Na Bakolose 1:1-29
1 Ni munu Polo, ntumwa ya Kristo Yesu na nzila ya luzolo ya Nzambi mpe Timote mpangi ya beto.
2 Na basantu mpe na bampangi yina ke ya kukwikama na bumosi na Kristo Yesu na Kolose:
Bika ti ntima ya kulutila mbote mpe kizunu ya Nzambi Tata ya beto vanda na beno.
3 Ntangu nyonso beto ke vutulaka matondo na Nzambi, Tata ya Mfumu ya beto Yesu Kristo, ntangu beto ke sambilaka samu na beno,
4 samu beto kuwaka nsangu ya kiminu ya beno na Kristo Yesu mpe ya luzolo yina beno ke na yawu samu na basantu,
5 samu na kivuvu yina ba me bumbila beno na mazulu. Beno kuwaka ntete nsangu ya kivuvu yayi na nzila ya nsangu ya matsyeleka ya nsangu ya mbote
6 yina kumaka na sika ya beno. Kaka mutindu nsangu ya mbote ke na butaka mbuma mpe ke na kulaka na yinza nyonso, ya ke mpe mutindu mosi na kati ya beno katuka kilumbu yina beno kuwaka mpe beno zabaka mbote-mbote ntima ya kulutila mbote ya Nzambi mutindu ya kele ya tsyeleka.
7 Ni yina beno longokaka na Epafraze, mpangi ya beto yina beto ke zolaka mingi, yina ke ya kukwikama, mpe yina ke salaka mutindu kisadi ya Kristo na kisika ya beto.
8 Yandi me zonza mpe na beto ti mpeve ya santu ke na sadisaka beno na kulakisa luzolo.*
9 Ni na yawu, banda kilumbu yina beto kuwaka yawu, beto me bika ata fioti ve kusambila samu na beno mpe kulomba na Nzambi ti beno vanda ya kufuluka na nzayilu ya matsyeleka na yina me tadila luzolo ya Nzambi, mpe yina beno lenda bakula na lubakusu ya mpeve ya santu.
10 Beno nata luzingu ya beno na mutindu yina me lunga na meso ya Yehova, samu na kusepelisa yandi ntangu beno ke na tatamanaka na kubuta mbuma na konso kisalu ya mbote mpe na kuyela na nzayilu ya matsyeleka ya Nzambi.
11 Beto ke sambilaka mpe ti Nzambi sadila nkembo ya yandi na kupesa beno ngolo ya kulutila, samu beno lenda kukanga ntima na ntima ya yinda mpe kilengi.
12 Beno vutula mpe matondo na Nzambi Tata, samu yandi me bongisa beno na kuzwa dikabu ya basantu yina ke na nsemo.
13 Yandi me katula beto na lutumu ya mpimpa mpe yandi me kotisa beto na Kimfumu ya Mwana yina yandi ke zolaka.
14 Ni na nzila ya Mwana ya yandi ba kuulaka beto na nzila ya ntalu ya kufuta, mpe beto kuzwaka mulemvo ya masumu ya beto.
15 Yandi ke kifwani ya Nzambi yina ke talanaka ve, mwana ya ntete na bima nyonso yina Nzambi yidikaka.
16 Ni na nzila ya yandi ba yidikaka bima nyonso na mazulu, mpe na ntoto, bima yina ke talanaka, bima yina ke talanaka ve, ba yina ke twadisaka, ba yina ke na lutumu, baluyalu mpe bamfumu. Ee, na nzila ya yandi mpe samu na yandi ba yidikaka bima nyonso ya nkaka.
17 Dyaka, yandi kele tekila bima nyonso ya nkaka, mpe bima nyonso ya nkaka me kuzwa luzingu na nzila ya yandi.
18 Yandi ke yintu ya nzutu, yina ke dibuundu, yandi ke kubanda mpe mwana ya ntete yina ba vumbulaka na lufwa, samu yandi kuma muntu ya ntete na bima nyonso,
19 samu Nzambi vandaka na kilengi ya kubika ti yandi vanda ya kulunga na bima nyonso
20 mpe na nzila ya yandi, ya zola zonza na nzila ya menga ya yandi yina yandi mwangisaka na zulu ya yinti ya mpasi,* Nzambi yidikaka bamambu na bima nyonso ya nkaka, ya vanda bima yina ke na ntoto to bima yina ke na mazulu.
21 Ya tsyeleka, beno bantu yina vandaka ntete ntama na Nzambi mpe bambeni ya yandi, samu mabanza ya beno vandaka kaka na mambu ya yimbi,
22 ntangu yayi, yandi me vutula kindiku na kati ya beno na yandi na nzila ya lufwa ya muntu yina pesaka luzingu ya yandi mutindu munkayulu, samu yandi lakisa beno na mantwala ya Nzambi mutindu bantu ya santu, ya kukondwa mvindu mpe yina ba lenda funda ve ata na mambu mosi —
23 ya tsyeleka, ya ke vanda mutindu yina kaka kana beno vanda na lukwikulu, beno kangama ngolo na fondasio, beno vanda ya kusikama, mpe beno kuzimbisa ve kivuvu ya nsangu ya mbote yina beno kuwaka, mpe yina ba longaka na yinza ya muvimba. Ni na nsangu ya mbote yayi munu Polo, mu kumaka kisadi.
24 Ntangu yayi mu ke na sepelaka na bampasi yina mu ke na kutanaka na yawu samu na beno, mpe mu me kanisa ti nabunu mu tala mpasi ya kulutila mutindu nzutu ya Kristo, ya zola zonza kimvuka.
25 Mu ke sadilaka dikanda ya Nzambi samu yandi pesaka munu kisalu yayi. Ya ke samu na mbote ya beno. Ni na yawu, mu ke salaka nyonso yina mu lenda sala na kusamuna mambu ya Nzambi.
26 Ee, samu na kusamuna kinsweki ya santu ya Nzambi. Kinsweki yayi zabanaka ve na yinza mpe na bantu yina zingaka na ntama. Kasi ntangu yayi ba me lakisa yawu na basantu,
27 yina Nzambi talaka mbote na kuzonzila bawu kimvwama ya nkembo ya kinsweki yayi ya santu na kati ya makanda, yina ke Kristo na bumosi na beno, kivuvu ya nkembo ya yandi.
28 Ni yandi beto ke samunaka ntangu beto ke kebisaka bantu nyonso, mpe ke longaka bantu nyonso na mayela nyonso, samu muntu nyonso vanda ya kulunga na bumosi na Kristo.
29 Ni na yawu mu ke na salaka mingi mpe mu ke na nwanaka na lubakusu ya ngolo ya yandi yina ke na salaka na ngolo nyonso na kati ya munu.
