Na Bafilipi 4:1-23
4 Bampangi ya munu yina mu ke zolaka mingi mpe yina mu talaka ntama, beno ke kilengi ya munu, mpe beno ke mutindu yimpu* samu na munu. Bampangi ya luzolo, mu ke na lombaka na beno na kuvanda ya kukangama na Mfumu.
2 Mu ke na lombaka na Evodi na Sentishe na kuwisana mutindu ya me lunga na bilandi ya Mfumu.
3 Mu ke na lombaka mpe na nge, mpangi ya munu ya kisalu, na kulemba ve na kusadisa bakento yayi, yina me sala kintwadi na munu na kumwangisa nsangu ya mbote, kintwadi na Klema mpe na bampangi nyonso yina me bikana, yina bankumbu ya bawu ke ya kusonama na buku ya luzingu.
4 Beno vanda ntangu nyonso na kilengi samu na Mfumu. Mu ke na zonzaka dyaka, beno vanda na kilengi!
5 Bika ti bukati-kati* ya beno talana na meso ya bantu nyonso. Mfumu ke pene-pene.
6 Beno kuvanda ve na manyongi, kasi beno sambila Nzambi ntangu nyonso. Na mambu nyonso, beno bondila Nzambi samu yandi twadisa beno, mpe beno vutula yandi ntangu nyonso matondo.
7 Kana beno sala yawu, kizunu ya Nzambi yina me lutila nyonso yina beto lenda bakula, ke bumba bantima ya beno mpe makanisi* ya beno na nzila ya Kristo Yesu.
8 Na kumanisa, bampangi, beno tatamana na kukanisa* na mambu nyonso yina ke ya tsyeleka, na mambu nyonso yina ba lenda zitisa, na mambu nyonso yina ke ya lunungu, na mambu nyonso yina ke ya bunkete,* na mambu nyonso yina ke nataka na luzolo, na mambu nyonso yina ke ve ya nsoni, na mambu nyonso yina ke ya mbote, mpe na mambu nyonso yina me bonga kuzwa lukumu.
9 Mambu yina beno longokaka, yina beno ndimaka, yina beno kuwaka mpe yina beno talaka na munu, beno sala yawu, mpe Nzambi ya kizunu ke vanda na beno.
10 Mu ke na kilengi mingi mpe mu ke na vutulaka matondo na Mfumu samu beno lakisaka dyaka ti beno ke kanisaka na munu. Ata ti ntangu nyonso beno vanda kanisaka na munu, beno kuzwaka ve ntangu ya kulakisa munu yawu.
11 Mu ke na zonzaka ve yawu samu mu ke na nsatu ya lubakusu. Mu me longoka kusepela na yina mu ke na yawu na mambu nyonso.
12 Mu me longoka kuzinga na bima fioti mpe na bima mingi. Na mambu nyonso, mu me longoka yinki zola zonza kuvanda ya kufuluka, mpe kuvanda na nsatu, kuvanda na bima mingi mpe kuvanda ve na bima mingi.
13 Na mambu nyonso, mu ke na ngolo yina ke katukaka na Nzambi, muntu yina ke pesaka munu ngolo yina mu ke na yawu nsatu.
14 Kasi beno salaka mambu ya mbote ntangu beno vandaka na munu na kati ya bampasi ya munu.
15 Ya tsyeleka, beno bantu ya Filipi, beno me zaba mpe ti ntangu beno kuwaka nsangu ya mbote na mbala ya ntete, ntangu mu katukaka na Masedwane, kaka ni kimvuka ya beno ndimaka kusadisa munu.
16 Ntangu mu vandaka na Tesalonika, beno filisaka munu bima yina mu vandaka na yawu nsatu, kaka mbala mosi ve, kasi bambala zole.
17 Mu ke na sosaka ve makabu, kasi mu ke kaka na nsatu beno kuzwa difuta yina kifu ya kukabulaka ke nataka.
18 Mu ke na bima nyonso yina mu ke na yawu nsatu, mpe mu ke na yawu ya kulutila. Mu vandaka na kilengi mingi ntangu mu yambaka bima yina beno filisaka munu na nzila ya Epafrodite. Dikabu ya beno ke mutindu munkayulu ya nsunga ya kitoko yina ke sepelisaka Nzambi.
19 Nzambi ke sadila bimvwama ya yandi ya nene samu na kupesa beno nyonso yina beno ke na yawu nsatu na nzila ya Kristo Yesu.
20 Nkembo vanda mvula na mvula na Nzambi, Tata ya beto. Ameni.
21 Beno pesa bambote ya munu na basantu nyonso yina ke na bumosi na Kristo Yesu. Bampangi yina ke na munu me filisa beno bambote.
22 Basantu nyonso, mingi-mingi ba yina ke na yinzo ya Sezare, me filisa beno bambote.
23 Bika ntima ya kulutila mbote ya Mfumu Yesu Kristo vanda na beno, ntangu beno ke na lakisaka bifu ya mbote.
