Na Bagalate 4:1-31
4 Kana muntu yina ke kuzwa* dikabu ke ntete mwana ya fioti, ata ti bima nyonso ke ya yandi, yandi me lutila ata fioti ve kisadi ya yinzo, ya ke ve mutindu yina?
2 Yandi ke vanda na yisi ya bantu yina ke kengidilaka yandi mpe yina ke kipeke yinzo ya yandi tii kilumbu yina tata ya yandi soolaka.
3 Mutindu mosi, beto mpe ntangu beto vandaka bana, beto vandaka bangaamba ya bamambu ya fioti-fioti ya yinza.
4 Kasi, ntangu ntangu lungaka, Nzambi filisaka Mwana ya yandi yina butukaka na kento mosi, mpe mwana yango vandaka na yisi ya musiku,
5 yandi futaka ntalu ya kupesa kimpwanza na ba yina ke na yisi ya musiku, samu Nzambi ndima beto mutindu bana ya yandi.
6 Samu beno ke bana, Nzambi me filisa mpeve ya Mwana ya yandi na kati ya bantima ya beto, mpe mpeve yango ke na zonzaka na ndinga ya ngolo: “Abba,* Tata!”
7 Na yawu, nge ke dyaka ve ngaamba, kasi nge ke mwana. Kana nge ke mwana, nge ke mpe muntu yina ke kuzwa dikabu na nzila ya Nzambi.
8 Kasi ntangu beno zabaka ve Nzambi, beno vandaka bangaamba ya banzambi yina ke ve ya tsyeleka.
9 Kasi ntangu yayi beno me zaba Nzambi, to Nzambi me zaba beno. Na yawu, wapi mutindu beno ke na sosaka dyaka kulanda bima ya kukondwa mfunu ya yinza yayi?
10 Ya tsyeleka, beno ke zitisaka mbote-mbote bilumbu, bangonda, bantangu mpe bamvula.
11 Mu ke na boma ti bangolo nyonso yina mu me sala samu na beno, vanda kaka ya mpamba.
12 Mu ke na bondilaka beno bampangi, beno kuma mutindu mu kele, samu munu mpe mu vandaka mutindu beno kele. Beno salaka ve munu yimbi.
13 Kasi beno zaba ti ni kimbevo salaka ti mu kwiza zonzila beno nsangu ya mbote mbala ya ntete.
14 Ata ti ya vandaka mpasi samu na beno na kutala munu na kimbevo yayi, beno vwezaka ve munu, mpe beno talaka ve munu nganzi. Kasi beno yambaka munu mutindu mbazi ya Nzambi, mutindu Kristo Yesu.
15 Wapi kisika me kwenda kilengi yina vandaka na beno? Mu ke na pesaka kimbangi samu na beno ti, beno zola katula bameso ya beno samu na kupesa munu yawu, kana beno vandaka na makoki ya kusala yawu.
16 Mu me kuma kwandi mbeni ya beno samu mu ke na zonzilaka beno matsyeleka?
17 Kasi, ba ke na sosaka kununga beno na dikanisi ya yimbi. Ba ke na sosaka kunata beno ntama na munu, samu beno vanda na nsatu ya ngolo ya kulanda bawu.
18 Ya ke vanda ntangu nyonso mbote kana muntu ya nkaka ke na sosaka kununga beno, kaka kana ni dikanisi ya mbote ke na nataka yandi na kusala yawu, mpe ya zola salama ve kaka ntangu mu ke na beno.
19 Bana ya munu, mu ke na talaka dyaka mpasi samu na beno. Mpe mpasi yayi ke na munu ke mutindu mpasi ya misongo yina kento ke vandaka na yawu. Na yawu, mu ke tatamana na kutala mpasi yayi tii ntangu kimuntu ya Kristo ke talana na beno.
20 Mu ke na nsatu ya ngolo ya kuvanda na beno ntangu yayi, mpe kuzonzila beno na mutindu ya nkaka. Samu mu zaba ve yinki ya kukanisa samu na beno.
21 Beno bantu yina ke zolaka kuvanda na yisi ya musiku beno zonza na munu. Beno ke kuwaka ve mambu Musiku ke zonzaka?
22 Na kifwani, ya ke ya kusonama ti Abrahami butaka bana zole. Mosi na kento yina vandaka kisadi, mpe ya nkaka na kento ya kimpwanza.
23 Kasi mwana yina butukaka na kento yina vandaka kisadi, butukaka mutindu bantu nyonso ke butukaka,* mpe mwana yina butukaka na kento ya kimpwanza, butukaka na nzila ya nsilulu.
24 Bamambu yayi ke kifwani ya bamambu yina ke kwiza na mantwala. Bakento yayi ke na fwanisaka baluwawanu zole. Mosi ya mongo ya Sinayi, yandi ke na butaka bana samu ba vanda bisadi, mpe ya ke ni Agare.
25 Agare ke fwanisaka Sinayi, mongo mosi na bwala ya Arabia, mpe yandi me fwanana na Yeruzalemi ya bubu yayi, samu yandi na bana yandi ke bisadi.
26 Kasi Yeruzalemi ya mazulu ke na kimpwanza. Mpe ni yandi ke mama ya beto.
27 Samu ya ke ya kusonama ti: “Vanda na kilengi, nge kento yina ke butaka ve. Yangalala, nge kento yina nabunu nge kuzwa misongo. Samu bana ya kento yina ba losaka ke mingi kuluta bana ya kento yina ke na bakala.”
28 Ntangu yayi bampangi, beno ke bana ya nsilulu kaka mutindu Izaki vandaka.
29 Kaka faso mwana yina butukaka mutindu bana nyonso ke butukaka* bandaka kukwamisa mwana yina butukaka na nzila ya mpeve, ya ke mpe mutindu mosi ntangu yayi.
30 Kasi yinki masonoko ke zonzaka? “Bingisa kento yina ke kisadi na mwana ya yandi. Samu mwana ya yandi ke kuzwa ata fioti ve dikabu kintwadi na mwana ya kento ya kimpwanza.”
31 Na yawu bampangi, beto ke ve bana ya kento yina ke kisadi, kasi beto ke bana ya kento ya kimpwanza.
Banote
^ To: “Byadila.”
^ Nzonzolo yayi ke na ndinga ya Ki-Ebre to na Ki-Arami. Ya zola zonza: “O Tata.”
^ Na Greke: “Na kinsuni.”
^ Na Greke: “Na kinsuni.”
