Bisalu ya Bantumwa 1:1-26
1 Mpangi ya munu Teofile, na mukanda ya ntete yina mu sonikaka, mu sonikaka bamambu nyonso yina Yesu salaka mpe longaka katuka kubanda
2 tii kilumbu yina Nzambi bakaka yandi na zulu, na manima ya kupesa bantumwa yina yandi soolaka misiku na nzila ya mpeve ya santu.
3 Na manima ya kutala mpasi, yandi talanaka na bawu bambala mingi, samu ba ndima ti ya tsyeleka yandi vandaka moyo. Ba talaka yandi na kati ya bilumbu 40, mpe yandi vanda zonzila bawu Kimfumu ya Nzambi.
4 Ntangu yandi vandaka na bawu, yandi pesaka bawu musiku yayi: “Beno katuka ve na Yeruzalemi, kasi beno tatamana na kuvingila kima yina Tata pesaka nsilulu, yina beno kuwaka na sika ya munu.
5 Ya tsyeleka, Yoane vanda botika na maza, kasi mbotokolo yina beno ke kuzwa na mwa bilumbu fioti ke vanda na mpeve ya santu.”
6 Na yawu, ntangu ba vukanaka, ba yufulaka yandi: “Mfumu, ni na ntangu yayi nge ke na vutulaka kimfumu na Izraele?”
7 Yandi vutulaka: “Ya ke ve na beno na kuzaba bantangu mpe bilumbu* yina Tata me tula na yisi ya lutumu ya yandi mosi.
8 Kasi beno ke kuzwa ngolo ntangu mpeve ya santu ke kwiza na zulu ya beno, mpe beno ke vanda bambangi ya munu na Yeruzalemi, na Zude nyonso, na Samariya tii na kisika ya kulutila ntama* ya ntoto.”
9 Na manima ya kuzonza mambu yayi, yandi nangukaka na zulu, ntangu ba vanda tala. Dituti mosi fukaka yandi mpe ba vanda lenda dyaka ve kutala yandi.
10 Ntangu ba vanda tala ntete na zulu mutindu yandi vanda kwenda, na mbala mosi babakala zole yina vandaka ya kulwata bilele ya mpembe telamaka pene-pene ya bawu,
11 mpe zonzaka: “Babakala ya Galile, samu na yinki beno ke ya kutelama awa mpe beno ke na talaka na zulu? Yesu yayi, yina Nzambi me katula na kati ya beno mpe me nanguna na zulu, ke kwiza mpe mutindu mosi yina beno me tala yandi kukwenda na zulu.”
12 Na yina, ba vutukaka na Yeruzalemi katuka na mongo mosi yina ba ke bokilaka Mongo ya bayinti ya Olive, yina ke pene-pene na Yeruzalemi, kaka na kilometre kana mosi.
13 Ntangu ba kumaka, ba kwendaka na shambre yina vandaka na zulu ya kisika yina ba vanda vanda. Ya vandaka na Piere mpe Yoane, Zaki na Andre, Filipe na Toma, Bartelemi na Matayi, Zaki mwana ya Alfe na Simoni muntu ya manzangu, mpe Yuda mwana ya Zaki.
14 Na bumosi, bantu nyonso yayi vanda bika ve kusambila, kintwadi na bakento ya nkaka, na Maria mama ya Yesu mpe na baleki ya yandi ya babakala.
15 Na bilumbu yina, Piere telamaka na kati-kati ya bampangi (lutangu ya bantu nyonso vandaka kana 120) mpe yandi zonzaka:
16 “Bampangi, ya vandaka mfunu ti masonoko lungana, mambu yina mpeve ya santu bikulaka na nzila ya Davidi na yina me tadila Yuda, yina kumaka ntwadisi ya ba yina kangaka Yesu.
17 Ba tangaka yandi na kati ya beto, mpe ba soolaka yandi na kusala kisalu yayi kintwadi na beto.
18 (Na yawu, muntu yango sumbaka bilanga na difuta yina yandi kuzwaka na kisalu ya yandi ya yimbi. Mpe ntangu yandi kubwaka yintu na yisi, nzutu ya yandi pasukaka,* mpe mityopo ya yandi nyonso mwanganaka.
19 Bantu nyonso ya Yeruzalemi kwizaka zaba mambu yango. Na yawu, na ndinga ya bawu ba bokilaka bilanga yango Akeledama, yina zola zonza, “Bilanga ya Menga.”)
20 Ya tsyeleka, ya ke ya kusonama na kati ya buku ya Bankunga, ‘Bika yinzo ya yandi bikana mpamba, mpe ata muntu mosi vanda na kati ya yawu,’ mpe ‘Bika muntu ya nkaka baka kisalu ya yandi ya kukengidila.’
21 Na yawu, ya ke mfunu na kusoola muntu mosi na kati ya babakala yina vanda tambula na beto ntangu nyonso yina Mfumu Yesu vanda sala bisalu ya yandi* na kati ya beto,
22 banda ntangu yina yandi kuzwaka mbotokolo na sika ya Yoane, tii kilumbu yina Nzambi katulaka yandi na kati ya beto. Muntu yango fwana kuvanda kintwadi na beto, mbangi ya kuvumbuka ya yandi na lufwa.”
23 Na yawu, ba pesaka bankumbu ya bantu zole, Yozefi yina ba vanda bokilaka Barsabasi, yina ba vanda bokilaka mpe Yusutuse, na Matyase.
24 Na manima ba sambilaka mpe zonzaka: “O Yehova,* nge yina zaba bantima ya bantu nyonso, lakisa beto nani nge me soola na kati ya babakala zole yayi
25 samu na kusala kisalu yayi, mpe kuvanda ntumwa na kisika ya Yuda, yina bikaka kisalu ya yandi samu na kusala yina yandi zolaka.”
26 Na yawu, ba bulaka dzeke samu na bawu mpe ya soolaka Matyase. Na yina, ba bwelaka yandi na lutangu ya bantumwa 11.*
Banote
^ Na Greke: “Bansungi.”
^ To: “Tii na bansuka.”
^ To: “Pasukaka na kati-kati.”
^ Na Greke: “Vanda kota mpe kubasika.”
^ Tala Yina ba me bwela A5.
^ Ya zola zonza ti ba bakilaka yandi mutindu mosi na bantumwa 11 ya nkaka.
