Na Bagalate 1:1-24
1 Ni munu Polo yina ke ntumwa na luve ya bantu ve, to na lusalusu ya muntu ve, kasi na lusalusu ya Yesu Kristo mpe ya Tata yina vumbulaka yandi na lufwa.
2 Kintwadi na bampangi nyonso yina ke na munu, beto ke na sonikilaka bimvuka ya Galate:
3 Bika ti ntima ya kulutila mbote mpe kizunu ya Nzambi Tata ya beto, mpe ya Mfumu Yesu Kristo, vanda na beno.
4 Yandi pesaka nzutu ya yandi samu na masumu ya beto, samu na kuvuukisa beto na yinza ya yimbi yayi, na mutindu yina ke ya kukwelana na luzolo ya Nzambi, Tata ya beto.
5 Bika ti yandi kuzwa nkembo mvula na mvula. Ameni.
6 Ya ke na kamwisaka munu na kutala ti beno me balula mukongo na mbangu na muntu yina bokilaka beno na ntima ya kulutila mbote ya Kristo, mpe beno me banda kulanda nsangu ya mbote ya mutindu ya nkaka.
7 Ya ke ve dyaka na nsangu ya mbote ya nkaka. Kasi ya ke na bantu ya nkaka yina ke na tulaka muvusu na kati ya beno mpe ke na sosaka kutengimisa nsangu ya mbote na yina me tadila Kristo.
8 Kasi ata kana mosi ya beto to mbazi yina me katuka na mazulu me kwiza zonzila beno nsangu ya mbote ya mambu yina ke ve faso mosi na nsangu ya mbote yina beto zonzilaka beno, bika yandi vanda ya kuloka.
9 Mutindu beto vanda me zonza yawu, mu ke na zonzaka dyaka yawu, muntu nyonso yina ke zonzila beno nsangu ya mbote yina ke ve faso mosi na mambu yina beno ndimaka, bika yandi vanda ya kuloka.
10 Ntangu yayi, ya ke kwandi ni bantu mu ke na sosaka kundimisa, to Nzambi? To ni bantu kwandi mu ke na sosaka kusepelisa? Kana mu vanda tatamana na kusepelisa bantu, mu zola vanda ve kisadi ya Kristo.
11 Bampangi mu zola beno zaba ti nsangu ya mbote yina mu me zonzila beno me katuka ve na bantu,
12 samu mu kuzwaka ve yawu na muntu mpe ba longaka ve munu yawu. Kasi ni Yesu Kristo muntu lakisaka munu yawu.
13 Ya tsyeleka, beno kuwaka nsangu ya ndyatulu yina mu vandaka na yawu ntangu mu vandaka na dibuundu ya Bazwife. Na tiya nyonso* mu vanda tatamana na kukwamisa dibuundu ya Nzambi mpe kumwangisa yawu.
14 Mu vanda kula mingi na mambu yina me tadila dibuundu ya Bazwife, kulutila bantu mingi yina beto vandaka bamvula mosi na bwala ya munu. Mu vandaka na tiya mingi na yina me tadila bansalulu ya bankooko ya munu.
15 Kasi Nzambi yina me sala ti mu butuka mpe yina bokilaka munu na nzila ya ntima ya yandi ya kulutila mbote, talaka ti ya ke mbote
16 na kulakisa Mwana ya yandi na nzila ya munu samu mu zonzila nsangu ya mbote na yina me tadila yandi na makanda. Mu kwenda sosa ve dikanisi ya muntu* na ntangu yina.
17 Mu kwendaka mpe ve na Yeruzalemi na bantu yina vandaka bantumwa tekila munu. Kasi mu kwendaka na Arabia, mpe na manima mu vutukaka na Damase.
18 Bamvula tatu na manima, mu kwendaka na Yeruzalemi samu na kutala Sefase,* mpe mu lutisaka bilumbu 15 na yandi.
19 Mu kutanaka ve na bantumwa ya nkaka, kasi mu kutanaka kaka na Zaki, mpangi ya Mfumu.
20 Na yina me tadila bamambu yina mu ke na sonikilaka beno, mu ke na zengaka ndefi na mantwala ya Nzambi ti mu ke na vunaka ve.
21 Na manima, mu kwendaka na kizunga ya Siri mpe ya Silisi.
22 Kasi bimvuka yina vandaka na bumosi na Kristo na Zude, zabaka ve munu.
23 Ba vanda kuwaka kaka ti: “Bakala yina vanda kwamisaka beto ke na zonzilaka ntangu yayi nsangu ya mbote na yina me tadila kiminu yina yandi vanda sosaka kufwa.”
24 Na yawu, ba bandaka kupesa nkembo na Nzambi samu na munu.
Banote
^ Na Greke: “Tiya mosi ya kuluta bandilu.”
^ Na Greke: “Ya nzutu, to menga.”
^ Yina ba vanda bokilaka mpe Piere.
