Na Baroma 3:1-31
3 Kasi na yinki Bazwife me lutila bantu ya nkaka, to wapi yina ke mfunu ya kuzengisa kibakala?
2 Yandi me lutila na mambu nyonso. Ntete-ntete, ni na bawu ba pesaka bamambu ya santu ya Nzambi.
3 Na yawu, yinki beto lenda zonza samu na Bazwife yina lakisaka ve kiminu? Kukondwa kiminu ya bawu lenda sala kwandi ti Nzambi vanda dyaka ve ya kukwikama?
4 Ata fioti ve. Kasi bika ya talana ti Nzambi ke muntu yina ke zonzaka kaka matsyeleka, ata ti bantu nyonso ke bantu ya luvunu, mutindu ya ke ya kusonama: “Samu nge talana muntu ya lunungu* na nzonzolo ya nge, mpe nge nunga ntangu ba ke sambisaka nge.”
5 Kasi yinki beto ke zonza kana kukondwa lunungu* ya beto ke lakisaka pwelele lunungu ya Nzambi? Ti Nzambi ke kondwaka kwandi lunungu ntangu yandi ke lakisaka nkele ya yandi? (Mu ke na zonzaka mutindu bantu ke zonzaka.)
6 Ni mutindu yina ve! Na yawu, wapi mutindu Nzambi ke sambisa yinza?
7 Kana na luvunu ya munu, matsyeleka ya Nzambi ke na talanaka pwelele samu na nkembo ya yandi, samu na yinki ba ke na sambisaka dyaka munu mutindu muntu yina ke salaka masumu?
8 Samu na yinki kuzonza ve kaka faso bantu ya nkaka, yina ke vunaka ti beto ke zonzaka: “Bika beto sala mambu ya yimbi samu ya lenda buta mambu ya mbote”? Bantu ya mutindu yayi ke kuzwa kitumbu yina ke ya kukwelana na lunungu.*
9 Yinki beto ke zonza dyaka? Beto me lutila kwandi bantu ya nkaka? Ata fioti ve! Samu beto zonzaka ntete ti ya vanda Bazwife to Bagreke, bawu nyonso ke bantu ya masumu,
10 mutindu ya ke ya kusonama: “Ata muntu ke muntu ya lunungu,* ata muntu mosi ve.
11 Ya ke ve na muntu yina ke na mayela ya kubakula mbote-mbote bamambu. Ya ke ve na muntu yina ke na sosaka Nzambi.
12 Bantu nyonso me bika nzila ya mbote, bawu nyonso me kuma bantu ya mpamba, ya ke na ata muntu yina ke na lakisaka ntima ya mbote, ata muntu mosi ve.”
13 “Laka* ya bawu ke ndyamu ya kufunguka. Ba ke sadilaka ludimi ya bawu samu na kuvuna.” “Mambu yina ba ke zonzaka ke mutindu misa* ya nyoka.”
14 “Yinwa ya bawu ke ya kufuluka na mambu ya kuloka* mpe na mambu ya yimbi.”
15 “Makulu ya bawu ke kwendaka mbangu na kumwangisa menga.”
16 “Na bisika nyonso yina ba ke lutaka, ba ke mwangisaka bima nyonso mpe ba ke bikaka mawa.
17 Ba zaba ve nzila ya kizunu.”
18 “Ba ke ve na buzitu na Nzambi.”*
19 Beto zaba ti mambu nyonso yina Musiku ke zonzaka, ya ke zonzaka yawu samu na bantu yina ke na yisi ya Musiku, samu yinwa nyonso vanda swi mpe samu yinza nyonso kuzwa kitumbu ya Nzambi.
20 Ni na yawu, na nzila ya musiku, Nzambi lenda ndima ata muntu mosi ve mutindu muntu ya lunungu* na meso ya yandi, samu ti ni na nzila ya musiku disumu me zabana mbote-mbote.
21 Kasi ntangu yayi, Nzambi me lakisa pwelele lunungu* ya yandi kukondwa lusadusu ya Musiku, mutindu Musiku mpe Bambikudi pesaka kimbangi.
22 Ee, lunungu* ya Nzambi na nzila ya lukwikulu na Yesu Kristo, samu na bantu nyonso yina ke na kiminu. Samu luswaswanu kele ve.
23 Ya tsyeleka, bantu nyonso sumukaka mpe lenda kuma ve ya kulunga mutindu Nzambi,
24 ya ke mutindu ba me kuzwa dikabu ya ofele, yina me sala ti ba bokila bawu bantu ya lunungu* samu na ntima ya kulutila mbote ya Nzambi, na nzila ya ntalu yina Kristo Yesu futaka samu na kukuula bawu na disumu.
25 Nzambi pesaka yandi mutindu munkayulu ya kuvutula kindiku, samu ti na nzila ya lufwa ya yandi, bantu kuzwa mulemvo ya masumu samu na kiminu ya bawu. Nzambi salaka mutindu yina samu na kulakisa lunungu* ya yandi, samu yandi vanda kangaka ntima mpe vanda lemvokilaka masumu yina salamaka na ntangu ya ntama.
26 Ya vandaka samu na kulakisa lunungu* ya yandi mosi na ntangu yayi, samu yandi vanda muntu ya lunungu* ata ntangu yandi ke bokilaka muntu yina ke na kiminu na Yesu, muntu ya lunungu.
27 Na yawu, mambu ya kubudila ntulu ni wapi yina? Ya kele ve. Beto zola bula kwandi ntulu na yina me tadila kuzitisa Musiku? Ve, kasi kaka na yina me tadila kulanda musiku ya kiminu.
28 Samu beto zaba ti Nzambi ke ndimaka muntu mutindu muntu ya lunungu* samu na kiminu ya yandi, kasi ve samu yandi ke landaka musiku.
29 Yandi ke kaka Nzambi ya Bazwife? Yandi ke ve mpe Nzambi ya bantu ya makanda? Ya tsyeleka, yandi ke Nzambi ya bantu ya makanda nyonso.
30 Samu Nzambi ke kaka mosi, yandi ke ndima bantu yina ba zengaka kibakala mutindu bantu ya lunungu na nzila ya kiminu ya bawu, yandi ke ndima mpe bantu yina ba zengaka ve kibakala mutindu bantu ya lunungu* na nzila ya kiminu ya bawu.
31 Ya zola zonza kwandi ti beto ke na katulaka Musiku na nzila ya kiminu ya beto? Ata fioti ve. Kasi beto ke nwaninaka Musiku.
Banote
^ To: “Kudedama.”
^ To: “Kudedama.”
^ To: “Ludedomo.”
^ To: “Kudedama.”
^ To: “Gorge.”
^ To: “Venin.”
^ To: “Malédiction.”
^ Na Greke: “Boma ya Nzambi kele ve na mantwala ya meso ya bawu.”
^ To: “Kudedama.”
^ To: “Ludedomo.”
^ To: “Ludedomo.”
^ To: “Kudedama.”
^ To: “Ludedomo.”
^ To: “Ludedomo.”
^ To: “Kudedama.”
^ To: “Kudedama.”
^ To: “Kudedama.”
