Na Baroma 2:1-29
2 Ni na yawu, nge ke ve na mambu ya kuzonza ata nani nge kele, kana nge ke sambisaka bampangi. Samu ntangu nge ke sambisaka bampangi, nge ke na pesaka kitumbu na nge mosi, samu ti nge mpe ke salaka bamambu ya mutindu mosi.
2 Beto zaba ti Nzambi ke sambisaka bantu yina ke salaka bamambu yayi. Mpe ntangu yandi ke sambisaka, ya ke vandaka ya kukwelana na matsyeleka.
3 Kasi mpangi, nge kanisa ti nge lenda kima lusambusu ya Nzambi, ntangu nge ke na sambisaka bantu yina ke na salaka bamambu ya faso yayi, yina nge mosi mpe ke salaka?
4 To nge ke vwezaka bunene ya ntima ya mbote ya Nzambi, ya kukanga ntima ya yandi, mpe ya ntima ya yandi ya yinda, samu nge zaba ve ti na ntima ya yandi ya mbote, Nzambi ke na sosaka kunata nge na kubalula ntima?
5 Kasi samu nge ke na yintu ngolo mpe nge ke na mangaka kubalula ntima, nkele ya Nzambi ke na vingilaka nge. Yandi ke lakisa yawu na kilumbu yina yandi ke sambisa bantu, mpe yandi ke sambisa bawu na faso ya lunungu.*
6 Yandi ke pesa matabisi to ke semba mosi na mosi samu na mavanga ya yandi:
7 Luzingu ya ntangu nyonso na bantu yina ke tatamanaka* na kusala mambu ya mbote. Bantu ya mutindu yayi ke sosaka nkembo, lukumu mpe luzingu yina ke vanda ntangu nyonso.
8 Na lweka ya nkaka, Nzambi ke dasuka mpe ke lakisa nkele ya yandi na bantu yina ke zolaka kuswana mpe yina ke tumamaka ve na matsyeleka.
9 Bampasi mpe mawa ke kumina muntu nyonso yina ke salaka bamambu ya yimbi, kubanda ntete na Zwife mpe na manima, na Mugreke.
10 Kasi nkembo, lukumu mpe kizunu na ba yina ke salaka mambu ya mbote, kubanda ntete na Zwife mpe na manima, na Mugreke.
11 Ya tsyeleka, Nzambi ke soolaka ve bizizi.*
12 Ba yina nyonso vandaka ve na Musiku ya Moyize kasi ba salaka masumu, ke kufwa ata ba vandaka ve na musiku. Kasi ba yina nyonso salaka disumu ntangu ba vandaka na Musiku, ba ke sambisa bawu na mutindu yina ke ya kukwelana na Musiku yango.
13 Samu, ya ke ve ni ba yina ke kuwaka Musiku ke bantu ya lunungu* na mantwala ya Nzambi, kasi ni ba yina ke sadilaka Musiku ba ke bokila bantu ya lunungu.
14 Ntangu bantu ya makanda yina zaba ve Musiku ke salaka bamambu yina Musiku ke lombaka, ata ba ke ve na Musiku, ba ke musiku samu na bawu mosi.
15 Ba ke lakisaka ya tsyeleka ti Musiku ke ya kusonama na bantima ya bawu, ntangu ndinga yina ke zonzaka na kati ya bantima ya bawu ke zonzaka na bumosi na bawu, mpe makanisi ya bawu mosi ke fundaka bawu to ke nwaninaka bawu.
16 Ya ke salama na kilumbu yina Nzambi, na nzila ya Kristo Yesu, ke sambisa mambu yina bantu ke salaka na kinsweki, na mutindu yina ke ya kukwelana na nsangu ya mbote yina mu ke na zonzilaka beno.
17 Kana ba ke bokilaka nge Zwife mpe nge ke tulaka ntima na musiku mpe ke bulaka ntulu samu na Nzambi,
18 nge zaba luzolo ya Nzambi mpe nge ke ndimaka mambu yina ke mfunu samu ba longaka nge na nzila ya Musiku.
19 Nge ke na kundima ti nge ke ntwadisi ya bantu ya kufwa meso, mpe mwinda samu na ba yina ke na kati ya mpimpa?
20 Nge ke kwandi muntu yina ke sembaka bazoba, mulongi ya bana ya fioti, muntu yina ke bakulaka mfunu ya nzayilu mpe ya matsyeleka ya ntete yina ke na Musiku...
21 nge muntu ke longaka muntu ya nkaka, nge ke longaka kwandi nge mosi? Nge muntu ke longaka, “Kulaba ve,” nge ke labaka?
22 Nge muntu ke zonzaka, “Kusala ve kinsuza,” nge ke salaka kinsuza? Nge muntu ke yiinaka biteki, nge ke labaka bima na batempolo?
23 Nge muntu ke bulaka ntulu samu na musiku, nge ke fwisaka Nzambi nsoni na kuvwezaka Musiku?
24 Samu “makanda nyonso ke na vwezaka nkumbu ya Nzambi samu na beno,” kaka mutindu ya ke ya kusonama.
25 Kuzenga kibakala ke mfunu kaka kana nge ke sadilaka mambu yina musiku ke lombaka, kasi kana nge ke vwezaka musiku, kuzenga kibakala ya nge ke dyaka ve kuzenga kibakala.
26 Kasi, kana muntu yina ba ke ve ya kuzenga kibakala ke sadilaka mambu yina Musiku ke lombaka, Nzambi ke bakila ve yandi mutindu muntu yina ba zengaka kibakala ata ti ba ke ve ya kuzenga yandi kibakala?
27 Samu yandi ke sadilaka mambu yina Musiku ke zonzaka, muntu yina ba zengaka ve kibakala na kinsuni ke sambisa nge, nge muntu yina ke vwezaka musiku, ata ti nge ke na musiku ya kusonama mpe ba zengaka nge kibakala.
28 Samu kuvanda Zwife ya tsyeleka ke talanaka ve kaka na meso, mpe kuzengisa kibakala ya yandi ke ve na nzutu.
29 Kasi Zwife ya tsyeleka ke muntu yina ke Zwife na kati mpe kuzengisa kibakala ya yandi ke ya ntima na nzila ya mpeve, kasi ve na nzila ya Musiku yina ke ya kusonama. Nkembo ya Zwife yayi ke katukaka ve na bantu, kasi na Nzambi.
Banote
^ To: “Kudedama.”
^ Na Greke: “Ke na kangaka ntima.”
^ To: “Bandinga to bampusu ya bantu.”
^ To: “Kudedama.”
