Na Bafilipi 3:1-21
3 Bampangi ya munu, na kumanisa, beno vanda na kilengi ntangu nyonso mutindu bilandi ya Mfumu. Ya ke ve na salaka munu mpasi na ntima na kusonikila beno bamambu yina mu sonikilaka ntete beno, mpe ya ke samu na mbote ya beno.
2 Beno sala keba na bantu yina ke salaka bamambu mutindu bayimbwa. Beno sala keba na bantu yina ke salaka bamambu ya yimbi. Beno sala keba na bantu yina ke zengaka kibakala,
3 samu beto ke ba yina ba zengaka kibakala ya tsyeleka, beto ba yina ke sadilaka Nzambi na nzila ya mpeve ya yandi, mpe ba yina ke tulaka ve ntima ya bawu nyonso na mayela ya bantu,* kasi na Kristo Yesu.
4 Na kutala mbote, mu ke na mambu yina lenda nata munu na kutula ntima na nzutu ya munu, kulutila bantu nyonso.
Kana ya ke na muntu ya nkaka yina me kanisa ti yandi ke na mambu yina lenda nata yandi na kutula ntima na nzutu,* mu ke na yawu ya kulutila:
5 Ba zengaka munu kibakala na kilumbu ya nana,* mu ke muntu ya Izraele ya dikanda ya Benzamin, mu ke Muebre yina butamaka na dikanda ya Baebre, na yina me tadila musiku, mu vandaka Mufarize.
6 Na tiya nyonso mu nyokolaka kimvuka. Na yina me tadila kulanda misiku, mu talanaka muntu yina me kondwa mambu ya yimbi.
7 Kasi bima yina vandaka mfunu samu na munu, mu ke na bakilaka yawu ntangu yayi mutindu bima ya mpamba* samu na Kristo.
8 Ya tsyeleka, mu ke na talaka bima nyonso yayi mutindu bima ya mpamba samu na kimvwama ya kulutila mfunu, kuzaba Kristo Yesu Mfumu ya munu. Samu na yandi, mu me manga bima nyonso, mpe mu ke na bakilaka yawu mutindu bima ya nganzi* samu na kuzwa Kristo,
9 mpe samu na kuvanda na bumosi na yandi. Lunungu* ya munu ke ve samu mu salaka mambu nyonso ya kukwelana na misiku. Kasi ya ke ya kuvanda na kiminu ya munu na Kristo. Lunungu yayi me katuka na Nzambi, na nzila ya kiminu.
10 Nsatu ya munu ke ni ya kuzaba Kristo mpe ngolo ya kuvumbuka ya yandi na lufwa, mpe ya kutala mpasi yina yandi talaka. Ata ti ya ke nata munu na lufwa, mu ke ndima na ntima mosi kufwa mutindu yandi.
11 Ni na yina munu mpe, mu ke na kivuvu ti, mu ke vumbuka na kuvumbuka ya ntete ya bantu ya kufwa yina ke salama.
12 Ya zola zonza ve ti mu me kuzwa yimeni difuta mpe ti mu me kuma muntu ya kulunga. Kasi mu ke na salaka yina ke na ngolo ya munu na kusimba ngolo kima yina salaka ti Kristo Yesu soola* munu.
13 Bampangi, mu ke na kanisaka ve ti munu me kuzwa yimeni difuta yango. Kasi mambu ya tsyeleka ni yayi: Mu ke na zimbanaka mambu yina ke na manima mpe mu ke na tulaka meso na bamambu yina ke na mantwala.
14 Mu ke na salaka nyonso yina ke na ngolo ya munu, na kukwenda tii na nsuka samu na kuzwa difuta ya kukwenda zinga na zulu, difuta yina Nzambi me pesa na nzila ya Kristo Yesu.
15 Na yawu, bika ti ba yina nyonso ke ya kuyela na kati ya beto vanda na dikanisi yayi. Kana mosi na kati ya beno ke na dikanisi ya nkaka, Nzambi ke lakisa beno dikanisi ya mbote.
16 Ata nyonso yina beto me lenda kusala, beto tatamana na kudyatila kaka na nzila yina beto me dyatila tii ntangu yayi.
17 Bampangi, beno landa kifwani ya munu, mpe beno tula meso na ba yina ke landaka kifwani yina beto me pesa beno.
18 Ya ke na bantu mingi bubu yayi ke na salaka bamambu mutindu bambeni ya Kristo, mpe ya yinti ya mpasi.* Mu vanda zonzilaka mingi bankumbu ya bawu, kasi bubu yayi, mu ke zonzilaka bankumbu ya bawu na kudila nyonso.
19 Nsuka ya bawu ni lufwa, nzambi ya bawu ni kivumu ya bawu, ba ke na bulaka ntulu samu na mambu ya nsoni yina ba ke na salaka. Ba ke kanisaka kaka na bamambu ya ntoto.
20 Kasi beto ke bantu ya mazulu mpe beto ke na vingilaka na nsatu ya ngolo muvuukisi yina ke katuka na zulu, Mfumu Yesu Kristo.
21 Yandi ke kitula nzutu ya beto ya kulemba, samu ya kuma mutindu* nzutu ya yandi. Yandi ke sadila ngolo ya yandi samu na kulungisa yawu, ni ngolo yango ke sadisa yandi na kutula bima nyonso na yisi ya lutumu ya yandi.
Banote
^ Na Greke: “Ke tulaka ve ntima ya bawu nyonso na musuni.”
^ To: “Musuni.”
^ To: “8.”
^ To ya lenda vanda: “Na ntima mosi mu bikaka yawu.”
^ To: “Bima ya busoto.”
^ To: ”Kudedama.”
^ Na Greke: “bwila.”
^ Tala Yina ya zola zonza.
^ Na Greke: “samu ya fwanana na.”
