Na Bagalate 3:1-29
-
Bisalu ya Musiku mpe kiminu (1-14)
-
“Muntu ya lunungu ke zinga samu na kiminu” (11)
-
-
Nsilulu ya Abrahami ke ve ya kuvanda na zulu ya musiku (15-18)
-
Kristo, mwana ya Abrahami (16)
-
-
Kisika musiku katukaka mpe mfunu ya yawu (19-25)
-
Bana ya Nzambi na nzila ya kiminu (26-29)
-
Bana ya Abrahami, ba yina ke bantu ya Kristo (29)
-
3 O bantu ya Galate, beno ke bazoba! Nani me vuna beno, beno ba yina ba lakisaka pwelele mutindu ba tulaka Yesu Kristo na zulu ya yinti?
2 Mu ke na kyuvu kaka mosi ya kuyufula beno: “Beno kuzwaka kwandi mpeve na nzila ya bisalu ya musiku, to samu beno vandaka na kiminu na bamambu yina beno kuwaka?
3 Buzoba ya beno ke kwandi ya kulutila? Samu na manima ya kubanda kutambula na bumosi na ngolo ya mpeve ya Nzambi, beno ke manisa kwandi na kinsuni?*
4 Ya ke kwandi ya mpamba beno me tala mpasi mingi? Mu lenda ndima ve ti ya me vanda ya mpamba.
5 Na yawu, muntu yina ke pesaka beno mpeve, mpe yina ke salaka bamambu ya ngitukulu na kati ya beno, ke na salaka kwandi yawu samu na bisalu ya musiku yina beno ke na salaka, to samu na kiminu yina beno me lakisa na mambu yina beno kuwaka?
6 Kaka mutindu Abrahami “kwikilaka na Yehova, mpe ya salaka ti Nzambi bakila yandi mutindu muntu ya lunungu.”*
7 Ya tsyeleka, beno zaba ti kaka ba yina ke ya kukangama na kiminu ke bana ya Abrahami.
8 Banda ntama Nzambi zonzaka na kati ya masonoko ya yandi ti yandi ke ndima bantu ya makanda mutindu bantu ya lunungu* na nzila ya kiminu. Na yawu yandi zonzilaka nsangu ya mbote yayi na Abrahami na mantwala: “Makanda nyonso ke kuzwa balusakumunu na nzila ya nge.”
9 Ni na yawu, bantu yina ke ya kukangama na kiminu ke na kuzwaka lusakumunu kintwadi na Abrahami muntu yina vandaka na kiminu.
10 Ba yina nyonso ke tulaka ntima na bisalu ya musiku, ba ke ya kuloka. Samu ya ke ya kusonama: “Bika ti muntu nyonso yina landaka ve mambu nyonso yina ke ya kusonama na rulo ya Musiku mpe ke zitisaka ve yawu, vanda ya kuloka.
11 Dyaka, ya ke ya tsyeleka ti Nzambi ke ndimaka ve muntu mutindu muntu ya lunungu* na nzila ya musiku, samu “muntu ya lunungu ke zinga samu na kiminu ya yandi.”
12 Musiku ke ve ya kuvanda na zulu ya kiminu. Kasi “muntu nyonso yina ke salaka bamambu yayi ke zinga na nzila ya yawu.”
13 Ya ke ya kusonama mpe ti: “Bika ti muntu nyonso yina ba me tula na zulu ya yinti vanda ya kuloka.” Na kukumaka ndoko na kisika ya beto, Kristo katulaka beto na ndoko yayi ya Musiku. Ni na mutindu yina, yandi sumbaka beto.
14 Ya salamaka mutindu yina samu makanda nyonso kuzwa lusakumunu ya Abrahami na nzila ya Kristo Yesu. Samu ti na nzila ya kiminu ya beto, beto kuzwa mpeve yina ba pesaka nsilulu.
15 Bampangi, mu ke na sadilaka kifwani ya mambu mosi yina ke na salamaka konso kilumbu samu na kuzonza na beno, ntangu luwawanu ke salamaka, ata kaka ni muntu mosi me sala yawu, muntu mosi ve lenda kufwa yawu to kubwela mambu na zulu ya yawu.
16 Ba pesaka nsilulu na Abrahami mpe na mwana* ya yandi. Ya ke zonzaka ve, “mpe na mitekolo* ya yandi,” na mutindu yina me tadila bantu mingi. Kasi ya ke zonzaka, “mpe na mwana ya yandi,” na mutindu yina me tadila muntu mosi, yina ke Kristo.
17 Mu ke na zonzaka dyaka mambu yayi: Musiku yina basikaka bamvula 430 na manima, me kufwa ve luwawanu yina Nzambi ndimaka, ya me kufwa mpe ve nsilulu.
18 Kana dikabu ke ya kuvanda na zulu ya musiku, ya ke dyaka ve ya kuvanda na zulu ya nsilulu. Kasi na luzolo nyonso, Nzambi pesaka yawu na Abrahami na nzila ya nsilulu.
19 Na yawu, samu na yinki Nzambi pesaka Musiku? Ya vandaka samu na kubasisa pwelele mambu ya kuvweza musiku, tii ntangu mwana* yina ba pesaka nsilulu zola kwiza. Musiku yango ba pesaka yawu na nzila ya bambazi, na maboko ya muntu yina ke vutulaka kindiku na kati ya bantu.
20 Muntu yina ke vutulaka kindiku na kati ya bantu ke vandaka ve mfunu kana ya me tadila kaka muntu mosi. Kasi Nzambi ke kaka mosi.
21 Ya zola zonza kwandi ti Musiku me kanga bansilulu ya Nzambi nzila? Samu kana ba pesaka bantu musiku yina lenda pesa luzingu, Nzambi zola tadila bantu nyonso mutindu bantu ya lunungu* na nzila ya musiku yina.
22 Kasi Dyambu ya Nzambi tulaka bima nyonso na yisi ya lutumu ya disumu, samu ba yina ke na kiminu kuzwa bima ya mbote yina ba pesaka nsilulu na ba yina ke na kiminu na Yesu Kristo.
23 Kasi, tekila kiminu kwiza, musiku vanda kengidila beto. Ya vandaka ya kukanga beto mutindu bangaamba, mpe beto zola vingila kiminu yina zola talana.
24 Na yawu Musiku kumaka ntwadisi* yina ke nataka na Kristo, samu Nzambi ndima beto mutindu bantu ya lunungu* na nzila ya kiminu.
25 Kasi ntangu yayi yina kiminu ya tsyeleka me kwiza, beto ke dyaka ve na nsatu musiku twadisa beto.
26 Ya tsyeleka, beno nyonso beno ke bana ya Nzambi na nzila ya kiminu ya beno na Kristo Yesu.
27 Samu beno nyonso yina kuzwaka mbotokolo na Kristo, beno lwataka Kristo.
28 Zwife kele ve, Mugreke kele ve, kisadi kele ve, muntu ya kimpwanza kele ve, bakala kele ve, kento mpe kele ve. Samu beno nyonso ke kaka muntu mosi na bumosi na Kristo Yesu.
29 Dyaka, kana beno ke bantu ya Kristo, beno ke ya tsyeleka bana* ya Abrahami, bantu yina ke kuzwa dikabu yina ba pesaka na nsilulu.
Banote
^ Na Greke: “Beno ke na kumaka kwandi ya kulunga na kinsuni?”
^ To: “Kudedama.”
^ To: “Kudedama.”
^ To: “Kudedama.”
^ Na Greke: “Mbuma”
^ Na Greke: “Bambuma.”
^ Na Greke: “Mbuma.”
^ To: “Kudedama.”
^ Nzonzolo yayi na ndinga ya Greke ke lakisaka “muntu yina ke kengidilaka to yina ke bumbaka bana.”
^ To: “Kudedama.”
^ Na Greke: “Mbuma.”
