Bisalu ya Bantumwa 11:1-30
11 Bantumwa na bampangi yina vandaka na Zude kuwaka ti bantu ya makanda mpe ndimaka mambu ya Nzambi.
2 Na yawu, ntangu Piere kumaka na Yeruzalemi, bantu yina vanda nwanina mambu ya kuzenga kibakala, bandaka kuswanisa yandi.*
3 Ba zonzaka: “Nge kotaka na yinzo ya babakala yina ba zengaka ve kibakala, mpe nge kudyaka kintwadi na bawu.”
4 Na yawu, Piere zonzilaka bawu mambu nyonso yina salamaka. Yandi zonzaka:
5 “Mu vandaka na mbanza ya Zope mpe mu kuzwaka kimona-meso ntangu mu vanda sambila. Mu talaka kima mosi* mutindu kitende ya lele ya lino yina ba simbaka na bansongi yiya, kukatuka na zulu mpe kukwiza na sika ya munu.
6 Ntangu mu talaka mbote-mbote na kati, mu talaka bibulu ya ntoto ya makulu yiya, bibulu ya brusu, bibulu yina ke tambulaka kivumu na ntoto, mpe bandeke ya mazulu.
7 Mu kuwaka mpe ndinga yina zonzaka na munu: ‘Piere telama, kufwa yawu mpe kudya!’
8 Kasi mu zonzaka: ‘Ata fioti ve Mfumu, samu nabunu kima ya mvindu mpe yina ke ve ya kuvedila kota na yinwa ya munu.’
9 Mbala ya zole dyaka, ndinga yina katukaka na zulu zonzaka: ‘Nge, bika kubokila mvindu bima yina Nzambi me kumisa ya kuvedila.’
10 Ndinga yango wakanaka dyaka mbala ya tatu, mpe bima nyonso vutukaka dyaka na zulu.
11 Kaka na ntangu yina, babakala tatu kwizaka na yinzo yina beto vanda vanda. Ba katukaka na Sezarea mpe ba filisaka bawu samu na kusosa munu.
12 Na yawu, mpeve zonzaka na munu na kukwenda na bawu, mpe kusala ata fioti ve ntembe. Bampangi 6 yayi mpe kwendaka na munu, mpe beto kotaka na yinzo ya bakala yango.
13 “Yandi zabisaka beto mutindu yandi talaka mbazi mosi yina telamaka na yinzo ya yandi mpe zonzaka: ‘Filisa bantu na Zope samu ba kwenda bokila Simoni yina ba ke bokilaka Piere,
14 mpe yandi ke zabisa nge bamambu yina nge na bantu nyonso ya yinzo ya nge me lunga kusala samu na kuvuuka.’
15 Kasi ntangu mu bandaka kuzonza, mpeve ya santu kwizaka na zulu ya bawu, kaka mutindu ya kwizaka mpe na zulu ya beto na kubanda.
16 Na yawu, mu bambukaka moyo na mambu yina Mfumu zonzaka, ntangu yandi vanda zonza: ‘Yoane botikaka na maza, kasi beno ke kuzwa mbotokolo ya mpeve ya santu.’
17 Na yawu, kana Nzambi pesaka bawu dikabu ya ofele, mutindu yandi pesaka mpe beto, beto ba yina kwikilaka na Mfumu Yesu Kristo, mu ke nani samu na kulenda kukanga Nzambi nzila?”
18 Ntangu ba kuwaka bamambu yayi, ba bikaka kusala ntembe,* mpe ba kembilaka Nzambi na kuzonzaka: “Ya tsyeleka, Nzambi me pesa mpe na bantu ya makanda bweso ya kubalula ntima samu na kuzwa luzingu.”
19 Na yawu, bantu yina mwanganaka samu na mpasi yina kumaka na manima ya lufwa ya Etiene kwendaka tii na Finisi, na Shipre mpe na Antyose. Kasi ba vanda zabisa nsangu kaka na Bazwife.
20 Babakala ya nkaka na kati ya bawu yina katukaka na Shipre mpe na Sirene kwizaka na Antyose, mpe bandaka kusolola na bantu yina vanda zonzaka Greke. Ba zabisaka bawu nsangu ya mbote ya Mfumu Yesu.
21 Dyaka, diboko ya Yehova* vandaka na bawu mpe bantu mingi kumaka bandimi mpe ba bandaka kulanda Mfumu.
22 Nsangu ya bawu kumaka na makutu ya kimvuka ya Yeruzalemi, mpe ba filisaka Barnabasi tii na Antyose.
23 Ntangu yandi kumaka mpe talaka ntima ya kulutila mbote ya Nzambi, yandi sepelaka mpe bandaka kukindisa bawu nyonso na kukangama na Mfumu na ntima mosi,
24 samu yandi vandaka muntu ya mbote mpe ya kufuluka na mpeve ya santu mpe na kiminu. Mpe bantu mingi vanda kuma bandimi ya Mfumu.
25 Na yawu yandi kwendaka na Tarse, mpe kuna yandi sosaka Solo bisika nyonso.
26 Ntangu yandi kuzwaka yandi, yandi nataka yandi na Antyose. Mvula mosi ya muvimba, ba vukanaka na bawu na kimvuka mpe longaka bantu mingi. Ni na Antyose, na lutwadusu ya Nzambi, ba bokilaka samu na mbala ya ntete bilandi, Bakristo.
27 Na bilumbu yina, bambikudi katukaka na Yeruzalemi mpe kwizaka na Antyose.
28 Mosi ya bawu na nkumbu ya Agabuse telamaka mpe bikulaka na nzila ya mpeve ti nsatu ya nene zola kwiza na zulu ya ntoto nyonso. Nsatu yango salamaka na ntangu ya Klode.
29 Na yawu, bilandi bakaka mukanu ya kufilisa kima ni kima yina mosi na mosi ya bawu lenda kuzwa samu na kusadisa* bampangi yina vanda zinga na Zude.
30 Ni yina ba salaka. Ba filisaka yawu na bakuluntu na nzila ya Barnabasi na Solo.
Banote
^ To: “Kutudila yandi ntembe.”
^ Na Greke: “Ndonga mosi faso yayi.”
^ Na Greke: “Ba kumaka swi.”
^ Tala Yina ba me bwela A5.
^ To: “Kisalu ya kusadisa.”
