Bisalu ya Bantumwa 12:1-25
12 Na ntangu yina, mfumu Erode bandaka kunyokola bampangi ya dibuundu.
2 Yandi kufwaka Zaki mpangi ya Yoane, na mbele.
3 Ntangu yandi talaka ti ya sepelisaka Bazwife, yandi kangaka mpe Piere. (Ya salamaka na bilumbu ya mukembo ya Mampa yina ke ve na levire.)
4 Yandi bwilaka yandi, tulaka yandi na boloko, mpe yandi pesaka yandi na bimvuka yiya ya basoda samu ba kengidila yandi. Konso kimvuka vandaka na basoda yiya, mpe vandaka na ntangu ya yawu ya kukengidila. Yandi vandaka na dikanisi ya kubasisa* yandi na mantwala ya bantu, na manima ya Pake.
5 Na yawu, Piere vandaka kaka ya kukangama na boloko, kasi kimvuka vanda bondila mingi Nzambi samu na yandi.
6 Na mpimpa tekila kilumbu yina Erode zola basisa Piere na mantwala ya bantu, Piere vandaka ya kulala na kati-kati ya basoda zole. Ba kangaka yandi basinga zole ya bisengo, mpe ya vandaka na basoda yina vanda kengidila mwelo ya boloko.
7 Na mbala mosi, mbazi ya Yehova* telamaka kuna mpe nsemo ngengaka na kati ya boloko. Yandi simbaka Piere na mbanzi mpe vumbulaka yandi. Yandi zonzaka: “Telama mbangu!” Mpe basinga ya bisengo katukaka na maboko ya yandi mpe kubwaka.
8 Mbazi zonzaka na yandi: “Lwata bilele mpe mapapa ya nge.” Yandi salaka yawu. Na manima, mbazi zonzaka na yandi: “Tula kilele ya nge ya zulu mpe landa munu.”
9 Piere basikaka mpe landaka mbazi, kasi yandi vanda zaba ve ti mambu yina vanda salama na nzila ya mbazi vandaka ya tsyeleka. Yandi vanda kanisa ti ya vandaka kimona-meso.
10 Ntangu ba lutaka kimvuka ya ntete ya basoda mpe ya zole, ba kumaka na mwelo ya kisengo yina ke nataka na mbanza, mpe ya fungukaka yawu mosi na mantwala ya bawu. Ntangu ba basikaka, ba kumaka na bala-bala mosi, mpe na mbala mosi mbazi bikaka yandi.
11 Ntangu Piere kwizaka zaba mambu yina vanda salama, yandi zonzaka: “Ntangu yayi mu me zaba ya tsyeleka ti Yehova* me filisa mbazi ya yandi mpe yandi me vuukisa munu na maboko ya Erode, mpe na mambu nyonso yina Bazwife vanda vingila ti ya salama.”
12 Na manima ya kukanisa na mambu yango, Piere kwendaka na yinzo ya Maria, mama ya Yoane yina ba vanda bokilaka Marke. Bantu mingi vandaka ya kuvukana kuna mpe vanda sambila.
13 Ntangu yandi konkotaka na mwelo, kisadi mosi ya kento na nkumbu ya Rode kwiza tala nani vandaka kuna.
14 Ntangu yandi kwizaka zaba ti ya vandaka ndinga ya Piere, yandi fulukaka na kilengi. Na yawu, yandi fungulaka ve mwelo, kasi yandi kimaka mbangu na kati ya yinzo mpe zabisaka bawu ti Piere vandaka ya kutelama na mantwala ya mwelo.
15 Ba zonzaka na yandi: “Nge me lawuka.” Kasi yandi vanda bika ve kuzonza ti ya vandaka mutindu yina. Na yawu, ba bandaka kuzonza: “Ya ke mbazi ya yandi.”
16 Kasi Piere vandaka kaka kuna na kwendaka konkotaka. Ntangu ba fungulaka mwelo, ba talaka yandi mpe ba yitukaka.
17 Kasi na diboko ya yandi, yandi zabisaka bawu na kuvanda swi, mpe yandi zonzaka na bawu mbote-mbote wapi mutindu Yehova* basisaka yandi na boloko, mpe yandi bwelaka: “Beno zabisa Zaki na bampangi bamambu yayi.” Na manima, yandi basikaka mpe kwendaka kisika ya nkaka.
18 Ntangu ya kumaka suka, mvwanzi ya ngolo kotaka na kati ya basoda, mpe ba vanda sosa kuzaba yinki kuminaka Piere.
19 Erode sosaka Piere bisika nyonso, mpe ntangu yandi kuzwaka ve yandi, yandi yufulaka bakengi, mpe tumisaka ti ba pesa bawu kitumbu. Na manima, yandi katukaka na Zude mpe kwendaka na Sezarea, mpe lutisaka mwa ntangu kuna.
20 Erode vandaka na nkele ya mingi samu* na bantu ya Tire mpe ya Sidoni. Na yina ba wisanaka samu na kwenda tala yandi. Na manima ya kundimisa Balatuse, muntu yina vanda kipeke bamambu ya yinzo* ya mfumu, ba lombaka kizunu samu ti bwala ya bawu vanda kuzwaka bima ya kudya na bwala ya mfumu.
21 Na kilumbu yina ba soolaka, yandi lwataka bilele ya kimfumu. Yandi vandaka na kisika ya kusambisa mpe yandi bandaka kusadila bawu diskure.
22 Na yawu, bantu yina vukanaka bandaka kuzonza na ndinga ya ngolo: “Yayi ndinga ya nzambi, kasi ya muntu ve.”
23 Na mbala mosi, mbazi ya Yehova* bulaka yandi, samu yandi pesaka ve nkembo na Nzambi. Misyete kudyaka yandi mpe yandi kufwaka.
24 Kasi mambu ya Yehova* vanda lutila kumwangana, mpe bantu mingi kumaka bandimi.
25 Barnabasi na Solo, na manima ya kulungisa mbote-mbote kisalu ya kusadisa bampangi yina vandaka na Yeruzalemi, ba vutukaka mpe ba nataka kintwadi na bawu Yoane, yina ba vanda bokilaka mpe Marke.
Banote
^ To: “Kusambisa.”
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ To: “Vandaka na nsatu ya kunwana.”
^ Na Greke: “Muntu yina vanda bumbaka shambre.”
^ Tala Yina ba me bwela A5.
^ Tala Yina ba me bwela A5.
