Bisalu ya Bantumwa 13:1-52
13 Na kimvuka yina vandaka na Antyose, ya vandaka na bambikudi mpe milongi. Ya vandaka na Barnabasi, Simeyoni yina ba vanda bokilaka Nigere, Lusyuse ya bwala ya Sirene, Manayene yina kotaka na Erode mfumu ya kizunga, mpe Solo.
2 Ntangu ba vanda sadila* Yehova,* mpe kulutisa bantangu ata kudya kima, mpeve ya santu zonzaka: “Beno tula na lweka samu na munu Barnabasi na Solo samu na kisalu yina mu me bokila bawu.”
3 Na yawu, ba lutisaka bantangu ata kudya kima, mpe ba sambilaka. Na manima ba tulaka maboko na zulu ya bawu mpe ba bikaka ba kwenda.
4 Na yawu, babakala yayi yina mpeve ya santu filisaka kwendaka na Selesia, mpe katuka kuna, ba kotaka na bwatu mpe kwendaka na Shipre.
5 Ntangu ba kumaka na Salamine, ba bandaka kusamuna mambu ya Nzambi na bayinzo ya lusambu ya Bazwife. Yoane mpe vandaka na bawu samu na kusadisa bawu.
6 Ntangu ba manisaka kuluta na kisanga* nyonso yina tii na Pafose, ba bwabanaka na Zwife mosi na nkumbu ya Bare-Yesu, yina vandaka nganga mpe mbikudi ya luvunu.
7 Yandi vandaka na prefe* Sergiyuse Poluse, bakala mosi ya mayela. Sergiyuse Poluse bokilaka Barnabasi na Solo na sika ya yandi, samu yandi vandaka na nsatu ya ngolo ya kuwa mambu ya Nzambi.
8 Kasi nganga yango yina ba vanda bokilaka mpe Elimase (Elimase zola zonza nganga), bandaka kutelemina bawu. Yandi vanda sosa kunimina prefe na kukwikila.
9 Na yawu, Solo yina ba vanda bokilaka mpe Polo, fulukaka na mpeve ya santu. Yandi talaka yandi na kati ya meso,
10 mpe zonzaka: “Nge muntu ya kufuluka na luvunu ya mutindu nyonso mpe bansalulu ya yimbi ya mutindu nyonso, nge mwana ya Dyabulu, nge mbeni ya mambu nyonso ya lunungu, nge ke bika kwandi ve kutengimisa banzila ya kusungama ya Yehova?*
11 Tala, diboko ya Yehova* ke na zulu ya nge, mpe nge ke kuma na meso ya kufwa. Samu na mwa ntangu, nge ke tala dyaka ve nsemo ya ntangu.” Na mbala mosi, kima mutindu mulinga salaka ti yandi tala dyaka ve mbote-mbote, mpe yandi bandaka kutala mpimpa. Yandi bandaka kutambula kidi-kidi samu na kusosa muntu yina ke nata yandi na diboko.
12 Ntangu prefe talaka mambu yina salamaka, yandi kumaka mundimi, samu malongi ya Yehova* kamwisaka yandi.
13 Polo na bandiku ya yandi ya kisalu kotaka na bwatu na bwala ya Pafose mpe ba kumaka na Perga, na kizunga ya Pamfili. Kasi Yoane bikaka bawu mpe vutukaka na Yeruzalemi.
14 Ba katukaka na Perga mpe kumaka na Antyose ya Pisidi. Kilumbu ya saba, ba kotaka na yinzo ya lusambu ya Bazwife mpe ba vandaka.
15 Ntangu bantu ya nkaka manisaka kutanga Musiku mpe mikanda ya Bambikudi na mantwala ya bantu nyonso, bantwadisi ya yinzo ya lusambu filisaka bantu samu na kuzabisa na Polo na Barnabasi: “Bampangi, kana beno ke na mwa mambu ya kuzonza samu na kukindisa bantu, beno zonza yawu.”
16 Na yawu, Polo telamaka mpe salaka kidimbu na diboko ya yandi na kulomba ti ba vanda swi. Yandi zonzaka:
“Babakala, beno bantu ya Izraele, mpe beno bantu ya nkaka yina ke na boma ya Nzambi, beno kuwa.
17 Nzambi ya bantu yayi, bantu ya Izraele, soolaka bankooko ya beto, mpe yandi zangulaka dikanda yayi ntangu ba zingaka mutindu banzenza na ntoto ya Ezipte, mpe basisaka bawu kuna na ngolo ya diboko ya yandi.
18 Mpe na kati ya bamvula 40, yandi kangaka ntima na bifu ya bawu na ntoto ya kuyuma.
19 Na manima ya kufwa makanda 7 na yinsi ya Kanana, yandi pesaka bankooko ya beto ntoto yina samu ba byadila yawu.
20 Nyonso yayi salamaka na kati ya bamvula kana 450.
“Na manima yandi pesaka bawu bazuzi tii na ntangu ya mbikudi Samuele.
21 Kasi na manima, ba lombaka ba pesa bawu mfumu, mpe Nzambi pesaka bawu Sawule mwana ya Kishe, bakala mosi ya dikanda ya Benzame yina yalaka na zulu ya bawu na kati ya bamvula 40.
22 Ntangu yandi katulaka yandi, yandi pesaka bawu Davidi mutindu mfumu. Ni samu na yandi, yandi pesaka kimbangi yayi: ‘Mu me tala Davidi mwana ya Yese, muntu yina ke na sepelisaka ntima ya munu. Yandi ke sala mambu nyonso yina mu zola.’
23 Mutindu yandi pesaka nsilulu, ni na bana* ya muntu yayi, Nzambi me basisila Izraele muvuukisi, Yesu.
24 Tekila muntu yango kuma, Yoane samunaka pwelele na mantwala ya bantu nyonso ya Izraele mbotokolo yina vanda lakisa kubalula ntima.
25 Kasi ntangu Yoane vanda manisa kisalu ya yandi, yandi zonzaka: ‘Beno me kanisa ti mu ke nani? Mu ke ve yandi. Kasi beno tala! Muntu ke na kwizaka na manima ya munu, mpe mu ke ve ya kulunga samu na kunyangula basinga ya mapapa ya yandi.’
26 “Babakala, bampangi, beno bana ya dikanda ya Abrahami, mpe beno bantu ya nkaka yina ke na boma ya Nzambi, ba filisaka beto nsangu yina me tadila kuvuuka ya beto.
27 Bantu ya Izraele mpe bamfumu ya bawu zabaka ve muntu yango. Kasi ntangu ba sambisaka yandi, ba lungisaka bamambu yina Bambikudi zonzaka, yina ba ke tangaka na ndinga ya ngolo basaba nyonso.
28 Ata ti ba kuzwaka ata kima yina lombaka ti ba kufwa yandi, ba lombaka Pilate kufwa yandi.
29 Mpe ntangu ba manisaka kulungisa mambu nyonso yina sonamaka na yina me tadila yandi, ba katulaka yandi na yinti mpe ba tulaka yandi na ndyamu.*
30 Kasi Nzambi basisaka yandi na kati ya bantu ya kufwa.
31 Mpe na kati ya bilumbu mingi, yandi talanaka na bantu yina tambulaka na yandi katuka Galile tii Yeruzalemi. Ntangu yayi, bantu yayi kele bambangi ya yandi na sika ya bantu.
32 “Na yawu, beto ke na zabisaka beno nsangu ya mbote na yina me tadila nsilulu yina ba pesaka na bankooko ya beto.
33 Nzambi lungisaka yawu nyonso samu na beto, bana ya bawu, ntangu yandi vumbulaka Yesu na lufwa, kaka mutindu ya ke ya kusonama na nkunga ya zole: ‘Nge ke mwana ya munu. Bubu yayi mu me kuma tata ya nge.’
34 Nzambi vumbulaka yandi na kati ya bantu ya kufwa, mpe yandi ke vanda dyaka ata fioti ve na nzutu yina lenda bola. Nzambi lakisaka ti mambu yayi ke ya tsyeleka ntangu yandi zonzaka: ‘Mu ke lakisa beno luzolo ya kukwikama yina mu pesaka nsilulu na Davidi, yina beno me bonga kutudila yawu ntima.’*
35 Ni na yawu yandi zonzaka mpe na nkunga ya nkaka: ‘Nge ke bika ve ti muntu ya nge ya kukwikama bola.’
36 Davidi sadilaka* Nzambi luzingu ya yandi nyonso. Na manima yandi lalaka na kati ya lufwa. Ba zikaka yandi kintwadi na bankooko ya yandi, mpe yandi bolaka.
37 Kasi muntu yina Nzambi vumbulaka na lufwa bolaka ve.
38 “Na yawu bampangi, beno me lunga kuzaba ti ni na nzila ya muntu yayi, ba ke na zabisaka beno ti Nzambi ke lemvokila masumu ya bantu,
39 mpe ti na mambu nyonso yina Musiku ya Moyize lendaka ve kukumisa beno bantu ya lunungu, muntu nyonso yina ke kwikilaka, Nzambi ke bokila yandi muntu ya lunungu na nzila ya muntu yayi.
40 Na yawu, beno sala keba ti bamambu yina ba zonzaka na nzila ya Bambikudi kumina ve beno:
41 ‘Beno tala yawu, beno ba yina ke vwezaka. Beno yituka mpe beno kufwa, samu mu ke na salaka kisalu mosi na ntangu ya beno, kisalu yina beno ke ndima ata fioti ve, ata ti muntu zabisa beno yawu mbote-mbote.’”
42 Ntangu ba vanda basika, bantu bondilaka bawu samu ba zonzila dyaka bawu bamambu yayi saba yina ke landa.
43 Ntangu lukutakanu na yinzo ya lusambu manisaka, Bazwife mingi mpe bantu yina ndimaka dibuundu ya Bazwife, yina vanda sambila Nzambi, landaka Polo na Barnabasi. Ntangu ba vanda zonza na bawu, Polo na Barnabasi kindisaka bawu na kubikana na kati ya ntima ya kulutila mbote ya Nzambi.
44 Saba yina landaka, pene-pene na bantu nyonso ya mbanza, vukanaka samu na kuwa mambu ya Yehova.*
45 Ntangu Bazwife talaka bantu mingi yina, ba fulukaka na kimbanda mpe ba bandaka kusala ntembe na kufinga nyonso na bamambu yina Polo vanda zonza.
46 Na yawu, Polo na Barnabasi zonzaka na bawu na bukindi nyonso: “Ya vandaka mfunu ti ba zonzila ntete mambu ya Nzambi na beno. Kasi mutindu beno me manga yawu, mpe beno me tala ti beno ke ve ya kulunga samu na kuzwa luzingu ya ntangu nyonso, beno tala, awa beto me kwenda na bantu ya makanda.
47 Ya tsyeleka, Yehova* me tumisa beto na kuzonzaka: ‘Mu me tula nge mutindu nsemo samu na makanda, samu nge nata luvuukusu tii na bansongi ya ntoto.’”
48 Ntangu bantu ya makanda kuwaka mambu yayi, ba bandaka kusepela mpe kupesa nkembo na mambu ya Yehova* mpe ba yina nyonso vandaka na ntima yina me bonga samu na kuzwa luzingu ya ntangu nyonso kumaka bandimi.
49 Dyaka, mambu ya Yehova* vanda mwangana na bwala ya muvimba.
50 Kasi Bazwife salaka tiya na bakento ya kuzangama yina vandaka na boma ya Nzambi mpe na babakala ya mfunu ya mbanza, mpe ba bandaka kunyokola Polo na Barnabasi mpe ba losaka bawu na ngaanda ya mbanza ya bawu.
51 Na yawu, ba pupulaka fundu-fundu ya makulu ya bawu mpe ba kwendaka na Ikoniumi.
52 Mpe bilandi vanda bika ve kufuluka na kilengi mpe na mpeve ya santu.
Banote
^ To: “Ntangu ba vanda sala na mantwala ya bantu nyonso samu na.”
^ Tala Yina ba me bwela A5.
^ Ya ke bwala yina maza ke zungaka.
^ Muroma yina vandaka mfumu ya kizunga. Tala Yina ya zola zonza.
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ To: ”Mbuma.”
^ To: “Ndyamu ya kubambuka.”
^ To: “Yina kele ya kukwikama.”
^ To: “Salaka luzolo ya.”
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
