Na Baroma 11:1-36
11 Ni na yawu yina mu ke na yufulaka, Nzambi lenda losa kwandi bantu ya yandi? Ata fioti ve! Ya tsyeleka munu mosi mpe, mu ke muntu ya Izraele, mutekolo ya Abrahami na dikanda ya Benzamin.
2 Nzambi lenda losa ve dikanda ya yandi yina yandi ndimaka ntete. Beno zaba ve yinki masonoko ke zonzaka na yina me tadila Eli, ntangu yandi vanda nyongina bana ya Izraele na Nzambi?
3 “Yehova, ba me kufwa mimbikudi ya nge, ba me mwangisa bisika ya nge ya kuyoka minkayulu, mpe mu me bikana kaka munu mosi, mpe ntangu yayi, ba ke na sosaka kufwa munu mpe.”
4 Kasi wapi mvutu Nzambi pesaka yandi? “Mu ke na bantu 7 000 yina me bikana, yina me fukama ve na mantwala ya Baale.”
5 Mutindu mosi mpe, bubu yayi, ya ke na bantu yina me bikana, yina Nzambi soolaka na nzila ya ntima ya kulutila mbote.
6 Ni na yawu, kana ya ke na nzila ya ntima ya kulutila mbote ya Nzambi, ya ke dyaka ve na nzila ya bisalu. Kana ni mutindu yina ve, ntima ya kulutila mbote ya Nzambi ke dyaka ve ntima ya kulutila mbote.
7 Yinki beto ke zonza dyaka? Kima yina Izraele ke na sosaka na ntima mosi, yandi me kuzwa ve yawu, kasi ba yina ba soolaka kuzwaka yawu. Ntima ya ba yina bikanaka kumaka ngolo.*
8 Kaka mutindu ya ke ya kusonama: “Tii bubu yayi Nzambi kotisaka bawu na pongi ya ngolo, ni na yawu meso ya bawu ke na talaka ve, mpe makutu ya bawu ke na kuwaka ve.”
9 Mpe Davidi bwelaka: “Bika ti mesa ya bawu kuma mutambu, mpwasa,* kima yina ke budisaka dibaku, mpe kitumbu samu na bawu mosi.
10 Bika ti meso ya bawu kuma mpimpa samu ba tala dyaka ve, mpe mingongo ya bawu kondama ntangu nyonso.”
11 Na yawu mu ke na yufulaka, ba bulaka kwandi dibaku, mpe ba kubwaka kwandi ya mbala mosi? Ata fioti ve. Kasi na nzila ya dibaku yina ba bulaka, bantu ya makanda ke vuuka, samu na kunata bawu na kuvanda na kimbanda.
12 Kana dibaku yina ba bulaka zola zonza lusakumumu samu na yinza, mpe kana kukulumuka ya bawu zola zonza lusakumunu samu na bantu ya makanda, lutangu ya bawu nyonso ke nata ve kwandi balusakumunu ya kulutila?
13 Awa mu ke na zonzaka na beno, beno ba yina ke bantu ya makanda, samu mu ke ntumwa ya makanda, mu ke pesaka lukumu na kisalu ya munu,
14 samu na kutala kana na mutindu nyonso mu lenda nata bantu ya munu na kuvanda na kimbanda, mpe kuvuukisa ba ya nkaka na kati ya bawu.
15 Samu ba losaka bawu, ya sadisaka ba ya nkaka na yinza na kuvutula kindiku na Nzambi. Kana ntangu yayi yandi ndima bawu, ya ke vanda mutindu ba vandaka ya kufwa mpe yandi me vutula bawu na luzingu.
16 Kana kitini ya ntete ya dimpa* yina ba me pesa mutindu bambuma ya ntete ke santu, dimpa ya muvimba mpe kele santu. Mpe kana myanzi ke santu, bintala* mpe ke santu.
17 Kasi kana ba me zenga bintala ya nkaka, mpe ti nge, ata ti nge ke yinti ya olive ya brusu, ba namikaka nge na kati ya bintala yina bikanaka, mpe kintwadi beno ke na kuzwaka bambote ya myanzi ya yinti nyonso.
18 Kusala ve matalana* na mantwala ya bintala yina, kasi kana nge ke na salaka matalana na mantwala ya yawu, kuzimbana ve ti ni nge ve ke ya kusimba myanzi, kasi ni myanzi ke ya kusimba nge.
19 Nge lenda zonza: “Ba zengaka bintala samu na kunamika munu.”
20 Ya ke ya tsyeleka, ba zengaka bawu samu ba vandaka ve na kiminu, kasi nge, nge ke ya kutelama samu na kiminu, kukuma ve na lulendo kasi vanda na boma.
21 Kana Nzambi zengaka ya tsyeleka bintala ya yinti yina, yandi lenda zenga mpe nge.
22 Ni na yawu, tala wapi mutindu Nzambi ke lakisaka bumbote mpe nkele. Yandi ke lakisaka nkele ya yandi na sika ya ba yina me kubwaka, mpe ke lakisaka bumbote ya yandi na sika ya nge, kasi nge fwana kutatamana na kutula kivuvu na bumbote ya yandi, kana ve, nge mpe ba ke zenga nge.
23 Bawu mpe, kana ba bika kuvanda bantu yina ke ve na kiminu, ba ke namika bawu. Samu Nzambi ke na makoki ya kunamika dyaka bawu na yinti.
24 Kana ba zengaka nge na yinti ya olive ya brusu, mpe ba namikaka nge na yinti ya olive yina ba kundaka, ata ya fwana kusalama ve faso yina, beto lenda ndima ya tsyeleka ti ba ke namika dyaka na yinti ya olive bintala ya yawu yina ba zengaka.
25 Bampangi, mu zola ti beno zimbana ve kinsweki ya santu yayi, samu beno kuma ve na mayela na meso ya beno mosi: Bantu ya nkaka ya Izraele kumaka na yintu ngolo, tii ntangu lutangu ya muvimba ya bantu ya makanda ke kota.
26 Mpe ni na mutindu yina Izraele nyonso ke vuuka. Kaka mutindu ya ke ya kusonama: “Muvuukisi ke basika na Siyoni, mpe na Yakobi yandi ke katula bisalu yina ke vwezaka Nzambi.
27 Mpe yayi ke luwawanu ya munu na bawu, ntangu mu ke katula masumu ya bawu.”
28 Ya tsyeleka, na yina me tadila nsangu ya mbote, ba ke bambeni samu na beno. Kasi na yina me tadila kusoola ya Nzambi, ba ke bantu yina yandi ke zolaka samu na bankooko ya bawu.
29 Samu makabu yina Nzambi ke pesaka, mpe kubokila yina yandi ke bokilaka, ke nyongisa ve yandi.
30 Samu, kaka mutindu beno vanda tumama ve na Nzambi na ntama, kasi ntangu yayi, yandi me tala beno mawa samu na kukondwa kutumama ya bawu.
31 Mutindu mosi mpe, ntangu yayi, bantu yayi me kondwa kutumama mpe Nzambi me vanda na mawa ya beno, samu ntangu yayi yandi vanda mpe na mawa ya bawu.
32 Nzambi bikaka bawu nyonso ba vanda bangaamba ya kukondwa kutumama, samu yandi vanda na mawa ya bawu nyonso.
33 Bimvwama, ndwenga, mpe luzabu ya Nzambi ke mingi ya kulutila! Ya tsyeleka, ata muntu mosi ve lenda bakula balusambusu ya yandi, mpe lenda zaba mbote-mbote banzila ya yandi.
34 “Nani lenda zaba makanisi ya Yehova, mpe nani lenda pesa yandi malongi?”
35 To, “nani vandaka muntu ya ntete na kupesa Nzambi kima, samu yandi vutula yandi yawu?”
36 Samu bima nyonso me katuka na Nzambi, mpe ya ke na luzingu na nzila ya yandi mpe samu na yandi. Bika yandi kuzwa nkembo mvula na mvula. Ameni.
Banote
^ To: “Mangaka kuwa.”
^ To: “Filet.”
^ To: “Morceau.”
^ To: “Ba branches.”
^ To: “Kubula ve ntulu.”
