
6 Ata ti yandi vandaka kifwani ya Nzambi, yandi kanisaka ata fioti ve na kusosa kuvanda mutindu Nzambi.
7 Kasi yandi bikaka bima nyonso, mpe ndimaka kuvanda kisadi mpe zingaka mutindu muntu.
8 Ya kulutila, ntangu yandi kwizaka mutindu muntu,* yandi kulukaka mpe yandi tumamaka tii na lufwa, ee lufwa na zulu ya yinti ya mpasi.*
9 Ni na yawu Nzambi tulaka yandi na kisika ya kuzanguka, mpe pesaka yandi nkumbu ya kulutila bankumbu nyonso ya nkaka.
10 Nzambi salaka yawu samu bantu nyonso pesa lukumu* na nkumbu ya Yesu, ya vanda ba yina ke na zulu, ba yina ke na ntoto, mpe ba yina ke na yisi ya ntoto,
11 mpe yinwa nyonso ndima pwelele ti Yesu Kristo ke Mfumu samu na nkembo ya Nzambi, Tata ya beto.
12 Na yawu bampangi ya munu ya luzolo, beno ke tumamaka ntangu nyonso, kaka ve ntangu mu ke vandaka na beno, kasi beno ke salaka yawu mpe ntangu mu ke vandaka ve. Na yawu mu ke na lombaka na beno na kulemba ve kusala bangolo samu beno vuuka, mpe beno sala yawu na boma mpe kutekita.
13 Ya tsyeleka, ni Nzambi muntu ke pesaka beno bukindi samu na mambu yina ke pesaka yandi kilengi, mpe yandi ke pesaka beno nsatu mpe ngolo ya kusala bamambu.
14 Beno sala nyonso ata kunyunguta mpe kusala ntembe,
15 samu beno kuma bana ya Nzambi, bantu yina me kondwa mambu ya yimbi, mpe yina me zaba ve mambu. Na kuvandaka bantu yina me kondwa mambu ya yimbi, beno ke ngenga mutindu bamwinda ya ngolo na kati ya bantu ya mayuya, bantu yina me bebaka.
16 Beno simba ngolo mambu yina ke pesaka luzingu. Na yawu, mu ke vanda na mambu ya kubula ntulu na kilumbu ya Kristo, samu mu zaba ti, mpasi yina mu me tala mpe kisalu ya munu ya ngolo vandaka ve ya mpamba.
17 Kasi ata ti mu kukipesa mutindu dikabu ya malafu yina ba me mwangisa na zulu ya munkayulu mpe ya kisalu ya santu yina kukangama ya beno me nata beno na kusala, mu ke na kilengi mpe mu ke na sepelaka kintwadi na beno nyonso.
18 Mu ke na lombaka na beno mpe na kusepela na munu.
19 Mu ke na kivuvu na Mfumu Yesu ti na bilumbu yina ke kwiza, mu ke filisa beno Timote. Na yawu, mu ke kuzwa bansangu ya beno mpe ya ke kindisa munu.
20 Mu ke ve na muntu ya nkaka mutindu yandi. Ya tsyeleka, yandi ke kanisaka mingi na mbote ya beno.
21 Samu bantu ya nkaka ke sosaka kaka bansatu ya bawu mosi, kasi ya Yesu Kristo ve.
22 Kasi beno me zaba mutindu yandi lakisaka ti, ya me lunga ba tula yandi ntima. Kaka mutindu mwana ya fioti na tata ya yandi, yandi salaka kisalu ya ngolo na munu samu na kumwangisa nsangu ya mbote.
23 Ni yandi mu ke filisa beno ntangu mu ke zaba mambu yina ke na vingilaka munu.
24 Mu ke na kundima ti, na mwa ntangu fioti, Mfumu ke pesa munu nzila ya kukwiza tala beno munu mosi.
25 Kasi ntangu yayi, mu me tala ti ya ke vanda mfunu mingi mu filisa beno Epafrodite, yina ke ndiku ya munu, mpangi ya munu ya kisalu mpe soda mutindu munu, mpe muntu yina beno filisaka samu na kusadisa munu.
26 Yandi ke na nsatu mingi ya kutala beno nyonso. Yandi ke mpe na mawa samu beno kuwaka ti yandi vanda beela.
27 Ya tsyeleka, maladi ya yandi vandaka ngolo mpe yandi zola kufwa. Kasi Nzambi talaka yandi kyadi, kaka kyadi ya yandi ve, kasi ya munu mpe, samu ya bwela ve munu mawa na zulu ya yina tekilaka.
28 Ni na yina mu ke na filisaka yandi na mbangu nyonso, samu ntangu beno ke tala yandi, beno vanda dyaka na kilengi. Ya ke sala ti mu bika kuvanda na mawa samu na beno.
29 Ni na yawu, beno yamba yandi na kilengi nyonso, mutindu beno ke yambaka bilandi ya Mfumu. Beno lakisa mpe ti bantu ya mutindu yayi ke mfunu mingi samu na beno.
30 Yandi zola kufwa samu na kisalu ya Kristo,* mpe yandi tulaka luzingu* ya yandi na mpasi samu na munu, samu beno vandaka ve awa na kusadisa munu.
Banote
^ Na Greke: “Ntangu yandi talanaka mutindu muntu.”
^ Tala Yina ya zola zonza.
^ Na Greke: “Makoto nyonso fukama na mantwala ya.”
^ To ya lenda vanda: “Kisalu ya Mfumu.”
^ To: “Mwela.”
