Na Bakolose 4:1-18
4 Beno bamfumu, beno bakila bisadi ya beno na lunungu mpe na mutindu ya mbote, samu beno zaba ti beno mpe beno ke na Mfumu na mazulu.
2 Beno tatamana na kusambila, beno vanda ya kuvumbuka na kimpeve mpe beno vutula matondo.
3 Kaka na ntangu yina, beno sambila mpe samu na beto, samu Nzambi fungula mwelo na mambu ya yandi samu beto lenda kuzonzila kinsweki ya santu na yina me tadila Kristo, kinsweki yina me sala ti mu kota na boloko,
4 mpe samu mu zonzila yawu mbote-mbote na mutindu yina mu me fwana kusala yawu.
5 Beno tatamana na kudyatila na ndwenga na mantwala ya bantu yina ke na ngaanda ya kimvuka. Beno sadila ntangu ya beno na mutindu ya kulutila mbote.
6 Mambu yina beno ke zonzaka fwana kuvanda ntangu nyonso kitoko mpe ya vanda mutindu ba me tula yawu mungwa. Na yawu beno ke zaba mutindu beno fwana kupesa mvutu na konso muntu.
7 Tyshike, mpangi ya munu yina mu ke zolaka mingi mpe kisadi ya kukwikama, kisadi mutindu munu na Mfumu, ke pesa beno bansangu nyonso na yina me tadila munu.
8 Mu ke na filisaka yandi na sika ya beno samu beno zaba mutindu beto kele mpe samu yandi kindisa bantima ya beno.
9 Yandi ke na kwizaka na Onezime, mpangi ya munu ya kukwikama mpe yina mu ke zolaka. Yandi vanda vandaka na beno. Ba ke zonzila beno bamambu nyonso yina ke na salamaka awa.
10 Aristarke, mpangi ya munu ya boloko me filisa beno bambote, mpe Marke yina ke mwana ya ngwa-nkazi* ya Barnabase (yina ba lombaka na beno na kuyamba yandi na mutindu ya mbote kana yandi kwiza na sika ya beno) me filisa mpe beno bambote,
11 mpe Yesu yina ba ke bokilaka Yesutuse, yina ke na kati ya ba yina ba zengaka kibakala. Kaka ni bawu ke bampangi ya munu ya kisalu samu na Kimfumu ya Nzambi, mpe ba me kumaka samu na munu kisika ya kuzwa ngolo ya kulutila.
12 Epafraze, kisadi ya Kristo Yesu yina vanda vandaka na beno me filisa beno bambote. Ntangu nyonso yandi ke salaka balusambu ya ngolo samu na beno, samu na nsuka beno vanda ya kulunga mpe na kundima ya ngolo na luzolo nyonso ya Nzambi.
13 Mu ke na pesaka kimbangi ti yandi ke salaka bangolo mingi samu na beno mpe samu na bampangi ya Lawodise mpe ya Yelapolise.
14 Luke, munganga yina beto ke zolaka mingi me filisa beno bambote. Demase mpe me filisa beno bambote.
15 Beno pesa bambote ya munu na bampangi ya Lawodise, na Nimfa mpe na kimvuka yina ke vukanaka na yinzo ya yandi.
16 Ntangu ba ke manisa kutanga mukanda yayi na sika ya beno, beno yidika bamambu samu ba tanga mpe yawu na kimvuka ya bantu ya Lawodise mpe beno tanga mpe mukanda yina mu filisaka na Lawodise.
17 Dyaka, beno zonza na Arshipe: “Tula dikebi na kisalu yina nge ndimaka na Mfumu, samu na kulungisa yawu.”
18 Yayi ni mbote ya munu Polo, yina mu me sonika na diboko ya munu mosi. Beno bambuka ntangu nyonso na basinga ya munu ya bisengo* na boloko. Bika ti ntima ya kulutila mbote vanda na beno.
