Na Bakolose 2:1-23
2 Mu zola beno zaba wapi mutindu mvita yina mu ke na nwanaka samu na beno, samu na bantu ya Lawodise, mpe samu na ba yina nabunu ba tala munu,* ke nene.
2 Ya ke samu na kukindisa bantima ya bawu mpe samu ba vanda na bumosi na kati ya luzolo mpe samu ba kuzwa bimvwama nyonso yina ke katukaka na kundima ya tsyeleka ya mambu yina ba ke bakulaka, samu na kuzaba mbote-mbote kinsweki ya santu ya Nzambi, yina zola zonza, Kristo.
3 Bimvwama nyonso ya ndwenga mpe ya nzayilu ke ya kubumbana mbote-mbote na yandi.
4 Mu ke na zonzaka mutindu yayi samu ata muntu mosi ve vuna beno na banzonzolo ya kitoko.
5 Ata ti mu ke ve na beno na nzutu, mu ke na beno na mpeve. Mu ke na kilengi na kutala ti beno ke na salaka bamambu na mutindu ya mbote mpe na kiminu ya ngolo yina beno ke na yawu na Kristo.
6 Dyaka, kaka mutindu beno ndimaka Kristo Yesu Mfumu, beno tatamana na kutambula na bumosi na yandi.
7 Kaka mutindu beno longokaka, kiminu ya beno na Kristo fwana kukumisa beno ngolo mpe ya kusikama mutindu yinti yina myanzi ya yawu me kwenda ntama na yisi ya ntoto. Kiminu ya beno fwana kukula ntangu beno ke na vutulaka matondo na Nzambi.
8 Beno sala keba samu ata muntu bwisa beno na mutambu* ya banzonzolo ya luvunu yina ke katukaka ve na Kristo, kasi na malongi ya bantu mpe na bima ya yinza,
9 samu bankadulu* nyonso ya Nzambi ke ya kulunga na kati ya Kristo.
10 Na yawu, beno kuzwaka bima nyonso na nzila ya yandi, muntu yina ke mfumu ya baluyalu nyonso mpe ya balutumu nyonso.
11 Samu beno ke na kiminu na Kristo, ba zengaka beno kibakala. Ba zengaka ve beno yawu mutindu bantu ke salaka yawu, kasi beno losaka bansatu ya beno ya nzutu ya masumu. Ni na mutindu yayi bilandi ya Kristo ke ya kuzengisa kibakala.
12 Samu ba zikaka beno na yandi na mbotokolo ya yandi mpe na bumosi na yandi, ba vumbulaka mpe beno na lufwa kintwadi, na nzila ya kiminu ya beno na ngolo ya kisalu ya Nzambi yina vumbulaka yandi na lufwa.
13 Dyaka, ata beno vandaka ya kufwa na bifu ya beno ya yimbi mpe ba zengaka ntete ve beno kibakala, Nzambi vutulaka beno na luzingu kintwadi na yandi. Na luzolo nyonso yandi lemvokilaka mambu nyonso ya beto ya yimbi.
14 Mpe yandi katulaka mukanda yina ba sonikaka na maboko, yina vandaka na misiku mpe yina vandaka mbeni ya beto. Yandi katulaka yawu mpe tulaka yawu na zulu ya yinti ya mpasi.*
15 Na nzila ya yinti ya mpasi, yandi nungaka baluyalu mpe balutumu. Yandi lakisaka bawu na meso ya bantu nyonso mutindu bantu yina ba me nunga na mvita, mpe yandi tambusaka bawu na kati ya kikunku ya bantu yina me nunga.
16 Ni na yawu, beno kubika ve muntu sambisa beno samu na bima yina beno ke kudyaka mpe ke kunwaka to samu na mukembo mosi, to ya kilumbu ya ntete ya ngonda, to ya Saba.
17 Bamambu yayi ke mpewo ya bamambu yina ke kwiza, kasi butsyeleka kele na Kristo.
18 Beno bika ata muntu mosi ve yina ke sepelaka na kukuluka ya luvunu mpe yina ke kembilaka bambazi kukatula beno difuta. Muntu yayi “ke fyongoninaka” bima yina yandi me tala, yandi ke ya kufuluka na lunangu ya mpamba na kati ya mabanza ya yandi ya kimuntu.
19 Muntu ya mutindu yayi ke ve ya kusimba ngolo yintu, yintu yina ke salaka ti binama nyonso ya nzutu kuzwa yina ya ke na yawu nsatu mpe vanda ya kuvukana mbote-mbote na manima ya binkoso mpe misisa. Ni na nzila ya yawu Nzambi ke salaka ti nzutu kula to kuma nene.
20 Kana beno kufwaka kintwadi na Kristo na yina me tadila bima ya pete ya yinza, samu na yinki beno ke na zingaka mutindu beno ke kaka bantu ya yinza, na kutatamanaka kaka na misiku yayi:
21 “Kubaka ve, kumeka ve, kusimba ve?”
22 Misiku yayi ke na tadilaka bima yina ke bolaka ntangu ba ke kudyaka yawu. Ya ke misiku mpe malongi ya bantu.
23 Misiku yayi ke talanaka mutindu ya ke pesaka ndwenga, kasi ya ke sadisaka ve bantu na kutelemina bansatu ya nzutu. Ya ke salamaka mutindu yina samu bantu ke bakaka mukanu samu na bawu mosi na mutindu ya kusadila Nzambi, ba ke na kukuluka ya luvunu mpe ke talisaka banzutu ya bawu mosi mpasi.
Banote
^ Na Greke: “Kizizi ya munu na kinsuni.”
^ To: “Kukanga beno na boloko.”
^ To: “Mavanga.”
^ Tala Yina ya zola zonza.
