Na Bagalate 6:1-18
6 Bampangi kana muntu me sala mambu ya yimbi yina yandi ke ve na zabaka, beno ba yina ke na makoki ya kimpeve, beno sosa kusungika muntu yina na ntima ya lembami. Kasi sala keba na nge mosi samu nge mpe kubwa ve.
2 Beno tatamana na kunata kilo* ya bampangi. Na kusalaka mutindu yina, beno ke lungisa musiku ya Kristo.
3 Kana muntu ke na talaka ti yandi ke mfunu kasi yandi ke muntu ya mpamba, yandi ke na vunamaka.
4 Kasi konso muntu fwana kufyongonina bamambu yina yandi mosi ke salaka. Na yawu, yandi ke vanda na mambu yina ke sala ti yandi vanda na kilengi samu na yandi mosi, kasi ve na kufwanisaka mambu yina yandi ke salaka na yina muntu ya nkaka ke salaka.
5 Samu konso muntu ke nata kilo ya yandi.
6 Dyaka, konso muntu yina ba ke na longaka dyambu ya Nzambi fwana kukabula bima nyonso ya mbote na muntu yina ke na pesaka malongi yina.
7 Beno kuvunama ve: Ba ke sekaka ve Nzambi. Samu ti konso muntu ke kuzwa bambuma ya bima yina yandi me kunda.
8 Muntu yina ke landaka bansatu ya kinsuni ke kuzwa lufwa.* Kasi muntu yina ke landaka mpeve ya Nzambi ke kuzwa luzingu ya ntangu nyonso yina ke katukaka na mpeve yango.
9 Na yawu, beto lemba* ve na kusala mambu ya mbote. Samu kana beto lemba ve, beto ke kuzwa bambuma na ntangu yina me fwanana.
10 Ni na yawu, ntangu nyonso beto ke na makoki ya kusala mambu ya mbote, beto sala yawu na bantu nyonso, kasi mingi-mingi na bampangi ya beto na kiminu.
11 Beno tala mutindu mu me sonikila beno na bisoni ya nene na diboko ya munu mosi.
12 Ba yina nyonso ke na sosaka kutalana bantu ya mbote na kinsuni, ni bawu ke na sosaka kunata beno na kuzenga kibakala na ngolo. Ba ke na salaka yawu kaka samu ba bika kutalisa bawu mpasi samu na yinti ya mpasi* ya Kristo.
13 Ata ba yina ke na zengisaka kibakala ke tatamanaka ve na kutumama na Musiku. Kasi ba zola ti beno, beno zengisa kibakala samu ba kuzwa mambu ya kubudila ntulu na nzutu ya beno.
14 Mu ke bula ntulu ata fioti ve, kasi mu lenda sala yawu kaka samu na yinti ya mpasi* ya Mfumu ya beto Yesu Kristo. Ni na nzila ya yandi ba kufwaka* yinza samu na munu, mpe munu samu na yinza.
15 Kuvanda ya kuzengisa kibakala to kuvanda ve ya kuzengisa kibakala ke ve mfunu. Kasi kima yina ke mfunu ni kuvanda kima ya malu-malu yina Nzambi me yidika.
16 Bika ti ba yina nyonso ke na tambulaka na mutindu ya kufwanana na musiku yayi, ee, Izraele ya Nzambi, vanda na kizunu mpe bika ti Nzambi lakisa bawu ntima ya kyadi.
17 Banda ntangu yayi, ata muntu fwana kutalisa dyaka munu mpasi. Samu ti mu ke na nataka na nzutu ya munu bidimbu yina ke na lakisaka ti mu ke kisadi ya Yesu.
18 Bampangi, bika ti ntima ya kulutila mbote ya Mfumu ya beto Yesu Kristo vanda na mpeve yina beno ke na lakisaka. Ameni.
Banote
^ To: “Dema.”
^ Na Greke: “Kubebana.”
^ To: “Kukota madidi.”
^ Tala Yina ya zola zonza.
^ Tala Yina ya zola zonza.
^ To: “Kufwaka na zulu ya yinti ya mpasi.”
