Na Baroma 14:1-23
14 Beno yamba muntu yina ke ve na kiminu ya ngolo, kasi beno sambisa ve muntu samu yandi me kanisa mambu yina ke ve faso mosi na ya beno.
2 Muntu yina ke na kiminu ya ngolo ke kudyaka bima nyonso. Kasi muntu yina ke ve na kiminu ya ngolo ke kudyaka kaka ndunda.
3 Bika ti muntu yina ke kudyaka madya nyonso tala ve na faso ya yimbi muntu yina ke kudyaka ve madya nyonso. Mpe muntu yina ke kudyaka ve madya nyonso zola sambisa ve muntu yina ke kudyaka madya nyonso, samu Nzambi ke ndimaka muntu yina.
4 Nani nge kele samu na kusambisa kisadi ya ngana? Kana yandi telama to yandi kubwa, ya me tala kaka mfumu ya yandi mosi. Ya tsyeleka, yandi ke telama samu Yehova lenda sala ti yandi telama.
5 Muntu mosi lenda tala ti kilumbu mosi me lutila bilumbu ya nkaka. Muntu ya nkaka lenda tala ti bilumbu nyonso ke kaka faso mosi. Konso muntu fwana kuvanda na kundima na mambu yina yandi ke na kanisaka.
6 Ba yina ke talaka ti kilumbu mosi me lutila bilumbu ya nkaka na mfunu, ba ke talaka yawu faso yina samu na kupesa Yehova lukumu. Ba yina ke kudyaka madya nyonso, ke kudyaka yawu samu na kupesa nkembo ya Yehova. Ba ke vutulaka matondo na Nzambi samu na madya. Ba yina ke kudyaka ve ke pesaka mpe Yehova lukumu, mpe ba ke vutulaka matondo na Nzambi.
7 Ata muntu na kati ya beto ke zingaka samu na yandi mosi, mpe ata muntu na kati ya beto ke kufwaka samu na yandi mosi.
8 Samu kana beto ke na zingaka, beto ke na zingaka samu na Yehova, mpe kana beto kufwa, beto ke kufwa samu na Yehova. Na yawu, ya vanda ti beto zinga to beto kufwa, beto ke bantu ya Yehova.
9 Ya tsyeleka, ni na yawu Kristo kufwaka mpe vutukaka na luzingu, samu yandi vanda Mfumu na zulu ya bantu ya kufwa, mpe na zulu ya ba yina ke moyo.
10 Kasi, samu na yinki nge ke na sambisaka mpangi ya nge? To samu na yinki nge ke na talaka mpangi ya nge mutindu kima ya mpamba? Beto nyonso ke telama na mantwala ya kisika ya kusambisa ya Nzambi.
11 Mutindu ya ke ya kusonama: “Yehova me zonza, ‘Ya tsyeleka, mutindu mu ke na luzingu, bantu nyonso ke fukama na mantwala ya munu, mpe konso ludimi ke ndima pwelele ti mu ke Nzambi.’”
12 Ni na yawu, muntu nyonso na kati ya beto ke pesa mvutu na mantwala ya Nzambi samu na yandi mosi.
13 Bika ti beto kusambisa ve bampangi, kasi beto sala nyonso samu na kutula ve na mantwala ya bawu, ditadi yina ke budisaka dibaku to kima yina ke bwisaka.
14 Ya tsyeleka, mu ke na kundima na Mfumu Yesu ti kima nyonso yina beto ke kudyaka, ke ve mvindu na kati ya yawu. Kasi ntangu muntu ke kanisaka ti kima ke mvindu, ni na ntangu yina ya ke kumaka yimbi samu na yandi na kudya yawu.
15 Kana madya yina nge ke na kudyaka ke na salaka mpangi ya nge mpasi, nge ke na lakisaka dyaka ve luzolo. Kufwa ve kiminu ya mpangi ya nge samu na madya yina nge ke na kudyaka, samu Kristo kufwaka samu na yandi.
16 Ni na yawu, beno bika ve ti mambu ya mbote yina beno ke na salaka, bantu zonza ti ya ke mambu ya yimbi.
17 Samu Kimfumu ya Nzambi me tadila ve yina beno ke kudyaka, mpe yina beno ke kunwaka. Kasi kima ya kulutila mfunu, ni kuvanda muntu ya lunungu,* kuvanda na kizunu, mpe kilengi na mpeve ya santu.
18 Ya tsyeleka, muntu yina ke salaka mutindu kisadi ya Kristo na mutindu yayi, Nzambi mpe bantu ke ndima yandi.
19 Ni na yawu, bika beto sala nyonso yina beto lenda sala, samu na kuvanda na kizunu mpe kukindisa bampangi.
20 Beno bika kumwangisa kisalu ya Nzambi samu na madya. Ya tsyeleka, beto lenda kudya madya nyonso, kasi ya ke vanda yimbi na kudya kima, ntangu ya ke na budisaka muntu ya nkaka dibaku.
21 Ya ke vanda mbote na kudya ve musuni, na kunwa ve vinu, mpe na kusala ve kima nyonso yina lenda budisa mpangi ya nge dibaku.
22 Kana nge ke kwikilaka na bamambu yayi, ya ke mambu ya nge na Nzambi. Kilengi na muntu yina ke sambisaka ve yandi mosi samu na mambu yina yandi ke kwikilaka.
23 Kasi kana muntu ke na ntembe na yina me tadila kudya, yandi me sambisa yandi mosi kana yandi kudya, samu mambu yina yandi me sala, ni kiminu ve me nata yandi na kusala yawu. Mambu ni mambu beto ke salaka, kana ni kiminu ve me nata beto na kusala yawu, ya ke disumu.
Banote
^ To: “Kudedama.”
