Bisalu ya Bantumwa 14:1-28
14 Na Ikoniumi, ba kotaka kintwadi na yinzo ya lusambu ya Bazwife, mpe ba zonzaka na mutindu mosi yina salaka ti Bazwife mpe Bagreke mingi kuma bandimi.
2 Kasi Bazwife yina kwikilaka ve nataka bantu* ya makanda na kusala muvusu mpe na kuyiina bampangi.
3 Na yawu, Polo na Barnabasi lutisaka bantangu mingi kuna. Ba vanda zonza na bukindi na lubakusu ya lutumu yina katukaka na Yehova.* Yandi sadilaka maboko ya bawu samu na kusala bidimbu mpe bimangu samu na kulakisa butsyeleka ya nsangu yina ba vanda samuna, nsangu yina me tadila ntima ya yandi ya kulutila mbote.
4 Kasi bantu ya mbanza kabukaka. Ba ya nkaka kotilaka Bazwife, kasi ba ya nkaka bantumwa.
5 Bantu ya makanda mpe Bazwife, kintwadi na bamfumu ya bawu, sosaka kutalisa bawu nsoni mpe kubula bawu matadi.
6 Ntangu Polo na Barnabasi kuwaka yawu, ba kimaka na bambanza ya Likawoni, Listre na Derbe, mpe na babwala yina vandaka pene-pene.
7 Kuna, ba vanda tatamana na kuzabisa nsangu ya mbote.
8 Na Listre, ya vandaka na bakala mosi yina vandaka ya kuvanda mpe makulu ya yandi vandaka ya kufwa. Yandi vandaka kikata banda kubutuka ya yandi, mpe yandi vandaka nabunu yandi tambula.
9 Muntu yango vanda kuwa Polo ntangu yandi vanda zonza. Polo talaka yandi mbote-mbote, mpe ntangu yandi talaka ti yandi vandaka na kiminu samu ba belusa yandi,
10 yandi zonzaka na ndinga ya ngolo: “Telama na makulu ya nge.” Na yawu, bakala yango dumukaka mpe bandaka kutambula.
11 Ntangu bantu mingi yango talaka mambu yina Polo salaka, ba gangaka na ndinga ya bantu ya Likawoni: “Banzambi me kuma mutindu bantu mpe me kwiza na yisi, na sika ya beto.”
12 Ba bandaka kubokila Barnabasi Zeusi kasi Polo Ermese, samu ni yandi vanda zonza mingi.
13 Nganga-nzambi ya Zeusi yina tempelo ya yandi vandaka na kisika ya kukotila ya mbanza, nataka bangombe ya babakala mpe bayimpu ya bafololo, mpe kintwadi na bantu mingi yina, yandi sosaka kupesa minkayulu.
14 Kasi ntangu bantumwa Barnabasi na Polo kuwaka yawu, ba pasulaka binkuti ya bawu, ba kotaka na mbangu na kati ya bantu mingi yina, mpe zonzaka na ndinga ya ngolo:
15 “Bampangi, samu na yinki beno ke salaka bamambu yayi? Beto mpe ke bantu na bifu mosi na beno. Beto ke na zabisaka beno nsangu ya mbote samu beno bika bamambu ya mpamba yayi mpe beno baluka na sika ya Nzambi yina ke moyo, yina yidikaka zulu, ntoto, nzadi ya mungwa mpe bima nyonso yina ke na kati ya yawu.
16 Na bantangu ya ntama, yandi bikaka makanda nyonso kulanda banzila ya bawu.
17 Ata faso yina, yandi pesaka kimbangi samu na kulakisa nani yandi kele, na kusalaka mambu ya mbote. Yandi pesaka bamvula yina ke katukaka na zulu, mpe bantangu yina bambuma ke basikaka mingi, mpe yandi me yukutisa beno na madya mpe me fulusa bantima ya beno na nsayi.”
18 Ata ti ba zonzaka bamambu yayi, ya vandaka mpasi na bawu na kunimina bantu mingi yango na kupesa bawu minkayulu.
19 Kasi Bazwife mingi yina katukaka na Antyose mpe na Ikoniumi kwizaka mpe ndimisaka bantu mingi yango. Ba bulaka Polo matadi mpe nataka yandi na ngaanda ya mbanza. Ba vanda kanisa ti yandi kufwaka.
20 Kasi ntangu bilandi zungaka yandi, yandi telamaka mpe kotaka na mbanza. Na kilumbu yina landaka, yandi katukaka kuna na Barnabasi samu na kukwenda na Derbe.
21 Na manima ya kusamuna nsangu ya mbote na mbanza yango mpe kukumisa bantu mingi bilandi, ba vutukaka na Listre, na Ikoniumi mpe na Antyose.
22 Kuna, ba pesaka bilandi* ngolo mpe ba kindisaka bawu na kubikana ya kukangama na kati ya kiminu. Ba zonzaka: “Beto me fwana kukota na kati ya Kimfumu ya Nzambi na nzila ya bampasi mingi.”
23 Dyaka, ba tudilaka bawu bakuluntu na konso kimvuka. Ba sambilaka, ba lutisaka bantangu ata kudya kima, mpe ba pesaka bawu na maboko ya Yehova,* yina ba kwikilaka.
24 Na manima, ba lutaka na Pisidi mpe ba kumaka na Pamfili.
25 Na manima ya kusamuna mambu ya Nzambi na Perga, ba kwendaka na Atali.
26 Kuna, ba bakaka masuwa samu na kukwenda na Antyose, kisika yina ba pesaka bawu na maboko ya ntima ya kulutila mbote ya Nzambi, samu na kisalu yina ba katukaka kumanisa.
27 Ntangu ba kumaka mpe vukisaka kimvuka, ba zonzilaka bawu bamambu mingi yina Nzambi salaka na nzila ya bawu, mpe mutindu yandi fungudilaka makanda mwelo ya kiminu.
28 Na yawu, ba lutisaka ntangu mingi na bilandi.
Banote
^ To: “Bamwela ya bantu.”
^ Tala Yina ba me bwela A5.
^ To: “Bamwela ya bilandi.”
^ Tala Yina ba me bwela A5.
