Na Bakolose 3:1-25
3 Kasi, kana ba vumbulaka beno na lufwa na Kristo, beno tatamana na kusosa bima yina ke na zulu, kisika yina Kristo ke ya kuvanda na diboko ya bakala ya Nzambi.
2 Beno tatamana na kukanisa na bima yina ke na mazulu, kasi ve na bima yina ke na zulu ya ntoto,
3 samu beno ke ya kufwa mpe ba me bumba luzingu ya beno na Kristo na bumosi na Nzambi.
4 Ntangu Kristo, luzingu ya beto, ke talana, beno mpe ke talana kintwadi na yandi na kati ya nkembo.
5 Ni na yawu, beno kufwa binama ya nzutu ya beno yina ke na ntoto na yina me tadila kinsuza,* mambu ya busafu, nsatu ya ngolo ya kuvukisa nzutu yina ba lenda yala ve, bansatu ya yimbi mpe lukoso, yina ke lusambu ya biteki.
6 Ya ke ni samu na bima ya faso yayi, nkele ya Nzambi ke na kwizaka.
7 Ni mutindu yayi beno mpe vanda dyatilaka na luzingu ya beno ya ntama.
8 Kasi ntangu yayi beno me fwana kulosa ntama na beno bamambu yayi: nkele, kudasuka, ntima ya yimbi, bifingu mpe nzonzolo ya yimbi yina lenda basika na bayinwa ya beno.
9 Beno kuvuna ve bampangi. Beno katula kimuntu ya ntama na mavanga ya yawu
10 mpe beno lwata kimuntu ya malu-malu, yina na nzila ya nzayilu ya tsyeleka ke na kumaka ya malu-malu, na mutindu yina ke ya kukwelana na kifwani ya muntu yina yidikaka yawu.
11 Kisika yina Mugreke kele ve, Zwife mpe kele ve, muntu yina ke ya kuzenga kibakala kele ve, muntu yina ke ve ya kuzenga kibakala mpe kele ve, nzenza kele ve, Sikite* kele ve, ngaamba kele ve, muntu ya kimpwanza kele ve. Kasi Kristo ke mambu nyonso mpe na nyonso.
12 Ni na yawu, samu beno kele bantu yina Nzambi me soola, bantu ya santu mpe yina yandi ke zolaka, beno lwata ntima ya kyadi mpe ya luzolo, ntima ya mbote, kukuluka, lembami mpe ntima ya yinda.
13 Beno tatamana na kukanga ntima beno na beno na bamambu ya bampangi, mpe beno lemvokila bampangi na ntima nyonso, ata ti muntu me sala mambu yina me nyongisa beno. Kaka mutindu Yehova lemvokilaka beno na ntima nyonso, beno me fwana kulemvokila mpe na ntima nyonso.
14 Kasi katula bima nyonso yayi, beno lwata luzolo, samu luzolo ke vukisaka bantu na mutindu ya mbote.
15 Dyaka, bika ti kizunu ya Kristo yala na bantima ya beno, samu ba bokilaka beno na kizunu yayi samu na kuvanda nzutu mosi, mpe beno vutula matondo.
16 Bika ti dyambu ya Kristo zinga na kati ya beno na faso ya kulutila mpe na ndwenga nyonso. Beno tatamana na kulonga mpe na kukindisa bampangi na banzimbu, beno kembila Nzambi, beno yimba banzimbu na mutindu yina ke lakisa kuvutula matondo, beno yimbila Yehova na bantima ya beno.
17 Mambu nyonso yina beno ke zonza mpe mambu nyonso yina beno ke sala, beno sala nyonso na nkumbu ya Mfumu Yesu, na kuvutulaka matondo na Nzambi Tata na nzila ya yandi.
18 Beno bakento, beno tumama na babakala ya beno, mutindu ya me fwanana na Mfumu.
19 Beno babakala, beno tatamana na kuzola bakento ya beno mpe beno kubakila ve bawu na ngolo.
20 Beno bana, beno tumama na bibuti ya beno na mambu nyonso, samu ya ke mbote mingi na Mfumu.
21 Beno batata, beno kudasukisa ve bana ya beno, samu ba lemba ve.
22 Beno bisadi, beno tumama na mambu nyonso na bantu yina ke bamfumu ya beno na ntoto,* kaka ve ntangu ba ke talaka beno samu na kusepelisa bantu, kasi na ntima ya beno nyonso mpe na boma ya Yehova.
23 Mambu nyonso yina beno ke na salaka, beno sala yawu na mwela* ya beno nyonso, mutindu beno ke na salaka yawu samu na Yehova kasi ve samu na bantu,
24 samu beno zaba ti ni na Yehova beno ke kuzwa dikabu mutindu matabisi. Beno sala mutindu bisadi samu na Mfumu, Kristo.
25 Ya tsyeleka, muntu yina me sala mambu ya yimbi, ba ke sambisa yandi samu na mambu ya yimbi yina yandi me sala. Nzambi ke sambisa na kutadilaka misiku ya yandi, yandi ke sala ve luswaswanu.
Banote
^ Na Greke, por·nei′a. Tala Yina ya zola zonza.
^ “Sikite” zola zonza muntu yina ke zonzaka bamambu ya yimbi.
^ Na Greke: “Kinsuni.”
^ Tala Yina ya zola zonza.
