Na Bagalate 5:1-26
5 Kristo salaka ti beto vanda dyaka ve bangaamba ya musiku. Ni na yina, beno telama ngolo. Beno ndima dyaka ve ti beno vutuka bangaamba.
2 Beno tala! Munu Polo, mu ke na zonzaka na beno ti, kana beno zengisa kibakala, Kristo ke vanda dyaka ve mfunu samu na beno.
3 Mu ke na zonzaka dyaka na muntu nyonso yina ke na zengisaka kibakala ti yandi fwana kuzitisa Musiku nyonso.
4 Beno ke ya kukabuka na Kristo, beno bantu yina ke na sosaka ti Nzambi ndima beno mutindu bantu ya lunungu* na nzila ya musiku. Beno me pesa mukongo na ntima ya yandi ya kulutila mbote.
5 Beto ke na vingilaka na kukuma bantu ya lunungu* na meso ya Nzambi, na mutindu yina ya lenda salama kaka na nzila ya mpeve ya santu mpe na nzila ya kiminu ya beto.
6 Samu na ba yina ke na bumosi na Kristo, ya ke ve ni kuzengisa kibakala to kuzengisa ve kibakala muntu ke mfunu. Kasi ni kiminu yina ke salaka na nzila ya luzolo ke mfunu.
7 Beno vanda kimaka mbote. Nani kangaka beno nzila ya kutatamana na kutumama na matsyeleka?
8 Makanisi ya mutindu yayi me katuka ve na Muntu yina ke na bokilaka beno.
9 Mwa ndambu ya levire ke vimbisaka pate nyonso.
10 Mu ke na kundima ti, beno bantu yina ke na bumosi na mfumu, beno ke kanisa ve na mutindu ya nkaka. Kasi muntu yina ke kotisa muvusu na kati ya beno ata nani yandi kele, yandi ke kuzwa kitumbu yina me lunga na yandi.
11 Bampangi ya kento na ya bakala, kana mu ke na longaka ntete kuzengisa kibakala, ba zola kwamisa ve munu. Mpe malongi ya munu na yina me tadila lufwa ya Yesu na zulu ya yinti ya mpasi* zola budisa dyaka ve bantu dibaku.
12 Mu zola ti ba yina ke na salaka muvusu na kati ya beno, zenga binama ya bawu yina ke sadisaka na kubuta.*
13 Bampangi, ba bokilaka beno na kimpwanza, kasi beno sadila ve kimpwanza yango mutindu nzila ya kulungisa bansatu ya kinsuni. Kasi na luzolo nyonso, beno sala mutindu bangaamba samu na bampangi.
14 Samu Musiku nyonso ke ya kulungana* na musiku kaka mosi yayi: “Nge fwana kuzola mpangi ya nge mutindu nge mosi.”
15 Kasi kana beno tatamana na kulwalisa* mpe na kutalisa bampangi mpasi, beno keba, samu beno lenda kufwa bampangi beno na beno.
16 Mu ke na zonzaka na beno: Beno tatamana na kutambula na mpeve, mpe beno ke lungisa ata fioti ve bansatu ya kinsuni.
17 Nzutu samu na bansatu ya yawu, ke teleminaka mpeve, mpe mpeve ke teleminaka nzutu. Bawu nyonso zole ke wisanaka ve. Ni na yawu, mambu yina beno ke na nsatu ya kusala, beno ke salaka ve yawu.
18 Dyaka, kana beno ke na bikaka mpeve twadisa beno, beno ke ve na yisi ya musiku.
19 Bisalu ya kinsuni ke talanaka pwelele. Ya kele: kinsuza,* mambu ya mvindu, mambu ya yimbi ya kukondwa nsoni,*
20 kusambila biteki, bunganga,* kuyiina bampangi, kuswana, kimbanda, nkele ya kulutila, kukondwa kuwisana, kukabuka, kulanda malongi ya bantu,
21 kusosa kuzwa bima ya bampangi, kukola malafu, mikembo ya kidi-kidi, mpe bamambu ya nkaka ya mutindu yayi. Na bamambu yayi, mu ke na kebisaka beno, mutindu mu kebisaka ntete beno, ti ba yina ke salaka bamambu ya mutindu yayi ke kota ve na Kimfumu ya Nzambi.
22 Kasi mbuma ya mpeve kele, luzolo, kilengi, kizunu, ntima ya yinda, ntima ya mbote, bumbote, kiminu,
23 lembami, kuzaba kukutika nzutu. Ya ke ve na musiku yina ke teleminaka bamambu yayi.
24 Dyaka, ba yina ke bantu ya Kristo Yesu, komaka na zulu ya yinti nzutu mpe bansatu ya yawu ya ngolo mpe mambu yina nzutu ke zolaka.
25 Kana beto ke zingaka na mpeve, bika beto tatamana mpe na kutambula na mutindu yina ke ya kulunga na lutwadusu ya mpeve.
26 Beto fwana kuvanda ve na lunangu, beto bika kusombola bampangi, beto bika kuvanda na musoki na kati ya beto.
Banote
^ To: “Kudedama.”
^ To: “Kudedama.”
^ Tala Yina ya zola zonza.
^ To: “Kukikumisa kisita, yina zola sala ti ba lenda dyaka ve kundima musiku yina ba vanda ndimaka.”
^ To ya lenda vanda: “Me kangama.”
^ To: “Kutatika.”
^ Na Greke, por·nei′a. Tala Yina ya zola zonza.
^ Tala Yina ya zola zonza.
^ To: “Kindoki, bakisi.”
