Na Baroma 16:1-27
16 Mu ke na lombaka na beno na kuyamba Febe, mpangi ya beto ya kento, yina ke kisadi na kimvuka ya Senkrea.
2 Mulemvo, beno yamba yandi na kati ya Mfumu, na mutindu yina me lunga samu na basantu, mpe beno pesa yandi lubakusu nyonso yina yandi lenda vanda na yawu nsatu, samu yandi me nwanina bampangi mingi, na munu mpe na kati.
3 Beno pesa bambote ya munu na Priska mpe na Akila, bampangi ya munu ya kisalu na Kristo Yesu.
4 Ba tulaka luzingu ya bawu na mpasi samu na munu. Munu, mpe bimvuka nyonso ya ba yina ke ve bazwife ke na vutulaka bawu matondo.
5 Beno pesa mpe bambote na kimvuka yina ke vukanaka na yinzo ya bawu. Beno pesa mpe bambote na mpangi ya munu yina mu ke zolaka mingi, Epayinete, yina ke na kati ya bantu ya ntete yina kumaka bilandi ya Kristo na Aziya.
6 Beno pesa mpe mbote na Maria yina salaka mingi samu na beno.
7 Beno pesa mpe mbote na Andonikuse mpe na Yunyase, bantu ya dikanda ya munu, mpe bampangi ya munu ya boloko. Bantumwa zaba bawu mbote-mbote, mpe ba ke bilandi ya Kristo bantangu mingi kuluta munu.
8 Beno pesa mpe bambote ya munu na Ampliyatuse yina ke ndiku ya munu na Mfumu.
9 Beno pesa mbote na Urbane, mpangi ya beto ya kisalu na Kristo, mpe na ndiku ya munu Stakise.
10 Beno pesa mbote na Apelese, kisadi yina ndimamaka na Kristo. Beno pesa mbote na bantu ya yinzo ya Aristobule.
11 Beno pesa mbote na Erodyone, yina ke muntu ya dikanda ya munu. Beno pesa mbote na bantu ya yinzo ya Narsise, ba yina kele bilandi ya Mfumu.
12 Beno pesa mbote na Trifene mpe na Trifoze, bakento yina ke salaka kisalu ya ngolo samu na Mfumu. Beno pesa mbote na Persise mpangi ya beto yina beto ke zolaka mingi, samu yandi me sala kisalu ya ngolo samu na Mfumu.
13 Beno pesa mbote na Rufuse, muntu yina ba soolaka na Mfumu. Beno pesa mpe mbote na mama ya yandi, yina me kuma mutindu mama ya munu.
14 Beno pesa mbote na Asinkrite, na Filegoni, na Ermese, na Patobase, mpe na Ermase, mpe na bampangi ya nkaka yina ke na bawu.
15 Beno pesa mbote na Filologe mpe na Yulia, na Nere mpe na mpangi ya yandi ya kento, na Olimpase mpe na dikanda nyonso ya Nzambi yina ke na bawu.
16 Beno pesana bambote na tiya nyonso.* Bimvuka nyonso ya Kristo me pesa beno bambote.
17 Ntangu yayi bampangi, mu ke na lombaka na beno na kusala keba na bantu yina ke basisaka bamambu yina ke kabulaka, mpe yina ke bwisaka kiminu ya bampangi, bamambu yina ke kwelanaka ve na bamambu yina beno longokaka. Beno vanda ntama na bawu,
18 samu bantu ya mutindu yayi ke ve bisadi ya Mfumu ya beto Kristo, kasi ba ke bisadi ya bansatu* ya bawu mosi. Na nzonzolo ya bawu ya kitoko, kasi yina ke ya luvunu, ba ke lebaka mpe ba ke vunaka bantu yina ke ve ya kusikama na kiminu.
19 Kasi bantu nyonso zaba ti beno ke bantu yina ke tumamaka, mpe mu ke na kilengi mingi samu na yawu. Mu zola ti beno vanda na ndwenga mpe beno sala yina ke mbote, kasi beno vanda bantu yina zaba ve mambu, mpe beno kima kusala mambu yina ke yimbi.
20 Na mwa ntangu fioti, Nzambi yina ke pesaka kizunu, ke dyata Satana na yisi ya makulu ya beno. Bika ti ntima ya kulutila mbote ya Mfumu ya beto Yesu vanda na beno.
21 Mpangi ya munu ya kisalu Timote, me pesa beno bambote. Mpe Lusyuse, Zasone, na Sosipatere, yina ke bantu ya dikanda ya munu, me pesa beno mpe bambote.
22 Munu, Tertiyuse, muntu yina me sonika mukanda yayi, me pesa beno mpe bambote na Mfumu.
23 Gayuse, muntu yina yambaka munu, mpe yina yambaka kimvuka ya muvimba me pesa beno bambote. Eraste, muntu yina ke bumbaka mbongo ya bwala, me pesa beno bambote mpe Kartuse, mpangi ya yandi ya bakala, me pesa beno mpe bambote.
24 * ——
25 Nzambi lenda pesa beno ngolo na nzila ya nsangu ya mbote yina mu ke na zonzaka, mpe na kisalu ya kusamuna mambu ya Yesu Kristo. Nsangu yayi, ba basisaka yawu na nzila ya kinsweki ya santu yina vandaka ya kubumbana na kati ya bantangu mingi.
26 Kasi ntangu yayi, ba me lakisa beto yawu, mpe ba me zonzila beto yawu na nzila ya masonoko ya mbikudulu. Nzambi ya beto yina ke zingaka mvula na mvula, tumisaka ti ba zonzila yawu na kati ya makanda, samu ba tumama na nzila ya kiminu.
27 Bika ti na nzila ya Yesu Kristo nkembo vanda ntangu nyonso na Nzambi kaka mosi yina ke na ndwenga. Ameni.
