Na Baroma 10:1-21
10 Ya tsyeleka bampangi, nsatu ya ntima ya munu mpe lusambu yina mu ke salaka na Nzambi samu na bawu, ke ti ba vuuka.
2 Mu lenda pesa kimbangi ti ba vandaka ya tsyeleka na nsatu ya kusepelisa Nzambi, kasi ba ke salaka ve yawu na kati ya luzabu ya tsyeleka.
3 Samu ba zaba ve mambu yina ke mbote na meso ya Nzambi, ba landaka malongi ya bawu mosi. Ni na yawu, ba tumamaka ve na malongi ya Nzambi, na yina me tadila bamambu ya lunungu.*
4 Kristo ke nsuka ya Musiku, samu bantu nyonso yina ke lakisaka kiminu kuma bantu ya lunungu.*
5 Moyize sonikaka mutindu yayi samu na lunungu yina ke katukaka na Musiku: “Muntu yina ke salaka bamambu yayi ke zinga na nzila ya yawu.”
6 Kasi lunungu* yina ke katukaka na kiminu ke zonzaka ti: “Kuzonza ve na ntima ya nge ti, ‘Nani ke kwenda na zulu?’ Yina zola zonza, samu na kukulumusa Kristo,
7 to nani ke kulumuka na dibulu ya yinda? Yina zola zonza, samu na kubasisa Kristo na kati ya bantu ya kufwa.”
8 Kasi yinki masonoko ke zonzaka? Dyambu ya Nzambi ke pene-pene na nge, na yinwa ya nge mpe na ntima ya nge, ya zola zonza, “nsangu” yina beto ke samunaka, yina ke lombaka kiminu.
9 Kana na yinwa ya nge, nge ke zonzaka na meso ya bantu nyonso ti Yesu ke Mfumu, mpe kana na ntima ya nge, nge ke kwikilaka ti Nzambi vumbulaka yandi na lufwa, nge ke vuuka.
10 Na kuvanda muntu ya lunungu,* nge fwana kulakisa kiminu na ntima ya nge, kasi ni na yinwa ya nge, nge me fwana kulakisa yawu na meso ya bantu nyonso samu na kuvuuka.
11 Samu masonoko ke zonzaka: “Muntu yina ke tulaka kiminu na yandi ke kufwa ve nsoni.”
12 Luswaswanu kele ve na kati ya Zwife na Mugreke. Bawu nyonso ke kaka na Mfumu mosi, yina ke pesaka balusakumunu mingi na bantu nyonso yina ke bokilaka yandi.
13 Samu “muntu nyonso yina ke bokila nkumbu ya Yehova ke vuuka.”
14 Kasi, wapi mutindu ba ke bokila yandi kana ba ke ve na kiminu na yandi? Mpe wapi mutindu ba lenda tula kiminu na muntu yina ba me kuwa ve nsangu ya yandi? Mpe wapi mutindu ba ke kuwa nsangu ya yandi, kana ya ke ve na muntu yina ke na samunaka?
15 Mpe wapi mutindu ba ke samuna, kana ba me filisa ve bawu? Kaka mutindu ya ke ya kusonama: “Ya ke kitoko mingi, makulu ya bantu yina ke zonzilaka nsangu ya mbote ya mambu ya mbote!”
16 Kasi, bawu nyonso tumamaka ve na nsangu ya mbote. Ni na yawu Izaya me zonza: “Yehova, nani tulaka kiminu na mambu yina yandi kuwaka na beto?”
17 Ni na yawu, kiminu ke butukaka na mambu yina muntu ke kuwaka. Mpe mambu yina muntu me kuwa ke kwizaka na nzila ya nsangu yina me tadila Kristo.
18 Mu ke na yufulaka: Ba me kuwa kwandi mbote-mbote? Ya tsyeleka, “makelele ya bawu kwendaka na ntoto ya muvimba, mpe nsangu ya bawu kwendaka tii na bisika ya kulutila ntama na zulu ya ntoto.”
19 Kasi mu ke na yufulaka, Izraele zabaka kwandi yawu? Ntete-ntete, Moyize zonzaka: “Na nzila ya makanda ya nkaka, mu ke sala beno kuma na kimbanda. Mu ke vumbula nkele ya beno ya ngolo na nzila ya dikanda mosi ya zoba.”
20 Kasi, Izaya zonzaka mambu yayi na bukindi nyonso: “Bantu yina vanda sosa ve munu, kuzwaka munu, mpe bantu yina vanda sosa ve kuzaba munu, zabaka munu.”
21 Kasi na yina me tadila bantu ya Izraele, yandi zonzaka: “Bilumbu nyonso, mu me nanguna maboko ya munu na sika ya bantu yina ke tumamaka ve na munu, mpe yina ke na yintu ngolo.”
