Bisalu ya Bantumwa 15:1-41
15 Babakala ya nkaka katukaka na Zude mpe ba bandaka kulonga bampangi na kuzonzaka: “Kana beno zengisa ve kibakala mutindu Musiku ya Moyize ke lombaka yawu, beno lenda vuuka ve.”
2 Kasi ntangu ntembe ya ngolo kotaka na kati ya bawu mpe ba vanda wisana dyaka ve na Polo mpe Barnabasi, ba bakaka mukanu ti Polo, Barnabasi, mpe ndambu ya bantu ya nkaka, kwenda na sika ya bantumwa mpe na bakuluntu ya Yeruzalemi samu na mambu* yayi.
3 Na yawu, kimvuka kwendaka filisa bawu na nzila, mpe na manima babakala yango lutaka na Finisi mpe na Samariya. Ba vanda zonzila mutindu bantu ya makanda vanda soba ndyatulu, mpe ba vanda pesa bampangi nyonso nsayi mingi.
4 Ntangu ba kumaka na Yeruzalemi, kimvuka, bantumwa mpe bakuluntu yambaka bawu na faso ya mbote, mpe ba zabisaka bawu bamambu mingi yina Nzambi salaka na nzila ya bawu.
5 Kasi bantu ya nkaka ya mwa dibuundu ya Bafarize yina kumaka bandimi telamaka na bakiti ya bawu mpe zonzaka: “Ba me lunga kuzenga bawu kibakala mpe kutumisa bawu na kulanda Musiku ya Moyize.”
6 Na yawu, bantumwa mpe bakuluntu vukanaka kintwadi samu na kutadila mambu yango.
7 Na manima ya kuzonzila yawu mingi,* Piere telamaka mpe zonzaka na bawu: “Bampangi, beno zaba mbote-mbote ti banda ntama, Nzambi soolaka munu na kati ya beno, samu ti na yinwa ya munu, bantu ya makanda kuwa nsangu ya mbote mpe ba kwikila.
8 Mpe Nzambi yina ke zabaka bantima lakisaka ti yandi me ndima bawu na kupesaka bawu mpeve ya santu, kaka mutindu yandi salaka mpe yawu samu na beto.
9 Yandi salaka ata fioti ve luswaswanu na kati ya bawu na beto. Kasi yandi vedisaka bantima ya bawu na nzila ya kiminu.
10 Na yawu, samu na yinki ntangu yayi beno ke na mekaka Nzambi na kutulaka kizitu ya nene na mapeka ya bilandi, kilo yina, ya vanda bankooko ya beto mpe beto mosi me lenda ve na kunata?
11 Kasi beto ke na kundima ti beto ke vuuka na nzila ya ntima ya kulutila mbote ya Mfumu Yesu, mutindu mosi na bawu.”
12 Bantu nyonso kumaka swi, mpe ba bandaka kuwa Barnabasi na Polo kuzonzila bidimbu mpe bimangu yina Nzambi salaka na nzila ya bawu na kati ya makanda.
13 Ntangu ba manisaka kuzonza, Zaki zonzaka: “Bampangi, beno kuwa munu.
14 Simeyoni me zonzila mbote-mbote mutindu Nzambi tulaka mbala ya ntete dikebi na makanda, samu na kubasisa na kati ya bawu dikanda samu na nkumbu ya yandi.
15 Mpe ya ke na kwelanaka na mambu yina Bambikudi zonzaka, kaka mutindu ya ke ya kusonama:
16 ‘Na manima ya bamambu yayi, mu ke vutuka, mpe mu ke telemisa dyaka yinzo* ya Davidi yina kubwaka. Mu ke tunga dyaka bisika ya yawu yina bebaka, mpe mu ke bongisa dyaka yawu,
17 samu ba yina me bikana sosa Yehova* na matsyeleka nyonso, kintwadi na bantu ya makanda nyonso, bantu yina ba ke bokilaka na nkumbu ya munu, Yehova* muntu me zonza, yandi muntu yina ke na salaka bamambu yayi,
18 bamambu yina me zabana banda ntama.’
19 Na yawu, mukanu* ya munu kele ti beto kwamisa ve bantu ya makanda yina ke na balukaka na sika ya Nzambi,
20 kasi kusonikila bawu na kumanga bima yina ba me kumisa mvindu na biteki, kinsuza,* bibulu yina ba me kufwa na kukangaka kupema ya bawu,* mpe menga.
21 Banda ntangu ya ntama, Moyize ke na bantu yina ke samunaka mambu yina ke na mikanda ya yandi na bambanza nyonso, samu basaba nyonso, ba ke tangaka yawu na ndinga ya ngolo na bayinzo ya lusambu ya Bazwife.”
22 Na yawu, bantumwa mpe bakuluntu kintwadi na kimvuka nyonso, bakaka mukanu ya kufilisa bantu yina ba soolaka na kati-kati ya bawu samu ba kwenda na Antyose, kintwadi na Polo mpe Barnabasi. Ba filisaka Yuda yina ba vanda bokilaka Barsabasi mpe Silase, bantu yina vandaka na biyeko na kati ya bampangi.
23 Yayi ni mambu yina ba sonikaka na mikanda yina ba filisaka na nzila ya bawu:
“Beto bantumwa mpe bakuluntu, yina ke bampangi ya beno, beto ke na sonikilaka beno, bampangi ya beto yina me katuka na makanda, yina ke vandaka na Antyose, na Siri, mpe na Silisi: Mbote ya beno!
24 Beto kuwaka ti ba ya nkaka na kati ya beto kwizaka kotisa muvusu na kati ya beno na bamambu yina ba vanda zonza. Ba vanda sosa kubwisa beno,* ata ti beto tumisaka ve bawu.
25 Beto nyonso me wisana, mpe beto me baka mukanu ya kusoola babakala yina beto ke filisa na sika ya beno, kintwadi na Barnabasi mpe Polo, bampangi ya beto ya luzolo,
26 bantu yina me pesa luzingu* ya bawu samu na nkumbu ya Mfumu ya beto, Yesu Kristo.
27 Na yawu, beto ke na filisaka Yuda mpe Silase samu bawu mpe ba zabisa beno bamambu yango na yinwa ya bawu.
28 Samu mpeve ya santu mpe beto mosi me tala ti ya ke mbote na kubwela ve beno kilo ya nkaka, katula kaka bamambu yayi yina ke mfunu:
29 beno tatamana na kumanga bima yina ba me pesa na munkayulu na biteki, menga, bibulu yina ba me kufwa na kukangaka kupema ya bawu,* mpe kinsuza.* Kana beno bumba mbote-mbote banzutu ya beno na bamambu yayi, beno ke vanda mbote. Beno bikana mbote!”
30 Na yawu, ntangu babakala yango kwendaka, ba kulumukaka na Antyose, ba vukisaka kimvuka nyonso ya bantu, mpe ba pesaka bawu mukanda yango.
31 Na manima ya kutanga yawu, ba sepelaka samu bamambu yina kindisaka bawu.
32 Dyaka, samu Yuda na Silase vandaka mpe bambikudi, ba kindisaka bampangi na badiskure mingi mpe ba pesaka bawu ngolo.
33 Na manima ya kulutisa mwa ntangu kuna, bampangi bikaka ba vutuka na kizunu nyonso, na sika ya ba yina filisaka bawu.
34 * ——
35 Kasi Polo na Barnabasi bikanaka na Antyose. Kintwadi na bantu ya nkaka, ba vanda longa mpe vanda zabisa nsangu ya mbote ya dyambu ya Yehova.*
36 Na manima ya mwa bilumbu, Polo zonzaka na Barnabasi: “Ntangu yayi, beto* vutuka na sika ya bampangi na babwala nyonso yina beto zabisaka dyambu ya Yehova,* samu na kutala faso ba kele.”
37 Barnabasi bakaka mukanu ya kunata Yoane yina ba vanda bokilaka Marke.
38 Kasi Polo vanda sepela ve kunata yandi na bawu, samu yandi bikaka bawu na Pamfili mpe kwendaka ve na bawu samu na kisalu.
39 Na yawu, ba swanaka na faso mosi ya kusakana ve, mpe ba kabukaka, muntu na muntu na nzila ya yandi. Barnabasi bakaka Marke, kotaka na masuwa mpe kwendaka na Shipre.
40 Polo soolaka Silase, mpe bampangi sambilaka samu Yehova* lakisa yandi ntima ya yandi ya kulutila mbote. Na manima, yandi kwendaka.
41 Yandi lutaka na Siri, mpe na Silisi, mpe yandi vanda kindisa bimvuka.
Banote
^ To: “Kuswana.”
^ To: “Ya kuswana mingi na yawu.”
^ To: “Yinzo ya matiti.”
^ Tala Yina ba me bwela A5.
^ Tala Yina ba me bwela A5.
^ To: “Dikanisi.”
^ Na ndinga ya Greke, por·nei′a. Tala Yina ya zola zonza.
^ To: “Yina ba me kufwa kasi menga ya bawu me tanga ve.”
^ To: “Bamwela ya beno.”
^ To: “Bamwela.”
^ To: “Yina ba me kufwa kasi menga ya bawu me tanga ve.”
^ Na ndinga ya Greke, por·nei′a. Tala Yina ya zola zonza.
^ Tala Yina ba me bwela A3.
^ Tala Yina ba me bwela A5.
^ To ya lenda vanda: “Beto fwana.”
^ Tala Yina ba me bwela A5.
^ Tala yina ba me bwela A5.
