Na Baroma 7:1-25
7 Bampangi, mu ke na zonzaka na beno ba yina me zaba Musiku: Beno zaba ve ti Musiku ke na lutumu na zulu ya muntu ntangu nyonso yina yandi ke ntete moyo?
2 Na kifwani, na nzila ya musiku kento ya kukwela ke ya kukangama na bakala ya yandi, ntangu nyonso yina bakala ya yandi ke moyo. Kasi kana bakala ya yandi kufwa, yandi ke dyaka ve na yisi ya musiku ya bakala ya yandi.
3 Na yawu, kana yandi kuma kento ya bakala ya nkaka ntangu bakala ya yandi ke ntete moyo, ba ke bokila yandi kento ya bunsuza.* Kasi kana bakala ya yandi kufwa, yandi ke dyaka ve na yisi ya musiku ya bakala ya yandi. Na yawu, kana yandi me kuma kento ya bakala ya nkaka, yandi ke ve kento ya bunsuza.
4 Bampangi ya munu, na nzila ya nzutu ya Kristo, beno mpe, beno me kuma bantu ya kufwa na yina me tadila Musiku, samu na kukuma bantu ya muntu ya nkaka, muntu yina ba vumbulaka na lufwa samu beto buta bambuma samu na Nzambi.
5 Ya tsyeleka, ntangu beto vanda zinga ntete na kimuntu, bansatu yina ke nataka na disumu yina Musiku ke tumisaka, vanda sala na kati ya banzutu* ya beto samu beto sala bisalu yina ke nataka na lufwa.
6 Kasi ntangu yayi ba me katula beto na Musiku, mpe beto me kufwa na yina me tadila kima yina vanda kanga beto mutindu bantu yina ke na boloko. Bubu yayi beto ke na sadilaka Nzambi na mutindu ya malu-malu na nzila ya mpeve, kasi ve na mutindu ya ntama, na nzila ya musiku ya kusonama.
7 Na yawu, yinki beto ke zonza? Musiku ke kwandi disumu? Ata fioti ve! Ya tsyeleka, mu zola zaba ve disumu kana Musiku vandaka ve. Na kifwani, mu zola zaba ve ti ya ke yimbi na kutula meso na bima ya ngana, kana Musiku zonzaka ve ti: “Nge fwana kutula ve meso na bima ya ngana.”
8 Musiku pesaka disumu nzila ya kubuta na ntima ya munu bifu ya mutindu na mutindu ya kutulaka meso na bima ya ngana, samu ntangu musiku vandaka ve, disumu vandaka ya kufwa.
9 Ya tsyeleka, na ntama mu vandaka moyo ntangu musiku vandaka ve, kasi ntangu Musiku kwizaka, disumu vutukaka dyaka na luzingu mpe mu kufwaka.
10 Musiku yina zola nata na luzingu, mu me kwiza tala ti ya ke nataka na lufwa.
11 Samu musiku pesaka disumu nzila, ya bendaka munu mpe ya kufwaka munu.
12 Na yawu, Musiku ya Moyize ke santu, mpe musiku* ke santu, ke lunungu* mpe ke mbote.
13 Ni kima ya mbote kwandi me nata munu na lufwa? Ata fioti ve! Kasi ya ke ni disumu, samu ya talana pwelele ti ni disumu ke na natinaka munu lufwa na nzila ya kima ya mbote, samu na nzila ya musiku, ya talana pwelele ti disumu ke kima ya yimbi.
14 Beto zaba ti Musiku ke kima ya kimpeve, kasi munu, mu ke muntu ya kinsuni, muntu yina ba tekaka na disumu,
15 samu mu ke bakulaka ve mambu yina mu ke salaka. Na yawu, mu ke salaka ve mambu yina mu zola, kasi mu ke salaka mambu yina mu ke yiinaka.
16 Ata faso yina, kana mu ke salaka mambu yina mu ke zolaka ve kusala, mu ke ndimaka ti Musiku ke kima ya mbote.
17 Ntangu yayi, ya ke dyaka ve ni munu ke na salaka yawu, kasi ya ke ni disumu yina ke na zingaka na kati ya munu ke na salaka yawu.
18 Mu zaba ti ata kima mosi ya mbote ke zingaka na kati ya munu, ya zola zonza na nzutu ya munu, samu mu ke na nsatu ya kusala mambu ya mbote, kasi mu ke na lendaka ve kusala yawu.
19 Mu ke salaka ve mambu ya mbote yina mu ke na nsatu ya kusala, kasi mu ke salaka mambu ya yimbi yina mu ke ve na nsatu ya kusala.
20 Kana mu ke salaka mambu yina mu ke ve na nsatu ya kusala, ya ke dyaka ve ni munu ke na salaka yawu, kasi ni disumu yina ke zingaka na kati ya munu.
21 Mu ke na talaka musiku yayi na munu: Ntangu mu ke zolaka kusala mambu ya mbote, mambu ya yimbi ke na kati ya munu.
22 Na ntima ya munu, mu ke kuzwaka kilengi na musiku ya Nzambi,
23 kasi mu ke talaka na nzutu* ya munu musiku ya nkaka yina ke nwanisaka musiku ya makanisi ya munu, mpe ya ke nataka munu mutindu ngaamba ya musiku ya disumu yina ke na nzutu ya munu.
24 Munu muntu ya mpamba, nani ke vuukisa munu na nzutu yayi yina ke na nataka munu na lufwa?
25 Mu ke na vutulaka matondo na Nzambi na nzila ya Yesu Kristo Mfumu ya beto. Yawu yina, na makanisi ya munu, mu ke ngaamba ya musiku ya Nzambi, kasi na kinsuni, mu ke ngaamba ya musiku ya disumu.
Banote
^ Na Greke, moi·khei′a. Tala Yina ya zola zonza.
^ Na Greke: “Binama.”
^ To: “Commandement.”
^ To: “Ya kudedama.”
^ Na Greke: “Binama.”
