Na Bagalate 2:1-21
2 Na manima ya bamvula 14, mu vutukaka na Yeruzalemi na Barnabasi, mpe mu nataka Tite na munu.
2 Mu kwendaka kuna samu mu kuzwaka luzabusu, mpe mu zonzilaka bawu nsangu ya mbote yina mu ke na samunaka na kati ya makanda. Mu zonzilaka ve bawu yawu na meso ya bantu nyonso, kasi mu salaka yawu na mantwala ya bantu yina ba ke zitisaka mingi samu na kuzaba kana mu kimaka ve mbangu, to mu kimaka ve mbangu ya mpamba.
3 Ata ti, Tite yina kwendaka na munu vandaka Mugreke, ba nataka ve yandi na ngolo na kuzengisa kibakala.
4 Ni bampangi ya luvunu yina kotaka na kimvuka basisaka mambu yayi. Ba vanda sosa kubebisa kimpwanza yina ke na beto samu beto ke na bumosi na Kristo Yesu. Ba vanda sosa kunata beto na ngolo samu beto vanda dyaka bangaamba ya Musiku.
5 Beto pesaka ve bawu nzutu, beto tumamaka ve na bawu, ata samu na ntangu fioti, samu matsyeleka ya nsangu ya mbote vanda kaka ya kusikama na kati ya beno.
6 Kasi na yina me tadila ba yina vanda tala ti ba ke mfunu, kuzaba wapi mutindu ya bantu ba kele ke ve mfunu samu na munu, samu ti Nzambi ke talaka ve muntu mutindu yandi ke talanaka na meso ya bantu. Ya tsyeleka, bantu yayi yina beno ke pesaka buzitu mingi me lakisa munu ata kima ya malu-malu.
7 Kasi ntangu ba talaka ti ba pesaka munu kisalu ya kuzonzila nsangu ya mbote na bantu yina vandaka ve ya kuzenga kibakala, kaka mutindu ba pesaka yawu na Piere samu na bantu yina vandaka ya kuzenga kibakala,
8 samu muntu yina pesaka Piere ngolo ya kuvanda ntumwa samu na bantu yina ke ya kuzenga kibakala, ni yandi mpe pesaka munu ngolo ya kuvanda ntumwa samu na bantu ya makanda.
9 Ntangu ba kwizaka zaba ti Nzambi lakisaka munu ntima ya kulutila mbote, Zaki, Sefase, mpe Yoane, ba yina ke mutindu bapoto yina ke simbaka yinzo samu na kimvuka, pesaka Barnabasi na munu diboko ya bakala samu na kulakisa ti ba me ndima ti beto kwenda na bantu ya makanda, mpe bawu na bantu yina ba zengaka kibakala.
10 Mambu nyonso yina ba lombaka na beto na kusala vandaka ni na kukanisa na bamputu.* Mpe na ntima ya munu nyonso mu ke na salaka bangolo na kulungisa yawu.
11 Ntangu Sefase* kwizaka na Antyose mu teleminaka yandi samu mambu yina yandi vanda sala vandaka yimbi.
12 Ya tsyeleka, ntangu bantu yina Zaki filisaka vandaka nabunu ba kuma, yandi vanda kudya na bantu ya makanda. Kasi ntangu ba kumaka, yandi bikaka kudya na bawu mpe yandi bendaka nzutu samu yandi vandaka na boma ya bantu yina vandaka ya kuzenga kibakala.
13 Bazwife ya nkaka mpe landaka yandi. Ata Barnabasi mpe landaka bawu.
14 Kasi ntangu mu talaka ti ba vanda tambula ve na matsyeleka ya nsangu ya mbote, mu zonzaka na Sefase* na mantwala ya bantu nyonso: “Kana nge, ata ti nge ke Zwife, nge ke na zingaka mutindu muntu ya makanda, kasi ve mutindu Zwife, wapi mutindu nge lenda nata na ngolo bantu ya makanda na kusadila bansalulu ya Bazwife na luzingu ya bawu?”
15 Beto ba yina butukaka na dikanda ya Bazwife, beto ke ve bantu ya masumu yina me katuka na makanda.
16 Beto zaba ti Nzambi ke ndimaka muntu mutindu muntu ya lunungu* na nzila ya bisalu ya musiku ve, kasi kaka na nzila ya kiminu na Yesu Kristo. Na yawu, beto me tula kiminu ya beto na Kristo Yesu, samu Nzambi ndima beto mutindu bantu ya lunungu na nzila ya kiminu na Kristo, kasi na nzila ya bisalu ya musiku ve. Nzambi lenda ndima ata muntu mosi ve mutindu muntu ya lunungu na nzila ya bisalu ya musiku.
17 Ntangu yayi, kana ba me tala beto mutindu bantu ya masumu samu beto ke na sosaka kuvanda bantu ya lunungu* na nzila ya Kristo, ya zola zonza kwandi ti Kristo ke kisadi ya disumu? Ata fioti ve.
18 Kana mu tunga dyaka bima yina mu mwangisaka na ntama, mu ke lakisa ti mu ke muntu yina ke vwezaka musiku.
19 Na nzila ya musiku mu ke ya kufwa na yina me tadila musiku, samu na kukuma moyo samu na Nzambi.
20 Ba ke ya kutula munu na zulu ya yinti na Kristo. Ya ke dyaka ve ni munu muntu ke na zingaka, kasi ni Kristo muntu ke na zingaka na bumosi na munu. Ya tsyeleka, luzingu yina mu ke na yawu ntangu yayi na kinsuni, mu ke na zingaka yawu na nzila ya kiminu na Mwana ya Nzambi, Mwana ya Nzambi yina zolaka munu mpe pesaka luzingu ya yandi samu na munu.
21 Mu me manga ve* ntima ya kulutila mbote ya Nzambi, samu kana mambu ya lunungu* ke kwizaka na nzila ya musiku, ya zola zonza ti Kristo kufwaka kaka ya mpamba.
Banote
^ To: “Ba pauvres.”
^ Yina ba ke bokilaka mpe Piere.
^ Yina ba ke bokilaka mpe Piere.
^ To: “Kudedama.”
^ To: “Kudedama.”
^ To: “Pesa ve mukongo na.”
^ To: “Kudedama.”
